బీజేపీపై కేసీఆర్ పెద్ద ప్లాన్..! కొత్త వ్యూహంతో గ్రేటర్ కి..!!

ఆస్ట్రేలియా క్రికెట్ లో ఓ మైండ్ గేమ్ ఉంది. తమ బ్యాట్స్ మెన్ అవుటయితే వెంటనే వచ్చే బ్యాట్స్ మెన్ పై ప్రత్యర్ధి బౌలర్లు మళ్లీ చెలరేగకుండా వచ్చీ రావడంతోనే ఫోర్ లేదా సిక్స్ కొట్టడానికి ట్రై చేస్తారు. ఇదంతా బౌలింగ్ టీమ్ స్థైర్యాన్ని దెబ్బ తీయడం కోసమే. అదే బౌలింగ్ చేసి వికెట్ తీస్తే ఆస్ట్రేలియా పేసర్లకు భయపడి వచ్చిన బ్యాట్స్ మెన్ డిఫెన్సే ఆడతారు. ఇది ఆస్ట్రేలియా మార్క్ టెక్నిక్. ఇప్పుడిదంతా ఎందుకంటే.. క్రికెట్లో ఆస్ట్రేలియా ఆలోచించినట్టే.. రాజకీయాల్లో సీఎం కేసీఆర్ అలానే ఆలోచిస్తారు. ప్రస్తుతం ఆయన దెబ్బతిన్న పులి. కుమార్తె కవిత ఓటమి తర్వాత ఆయనకు తగిలిన రెండో దెబ్బ బీజేపీ చేతిలో ‘దుబ్బాక’ ఓటమి. దీంతో జీహెచ్ఎంసీ ఎన్నికల్లో బీజేపీకి అవకాశం ఇవ్వకూడదని ఆయన ఆలోచిస్తున్నట్టు సమాచారం.

లోగుట్టు కేసీఆర్ కు ఎరుకే..

మొక్కై వంగనిది మానై వంగునా.. అనే సామెత ఆయనకు తెలుసు. టీఆర్ఎస్ పార్టీని, కేసీఆర్ ను 2001లో అందరూ లైట్ తీసుకున్నారు. 2004లో ఆయనతో కాంగ్రెస్ పొత్తు పెట్టుకుని టీఆర్ఎస్ ని పెరగనిచ్చింది. తర్వాత కేసీఆర్ వాయిస్ మరింత పెరిగింది. 2009లో ఆయనతో పొత్తు ఉండాల్సిందే అనేంతగా టీడీపీ పొత్తు పెట్టుకుంది. ఇంకా పెరిగారు. వైఎస్ మరణం తర్వాత అందివచ్చిన అవకాశాన్ని ఉపయోగించుకుని దీక్ష చేపట్టి తెలంగాణ రాష్ట్రం అవసరం ఏంటో దేశానికి చూపించారు. తెలంగాణ సాధించారు. ఇప్పుడు ఏకఛత్రాధిపత్యం. ఇక్కడా.. ఇదెందుకంటే.. ప్రస్తుతం బీజేపీకి దుబ్బాక విజయం మొక్క స్థాయిలో చిగురించింది. ఆ మొక్కకు నీళ్లు పోసే అవకాశం ప్రజలకిస్తే మానై ఎదుగుతుందని కేసీఆర్ కు తెలీదా..!

ఎత్తుకుపై ఎత్తుల వ్యూహకర్త..

నిజానికి దుబ్బాక విజయం నల్లేరు మీద నడకే అనుకుంది టీఆర్ఎస్. కానీ.. బీజేపీ దూసుకొచ్చింది. గెలుపు ఇచ్చే కిక్ కేసీఆర్ కు తెలుసు. అదే ఆనందంలో ఉన్న బీజేపీకి ఇప్పుడు అవకాశం ఇస్తే.. హైదరాబాద్ లో ఇప్పటికే పట్టున్న బీజేపీ మరింత పుంజుకుని.. జీహెచ్ఎంసీ ఎన్నికల్లో విజయం సాధిస్తే.. కేసీఆర్ తట్టుకోగలరా..? అందుకే.. బీజేపీకి అవకాశం ఇవ్వకుండా జనవరి లేదా ఫిబ్రవరిలో జరపాలనుకున్న గ్రేటర్ ఎన్నికలను ఈ నెలాఖరు లేదా డిసెంబర్ మొదటివారంలోనే నిర్వహించేలా ఆలోచన చేస్తున్నట్టు సమాచారం. ప్రజల్లోకి బీజేపీకి, ప్రజలకు బీజేపీ గురించి ఆలోచించే అవకాశం ఇవ్వకూడదనేది గులాబీ బాస్ ఆలోచనట. మరి.. ఈ స్వయంభూ ఎన్నికల వ్యూహకర్త కేసీఆర్ ఏం చేస్తారో..!