France Violence: ఆందోళనలతో అట్టుడికిపోతున్న ఫ్రాన్ .. పోలీసులతో ఘర్షణలు .. తీవ్ర రూపం దాల్చిన హింస

France Violence:  దేశ వ్యాప్తంగా అల్లర్లు, ఆందోళనలతో ఫ్రాన్స్ అట్టుడికిపోతోంది. భారీ ఎత్తున భద్రాతా బలగాలను మోహరించినప్పటికీ నిరసనకారులను అదుపు చేయడం కష్టంగా మారింది. 17 ఏళ్ల నహేల్ అనే యువకుడిని ట్రాఫిక్ తనిఖీల సమయంలో పోలీసులు కాల్చడం వల్ల దేశ వ్యాప్తంగా అల్లర్లు చెలరేగాయి. వరుసగా నాల్గో రోజు హింసాత్మక సంఘటనలు కొనసాగుతున్నాయి.  పోలీసులు, యువత మధ్య తీవ్ర స్థాయిలో ఘర్షణలు జరిగాయి. అల్లర్ల నేపథ్యంలో 875 మందికిపైగా నిరసనకారులను పోలీసులు అరెస్టు చేశారు. దాడుల్లో 200 మంది పోలీసులు గాయపడ్డారు. నహేల్ ను కాల్చి చంపిన నాన్ టెర్రేలో సాయుధ బలగాల వాహనాలను తగులబెట్టారు. ఈ హింస క్రమంగ బెల్జియం రాజధాని బ్రస్సెల్స్ వరకూ విస్తరించింది. అక్కడక్కడా నిరసనకారులను పోలీసులు అరెస్టు చేశారు. క్లిచి – సౌస్ – బోయిస్ లో సిటీ హాల్, అబర్ విల్లియర్స్ లో బస్ డిపోకు నిప్పు పెట్టారు. భద్రతా దళాలపై టపాసులు ప్రయోగించారు.

ట్వెల్త్ జిల్లాలో పోలీసు స్టేషన్ పై దాడి చేశారు. రివోలిస్ట్రీట్, లౌవ్రే మ్యూజియం, ప్యారిస్ అతిపెద్ద షాపింగ్ మాల్ ఫోరమ్ డెస్ హోలెస్ లో దుకాణాలను ఆందోళనకారులు లూటీ చేశారు. నిరసనకారులను అదుపు చేసేందుకు బాష్పవాయువు, జల ఫిరంగులు, స్టన్ గ్రనేడ్లను ప్రయోగించారు. 40వేల మంది పోలీసులను ప్రభుత్వం మోహరించింది. పట్టపగలే కొందరు తీవ్ర స్థాయిలో హింసను పాల్పడుతున్నారు. పారిస్ సహా అనేక ప్రాంతాల్లో దుకాణాలను లూటీ చేస్తున్నారు. శుక్రవారం స్ట్రాస్ బర్గ్ లోని యాపిల్ స్టోర్ లోపలకు నిరసనకారులు చొరబడి అక్కడి సామాగ్రిని దోచుకెళ్లారు. ఆందోళనకు సంబంధించిన వీడియోలు సోషల్ మీడియాలో వైరల్ అవుతున్నాయి.

ఈ ఆందోళనకు సోషల్ మీడియానే కారణమని అధ్యక్షుడు మాక్రాన్ ఆరోపిస్తూ.. అల్లర్లకు తమ పిల్లలు దూరంగా ఉండేలా తల్లిదండ్రులు చూసుకోవాలని కోరారు. అల్లర్లను అణచడానికి సోషల్ మీడియాపై ఆంక్షలను ప్రతిపాదించారు అధ్యక్షుడు మాక్రాన్. హింసాకాండకు ఆజ్యం పోయడంలో స్నాప్ చాట్, టిక్ టాక్ వంటి సామాజిక మాధ్యమాలు కీలకపాత్ర పోషించాయని ఆయన ఆరోపించారు. సమస్యాత్మక కంటెంట్ ను తొలగించడానికి నిబంధనలు రూపొందిస్తామని ఆయన తెలిపారు. అల్లర్లలో పాల్గొని అరెస్టు అయిన వారిలో మూడింట ఒకవంతు యువకులేనని అధ్యక్షుడు వెల్లడించారు. ఫ్రాన్స్ లో అత్యవసర స్థితితో పాటు శాంతి పునరుద్దరణకు చేపట్టాల్సిన అన్ని అంశాలను పరిశీలిస్తున్నట్లు ఫ్రెంచ్ ప్రధాని ఎలిజబెత్ బోర్న్ తెలిపారు.

ఫ్రాన్స్ లో ఇలా ట్రాఫిక్ తనిఖీల సమయంలో కాల్చిచంపడం కొత్తేమీ కాదని ఆందోళనలు చేస్తున్నారు. 2022 ఒక్క సంవత్సరంలోనే 13 మందిని తనిఖీల సమయంలో పోలీసులు కాల్చి చంపారని ఆందోళనకారులు పేర్కొంటున్నారు. ఈ ఏడాది నహెల్ అనే యువకుడిని కాల్చి చంపడానికి ముందు మరో ముగ్గురిని ఇలాగే కాల్చి చంపారని ఆందోళనకారులు ఆరోపించారు. వచ్చే సంవత్సరం ఒలింపిక్స్ జరగనున్న నేపథ్యంలో దేశ వ్యాప్తంగా జరుగుతున్న ఈ ఆందోళనలు ఆ దేశాన్ని కలవానికి గురి చేస్తున్నాయి.

అమరావతి భూస్కామ్ లో చంద్రబాబు, పొంగూరు నారాయణ లు ఇలా దొరికేశారు(గా)..!