‘అసెంబ్లీ ఇష్టారాజ్యమైపోయింది’

అమరావతి: రాష్ట్రంలో వైసిపి ప్రభుత్వం వ్యవహరిస్తున్న తీరు దుర్మార్గంగా ఉందని టిడిపి అధినేత చంద్రబాబు అన్నారు. శుక్రవారం సాయంత్రం ఆయన మీడియాతో మాట్లాడుతూ అసెంబ్లీలో మాట్లాడేందుకు అవకాశం ఇవ్వడం లేదు, మైక్ ఇచ్చినా మధ్యలో కట్ చేస్తున్నారు అంటూ మండిపడ్డారు. సభా సాంప్రదాయాలు పాటించడం లేదని ఆయన అన్నారు. అసెంబ్లీ సమావేశాలు ప్రారంభమై 12రోజులు అయిపోయాయి, ఇంకా రెండు రోజులు మాత్రమే ఉన్నాయని చంద్రబాబు అన్నారు.

అధికారంలోకి వచ్చినప్పటి నుండి వైసిపి వారు దాడులు చేయడమే పనిగా పెట్టుకున్నారని చంద్రబాబు ఆరోపించారు. ఇప్పటి వరకూ రాష్ట్రంలోని వివిధ ప్రాంతాల్లో టిడిపి కార్యకర్తలపై 285 దాడులు జరిగాయనీ, 65 ఆస్తులు ధ్వంసంచేశారనీ, 11 భూకబ్జాలు చేశారనీ, 24చోట్ల కార్యకర్తలపై తప్పుడు కేసులు బనాయించారనీ, ఏడు హత్యలు జరిగాయని చంద్రబాబు ఆరోపించారు. పల్నాడు ప్రాంతంలోని పలు గ్రామాల్లో అయితే ఊళ్లోకి రావద్దని కూడా చెప్పారనీ, ఇంత దుర్మార్గంగా వ్యవహరిస్తున్నారని చంద్రబాబు పేర్కొన్నారు.

తెలుగుదేశం ప్రభుత్వ హయాంలో ఎక్కడ ఎలాంటి అవాంఛనీయ సంఘటనలు జరగకుండా చూశామని చంద్రబాబు అన్నారు. వైసిపి శ్రేణులు దౌర్జన్యాలు, దాడులు చేయడం ద్వారా సమాజంలో అభద్రతాభావం తీసుకువచ్చారని ఆయన ఆరోపించారు. రాష్ట్రంలో పోలీసులు ఇష్టమొచ్చినట్లు వ్యవహరిస్తున్నారని ఆయన అన్నారు. శాంతి భద్రతలను కాపాడాల్సిన బాధ్యత పోలీసులపై ఉందని చంద్రబాబు పేర్కొన్నారు. రాజకీయ నాయకులకే కాదు సామాన్య ప్రజలకు కూడా రక్షణ కల్పించాల్సిన బాధ్యత పోలీసులకు ఉందని అన్నారు. టిడిపి కార్యకర్తలకు అండగా ఉంటామనీ, ప్రజాస్వామ్యాన్ని కాపాడుతామని చంద్రబాబు స్పష్టం చేశారు. రాష్ట్రంలో నెలకొన్న పరిస్థితుల వల్ల పెట్టుబడులు పెట్టే వారు కూడా రావడం లేదని చంద్రబాబు అన్నారు. ప్రతి రోజు అత్యాచారాలు, దౌర్జన్యాలు పెరిగిపోయాయని చంద్రబాబు ఆవేదన వ్యక్తం చేశారు.

ధర్మవరంలో చేనేత కార్మికుడిని దారుణంగా హత్య చేశారని చంద్రబాబు అన్నారు. వైసిపి శ్రేణులు విచక్షణ కోల్పోయి ప్రవర్తిస్తున్నారనీ, చిన్న చిన్న ఉద్యోగులపైనా దాడులకు తెగబడుతున్నారని చంద్రబాబు ఆగ్రహం వ్యక్తం చేశారు. 70ఏళ్ల వయసున్న వారిపైనా అక్రమ కేసులు బనాయించారని చెప్పారు. ఎవరు తప్పు చేసినా పోలీసులు విచారణ జరిపి చర్యలు తీసుకోవాలని చంద్రబాబు కోరారు. వైసిపి శ్రేణుల దౌర్జన్యాలపై పోలీసులు చర్యలు తీసుకోవాలనీ,  లేదంటే చట్టం ముందు దోషులుగా నిలబడతారని చంద్రబాబు హెచ్చరించారు.