కశ్మీర్‌లో నేతల గృహనిర్బంధం!

శ్రీనగర్: జమ్ము కశ్మీర్‌కు సంబంధించి నరేంద్ర మోదీ ప్రభుత్వం ఏదో చేయబోతోందన్న ఊహాగానాల మధ్య ఆ రాష్ట్రానికి చెందిన ముగ్గురు ముఖ్యమైన నాయకులను ఆదివారం పొద్దుపోయిన తర్వాత గృహనిర్బంధంలో ఉంచారు. మహబూబా ముఫ్తీ, ఒమర్ అబ్దుల్లా, సజ్జాద్ లోన్‌లను గృహనిర్బంధంలో ఉంచారు.

కశ్మీర్ లోయలో నెలకొన్న ఉద్రిక్తతల మధ్య రాష్ట్రంలో  చాలా ప్రాంతాలలో మొబైల్ ఫోన్ ఇంటర్నెట్ సర్వీసులను నిలిపివేశారు. ప్రధానమంత్రి నరేంద్ర మోదీ అధికారిక నివాసంలో ఈ రోజు ఉదయం 9.30 గంటలకు కేంద్ర మంత్రివర్గ సమావేశం జరగనుంది. ఈ సమావేశంలో కశ్మీర్ విషయంలో కీలకమైన నిర్ణయం తీసుకునే అవకాశం ఉందని భావిస్తున్నారు.

జమ్ము కశ్మీర్‌కు స్వతంత్ర ప్రతిపత్తి కల్పిస్తున్న ఆర్టికల్ 370,  కశ్మీర్‌లో శాశ్వత నివాసులకు ప్రత్యేకహక్కులు కల్పిస్తూ రాష్ట్రపతి ఉత్తర్వు ద్వారా రాజ్యాంగంలో చేర్చిన ఆర్టికల్ 35ఎ రద్దు దిశగా మోదీ ప్రభుత్వం పయనిస్తున్నదన్న మాట వినబడుతోంది. బిజెపి ప్రభుత్వం రాష్ట్రాన్ని విడదీసి జమ్ము, లద్దాఖ్, కశ్మీర్ రాష్ట్రాలుగా ఏర్పాటు చేయనున్నదనే మాట కూడా వినబడుతున్నది.

ఆదివారం కేంద్ర హోంమంత్రి అమిత్ షా జాతీయ భద్రతా సలహాదారు అజిత్ దోవల్, ఇంటలిజెన్స్ బ్యూరో చీఫ్ అరవింద్ కుమార్, రా చీఫ్ సామంత్ గోయల్, కేంద్ర హోంశాఖ కార్యదర్శి రాజీవ్ గౌబాలతో సమావేశమయ్యారు.

కేంద్రం ఏదో చేయబోతున్నదనేందుకు సంకేతాలు వెలువడుతున్న నేపధ్యంలో మెహాబూబా ముఫ్తీ నేతృత్వంలో ఆదివారం అఖిలపక్ష సమావేశం జరిగింది. జమ్ము కశ్మీర్ రాష్ట్రానికున్న ప్రత్యేక హోదాలో మార్పులు తీసుకువచ్చేందుకు ప్రయత్నిస్తే పర్యవసానాలు తీవ్రంగా ఉంటాయని కేంద్రాన్ని హెచ్చరిస్తూ ఆ సమావేశంలో ఒక  తీర్మానం చేశారు.

రాష్ట్రంలో భద్రతా ఏర్పాట్లు ముమ్మరం చేశారు. ఎక్కడికక్కడ బారికేడ్లు ఏర్పాటు చేస్తున్నారు. అదనపు బలగాల తరలింపుతో ప్రస్తుతం రాష్ట్రంలో 35 వేల మంది జవాన్లు ఉన్నారు. కీలకమైన కూడళ్లలో, ప్రధానమైన కార్యాలయాల వద్ద అదనపు బలగాలు మోహరించారు.