‘అటవీ సిబ్బందిపై తిరగబడండి’

హైదరాబాదు: ఆయన చట్టానికి లోబడి బాధ్యతలను నిర్వహించాల్సిన ప్రజా ప్రతినిధి. కానీ ఆయన ఆ విషయాన్ని మరచి అధికారులపై గిరిజనులను రెచ్చగొట్టే విధంగా మాట్లాడటం చర్చనీయాంశమైంది. మీ హక్కులకు భంగం కలిగితే అటవీశాఖ అధికారులపైనా తిరగబడండి, అవసరమైతే దాడి చేయండి, నేనున్నానంటూ అభయం ఇస్తున్నారు అదిలాబాద్ బిజెపి ఎంపి సోయం బాపూరావు.

ఇటీవల కొమరం భీమ్ అసిఫాబాద్ జిల్లాలో అటవీశాఖ అధికారి అనితపై టిఆర్‌ఎస్ ఎమ్మెల్యే కోనేరు కోనప్ప సోదరుడు కృష్ణ, ఆయన వర్గీయులు దాడి చేసిన ఘటన మరువక ముందే ఒక ఎంపి వివాదాస్పద వ్యాఖ్యలు చేయడం సంచలనం కల్గించింది.

తుడుందెబ్బ వ్యవస్థాపకుడు సిద్ధం శంబు వర్థంతి కార్యక్రమానికి హజరైన ఎంపి బాపూరావు మాట్లాడుతూ పోడు భూముల్లో మొక్కలు నాటకుండా అటవీశాఖ అధికారులను అడ్డుకోవాలని గిరిజనులకు సూచించారు. వారు నాటిన మొక్కలను పీకేయాలని బాపూరావు పిలుపునిచ్చారు. పోడు భూములను లాక్కోవాలని చూస్తే అటవీశాఖ అధికారులపై తిరగబడాలనీ, అవసరమైతే దాడి చేయాలని కూడా బాపూరావు అన్నారు. తాను గిరిజనుల హక్కుల కోసం పోరాడతాననీ, గిరిజనులు ఎవ్వరూ భయపడాల్సిన అవసరం లేదంటూ బాపూరావు అభయం ఇచ్చారు.