‘కలిసికట్టుగా నడవాలి’

అమరావతి: రాష్ట్రంలో నెలకొన్న సమస్యలపై పార్టీలోని నేతలు అందరూ భిన్నాబిప్రాయాలు లేకుండా ఒకే మాటగా ముందుకు సాగాలని ఏపి బిజెపి నేతలు నిర్ణయించుకున్నట్లు సమాచారం. హైదరాబాదు గచ్చిబౌలిలోని పార్టీ అధ్యక్షుడు కన్నా లక్ష్మీనారాయణ నివాసంలో శనివారం ఏపి బిజెపి నేతలు  సమావేశం అయ్యారు.

కేంద్ర హోంశాఖ సహాయ మంత్రి కిషణ్ రెడ్డి, సునీల్ దియోధర్ తో పాటు ఏపికి చెందిన రాజ్యసభ సభ్యులు సుజనా చౌదరి, సిఎం రమేష్, టిజి వెంకటేష్, ఆ పార్టీ ముఖ్య నేతలు దగ్గుబాటి పురందేశ్వరి, సోము వీర్రాజు, మాణిక్యాలరావు, సత్యమూర్తి ఈ సమావేశంలో పాల్గొన్నారు.

రాష్ట్రంలో వైసిపి ప్రభుత్వం తీసుకుంటున్న అనాలోచిత నిర్ణయాలు, ప్రజా సమస్యలపై ఏరకంగా ముందుకు సాగాలి, రాష్ట్రంలో పార్టీ బలోపేతానికి తీసుకోవాల్సిన చర్యలపై చర్చించినట్లు తెలుస్తోంది. వివిధ అంశాలపై పార్టీ తీసుకున్న నిర్ణయాలకు అనుగుణంగానే అందరు నాయకులు వ్యవహరించాలని నిర్ణయానికి వచ్చినట్లు సమాచారం. పార్టీ అధిష్టానం నుండి హజరైన పార్టీ జాతీయ కార్యదర్శి రాంమాధవ్ రాష్ట్రంలో పార్టీ బలోపేతం, తదితర అంశాలపై దిశానిర్దేశం చేశారు. విజయవాడలో రాష్ట్ర పార్టీ కార్యాలయం ఏర్పాటుకు నిర్ణయం తీసుకున్నారు.

మంత్రి బొత్సా సత్యనారాయణ వ్యాఖ్యల అనంతరం రాజధాని అమరావతి అంశంపై ఆ పార్టీ అధ్యక్షుడు కన్నా లక్ష్మీనారాయణ ఒక రకంగా, ఆ పార్టీకి నాయకులు కొందరు మరో రకంగా వ్యాఖ్యానాలు చేసిన విషయం తెలిసిందే. రాజధాని అమరావతిలోనే రాజధాని కొనసాగించాలని ఆ పార్టీ అధ్యక్షుడు కన్నా లక్ష్మీనారాయణ గట్టిగా చెబుతూ అమరావతి ప్రాంత రైతాంగానికి కూడా బిజెపి అండగా ఉంటుందని హామీ ఇచ్చారు. ఈ నేపథ్యంలో ఆ పార్టీకి చెందిన రాజ్యసభ సభ్యుడు టిజి వెంకటేష్ నాలుగు ప్రాంతాల్లో రాజధాని అభివృద్ధి జరిగే అవకాశం ఉందంటూ వ్యాఖ్యానాలు చేశారు. అదే మారిదిగా మరో రాజ్యసభ సభ్యుడు జివిఎల్ నర్శింహరావు కూడా రాజధాని ఏర్పాటు అనేది రాష్ట్ర ప్రభుత్వ ఇష్టమని, కేంద్రానికి సంబంధం లేదంటూ వ్యాఖ్యానించారు. ఆ పార్టీ మహిళా నేత దగ్గుబాటి పురందేశ్వరి కూడా అభివృద్ధి వికేంద్రీకరణ జరగాలని వ్యాఖ్యానించారు. రాజధాని మార్చడం అంటే సులువు కాదని మరో రాజ్యసభ సభ్యుడు సుజనా చౌదరి పేర్కొన్నారు.

రాజధాని అంశంలో ఒకే పార్టీకి చెందిన నేతలు పరస్పర విరుద్ధ ప్రకటనలు చేశారు. ఆంధ్రప్రదేశ్‌లో ఇసుక కొరత కారణంగా వేలాది మంది భవన నిర్మాణ కార్మికులు పనులు లేక ఇబ్బందులు పడుతున్నారు. ఈ సమస్యపై ఇప్పటికే టిడిపి నిరసన కార్యక్రమాన్ని నిర్వహించింది.  రాష్ట్రంలోని పలు ప్రధాన సమస్యలపై ఆ పార్టీ అధ్యక్షుడు కన్నా లక్ష్మీనారాయణ ముఖ్యమంత్రి వైఎస్ జగన్మోహనరెడ్డికి పలు లేఖలను రాశారు. అయితే లేఖలకు సమాధానాలే ఇవ్వడం లేదని ఇటీవల కన్నా పేర్కొన్నారు. ప్రస్తుతం రాష్ట్రంలో నెలకొన్న తాజా పరిణామాల నేపథ్యంలో బిజెపి నేతలు ఈ  సమావేశం నిర్వహించడం ప్రాధాన్యతను సంతరించుకోంది.