‘జీహెచ్ఎంసీ’లో జనసేన.. పవన్ నిర్ణయం కరెక్టేనా..?

పవన్ కల్యాణ్ సినిమా అంటే ఫ్యాన్స్ కు ఏరేంజ్ లో కిక్ వస్తుందో ప్రత్యేకించి చెప్పాల్సిన అవసరం లేదు. చిరంజీవి తమ్ముడిగా ఓదశలో మెగాస్టార్ ఇమేజ్ ను రెండు దశాబ్దాల క్రితమే టచ్ చేశారు. పదేళ్ల వరుస ఫ్లాపులు కూడా పవన్ క్రేజ్ ను ఏమాత్రం తగ్గించలేకపోయాయి. అదే క్రేజ్ తో ఆయన పొలిటికల్ ఎంట్రీ ఇచ్చారు. పవన్ ఫ్యాన్స్ అంతా ఆయన వెంటే నడిచారు. 2014లో పోటీ చేస్తారనుకుంటే టీడీపీ-బీజేపీ కూటమికి మద్దతిచ్చారు. 2019లో ముగ్గురూ విడివిడిగా పోటీ చేశారు. వైఎస్సార్సీపీ ఫ్యాన్ గాలి ముందు జనసేన, టీడీపీ, బీజేపీ చెల్లాచెదురైపోయాయి. ఇదంతా ఏపీ కథ. ఇప్పుడు తెలంగాణలో జీహెచ్ఎంసీ ఎన్నికలు జరుగబోతున్నాయి. ఈ ఎన్నికల్లో పోటీ చేస్తామని జనసేన ప్రకటించింది. అయితే.. ఇందులో కొంత మోదం.. కొంత ఖేదం ఉన్నాయి.

పవన్ కు ప్లస్ అయ్యే అంశాలు..

జీహెచ్ఎంసీ ఎన్నికల్లో పోటీ చేయాలనే పవన్ నిర్ణయంపై కొందరు పెదవి విరుస్తున్నారు. కానీ.. జనసేనకు ఎన్నికల్లో గెలుపు కంటే అనుభవం ముఖ్యం. అందివచ్చిన అవకాశాన్ని వదులుకోవడం ఇష్టం లేకపోయింది. పైగా.. పవన్ పిలుపుతో సేవా కార్యక్రమాల్లో విరివిగా పాల్గొంటున్న ఫ్యాన్స్, క్యాడర్ ను కాస్త ఉత్సాహపరచాలన్నా.. పార్టీపై నమ్మకం కలిగించాలన్నా ఈ కష్టం తప్పదు. జనసేన గెలుస్తుందనే నమ్మకం కాకపోయినా.. ప్రజల్లో పార్టీ బలం, నమ్మకం నిలుపుకోవడం ఎంతో ముఖ్యం. లేదంటే.. ఏపీలో ఘోరంగా ఓడిపోయిన, అధ్యక్షుడే ఓడిపోయిన పార్టీ ఇప్పటికీ నిలబడిందంటే అది పవన్ నిబ్బరం ఓ కారణమైతే.. క్యాడర్, ఫ్యాన్స్ మరో కారణం.

పవన్ పై విమర్శలు ఇందుకే..

రాజకీయంగా పవన్ ఏపీలో మాత్రమే యాక్టివ్ గా ఉన్నారు. 2019లో పోటీ చేస్తే స్వయానా పవన్ రెండు స్థానాల్లోనూ ఓడిపోయారు. ఫ్యాన్స్, క్యాడర్ ఉన్నా గెలుపు సాధ్యం కాలేదు. జనసేన నుంచి ఒక్క ఎమ్మెల్యే గెలిచినా ఆయనా పవన్ మాట వినే స్టేజ్ దాటిపోయారు. పవన్ సినిమాకు బాక్సాఫీస్ వద్ద టికెట్లు తెగుతున్నాయి కానీ.. బ్యాలెట్ బాక్సుల్లో ఓట్లు పడటం లేదు. ఇంత యాక్టివ్ గా ఏపీ పాలిటిక్స్ లో ఉంటేనే పరిస్థితి ఇలా ఉంది.. తెలంగాణలో పాలిటిక్స్ లో ఏమాత్రం యాక్టివ్ గా లేకుండా కేవలం హైదరాబాద్ పై నమ్మకంతో ఓటింగ్ కు వెళ్లడం ఎందుకని కొందరి భావన. మరి.. పవన్ తన ఫ్యాన్స్, పార్టీ క్యాడర్ పై నమ్మకం ఏమేరకు నెరవేరుతుందో చూడాలి.