అన్న కాంగ్రెస్ లో.. తమ్ముడు బీజేపీలో!

(న్యూస్ ఆర్బిట్ డెస్క్)

దివంగత కాంగ్రెస్ నేత వెంకటస్వామి కుటుంబంలో చీలిక వచ్చిందా? అంటే అవుననే సమాధానం వినిపిస్తోంది. వెంకటస్వామి కుమారులు ఇద్దరు రాజకీయంగా చెరో దారిలో ఉన్నారు. ఇద్దరూ ఒకే పార్టీలో ఉండే యత్నాలు చేసినా అనంతరం వేర్వేరు దారుల్లో వెళ్లారు. ప్రస్తుతం మాజీ ఎంపీ వివేక్ బిజెపిలో కొనసాగుతుండగా, ఆయన సోదరుడు మాజీ మంత్రి వినోద్ కాంగ్రెస్ లోకి తిరిగి ప్రవేశించారు. తెలంగాణ కాంగ్రెస్‌ వ్యవహారాల ఇన్‌ఛార్జీ కుంతియా సమక్షంలో ఆయన శనివారం (జనవరి 11) కాంగ్రెస్‌ పార్టీ తీర్థం పుచ్చుకున్నారు. వినోద్ సోదరుడు వివేక్ బీజేపీలో కీలక పాత్ర పోషిస్తుండటం గమనార్హం. కాంగ్రెస్ నుంచి టీఆర్‌ఎస్ పార్టీలో చేరిన ఈ సోదరులిద్దరికీ సరైన ఆదరణ లభించకపోవడంతో తిరిగి పార్టీ ఫిరాయించారు.

గత అసెంబ్లీ ఎన్నికల్లో చెన్నూరు నియోజకవర్గం నుంచి జి వినోద్ స్వతంత్ర్య అభ్యర్థిగా పోటీ చేసి ఓటమి పాలయ్యారు. టీఆర్‌ఎస్‌ నుంచి పోటీ చేయాలని భావించిన వినోద్‌.. టికెట్‌ దక్కకపోవడంతో ఇండిపెండెంట్‌గా బరిలోకి దిగారు. టీఆర్ఎస్ అధినేత కేసీఆర్ ఆ స్థానం నుంచి బాల్క సుమన్‌కు అవకాశం ఇచ్చారు. దీంతో వినోద్‌ తీవ్ర నిరాశ చెందారు. బాల్క సుమన్‌పై రెబల్‌గా పోటీ చేసి ఓటమి చవిచూశారు.

కాంగ్రెస్ పార్టీలో ఒకప్పుడు కీలకనేతగా వెలుగొందారు వెంకటస్వామి. కాంగ్రెస్ కు నమ్మినబంటుగా సుదీర్ఘకాలం కొనసాగారు. తండ్రి బాటలో కాంగ్రెస్ పార్టీలో రాజకీయ ప్రస్థానం మొదలు పెట్టిన అన్నదమ్ములు వినోద్, వివేక్.. తెలంగాణ రాష్ట్ర ఉద్యమం పతాక స్థాయికి చేరిన సమయంలో కాంగ్రెస్‌ ను వీడి.. తొలుత 2013లో టీఆర్‌ఎస్‌లో చేరారు. ఆ తర్వాత 2014 మార్చి 31న బ్రదర్స్‌ ఇద్దరూ తిరిగి కాంగ్రెస్‌లో చేరారు. కాంగ్రెస్‌ నుంచి పెద్దపల్లి ఎంపీ అభ్యర్థిగా వివేక్, చెన్నూరు అసెంబ్లీకి వినోద్‌ పోటీచేసి ఓడిపోయారు. అనంతరం రాజకీయ పునరేకీకరణ పేరుతో టీఆర్‌ఎస్‌ చేపట్టిన ఆపరేషన్‌లో 2016లో మరోసారి వీరిద్దరు టీఆర్‌ఎస్‌ తీర్థం పుచ్చుకున్నారు. వివేక్‌కు రాష్ట్ర ప్రభుత్వ సలహాదారు హోదా లభించింది. అయితే తెలంగాణ అసెంబ్లీ ఎన్నికలతో పాటు, సార్వత్రిక ఎన్నికల్లో కూడా సోదరులిద్దరికీ టిక్కెట్లు ఇవ్వకుండా టీఆర్‌ఎస్‌ మొండిచేయి చూపించింది. దీంతో వినోద్‌ ఒంటరిగా చెన్నూరు నుంచి పోటీ చేయగా.. వివేక్‌ ఎన్నికల అనంతరం బీజేపీలో చేరారు. ఇప్పుడు వినోద్‌ తిరిగి సొంతగూటికి చేరారు. తెలంగాణ మున్సిపల్ ఎన్నికలకు ముందు ఉమ్మడి కరీంనగర్ కాంగ్రెస్ శ్రేణులకు మంచి జోష్ ఇచ్చే పరిణామం ఇది. మాజీ పార్లమెంటు సభ్యుడు, వినోద్ సోదరుడు వివేక్ కూడా కాంగ్రెసులో పార్టీలో చేరుతారని ప్రచారం జరిగినా ఆయన బిజెపిలోనే కొనసాగుతున్నారు. దీంతో ఎప్పుడూ ఒకే పార్టీలో కొనసాగిన అన్నదమ్ములిద్దరు ఇప్పుడు వేరువేరు పార్టీల్లో పనిచేయడానికి సిద్దమయ్యారు. దీంతో వెంకటస్వామి కుటుంబుంలో విభేదాలు వచ్చినట్లు ప్రచారం జరుగుతోంది.

గతంలో కాంగ్రెస్‌ పార్టీని వీడటం అపరిపక్వ నిర్ణయని, కొన్ని పొరపాట్ల వల్ల పార్టీ మారాల్సి వచ్చిందని వినోద్ అన్నారు. తనకు 35 ఏళ్ల నుంచి కాంగ్రెస్ పార్టీతో అనుబంధం ఉందని, కాంగ్రెస్ తమ సొంత పార్టీ అని పేర్కొన్నారు. తన తండ్రి వెంకటస్వామి ప్రోత్సాహంతో రాజకీయాల్లోకి వచ్చానని వినోద్ చెప్పుకొచ్చారు. మొత్తం మీద అన్నదమ్ములిద్దరు వేర్వేరు దారుల్లో వెళ్లడం తెలంగాణలో చర్చనీయాంశమైంది.

దివంగత కాంగ్రెస్ నేత వెంకటస్వామిగా తన రాజకీయ జీవితం మొత్తం కాంగ్రెస్ పార్టీలోనే గడిపారు. అధికారంలో ఉన్నా, లేకపోయినా మరో వైపు చూడలేదు. కాంగ్రెస్ అధిష్టానానికి నమ్మకమైన నేతగా ఉన్నారు. అలాంటి గడ్డం వెంకటస్వామి మరణించిన తర్వాత ఆయన కుమారులు వేసే రాజకీయ తప్పటడుగులు వారి పొలిటికల్ లైఫ్ ను ఇబ్బంది పెట్టాయి. గడ్డం వెంకటస్వామి పెద్ద కుమారుడు వినోద్ గతంలో కాంగ్రెస్ లో ఉండగా మంత్రి పదవిని నిర్వహించారు. మరో కుమారుడు గడ్డం వివేక్ 2009 ఎన్నికలలో పెద్దపల్లి పార్లమెంటు నియోజకవర్గం నుంచి విజయం సాధించారు. పార్లమెంటు సభ్యుడిగా తెలంగాణ కోసం పోరాడారు. మొత్తానికి ఇంతకాలం కలిసి సాగిన అన్నదమ్ముల రాజకీయ ప్రయాణం ఇప్పుడు వేరు అయ్యింది.