కొత్తగా పొడిచిన పొత్తు కథ!

పొలిటికల్ మిర్రర్

జెండాలు కలిసి నడుస్తాయి. కానీ ఆంద్రప్రదేశ్‌లో ఎన్నికలకు చాలా ముందు దీర్ఘకాలిక లక్ష్యాలతో పొత్తు పొడిచింది. దీనిలో ఎవరి ఎజెండా వారిది. ఎవరి అవసరం వారిది. ఒకరికేమో అధికారం అండ కావాలి. మరొకరికి క్షేత్రంలో దండలు వేసే జనాలు కావాలి. ఇద్దరివీ వేర్వేరు అవసరాలు. మరి సుదీర్ఘ కాపురానికి సిద్ధమవుతున్న ఈ ఇరువురూ సవాళ్ళను ఎదుర్కోగలరా? క్షేత్రస్థాయిలో బలపడాలన్న బిజెపి లక్ష్యం నెరవేరుతుందా? రాజకీయంగా తన మార్కు చూపించాలానుకుంటున్న పవన్ ఆశ నెరవేరుతుందా? జగన్, చంద్రబాబుల పార్టీలకు ప్రత్యామ్నాయం చూపించాలన్న పాచిక పారుతుందా…?

పవన్ రాజకీయం అటూ… ఇటూ…!

గడిచిన ఎన్నికల్లో పవన్ కల్యాణ్ అనుకున్నది జరగక చతికిలపడ్డారు. తన అంచనల్లో కనీసం 10 శాతం కూడా చేరుకోలేకపోయారు. రాజకీయంగా దెబ్బతిన్నారు. అందుకే ఎన్నికల ఫలితాల తర్వాత పలు సందర్భాల్లో ‘నేను పోరాటం చేయడం చూసారు. ఇకపై రాజకీయం చేయడం చూస్తారు’ అంటూ చెప్పుకొచ్చారు. బలమైన అధికార పార్టీని ఢీ కొనాలంటే తనకు కూడా రాజకీయంగా అండదండలు ఉండాలని బిజెపితో దోస్తీకి దిగారు.

2014 ఎన్నికల్లో ఆయన బిజెపి, టిడిపితో పొత్తు పెట్టుకున్నా… కేవలం ప్రచారానికే పరిమితమయ్యారు. 2019 ఎన్నికల్లో నేరుగా రంగంలోకి దిగి మింగుడుపడని ఫలితాన్ని చవిచూశారు. 2014-2019 మధ్య అధికార పార్టీ అండలు ఉన్నా రాజకీయంగా పెద్దగా ఎదిగే ప్రయత్నం చేయలేదు.  తాను బలవంతుడినేనన్న భ్రమలో ఉన్నట్లున్నారు. దీనికి కారణం క్షేత్ర రాజకీయాలలో ప్రవేశం లేకపోవడం కావచ్చు. 2019లో నేరుగా దిగిన తర్వాత రాజకీయం లోతు తెలిసింది. ఇక తాను ఎదగాలంటే అధికారం అండ తప్పనిసరి అని గుర్తించి బిజెపి వైపు కదిలారు. ఇప్పుడు ఆయన లక్ష్యం కేవలం రాజకీయమే. తాను రాజకీయంగా ఎదగడం, క్షేత్రంలో తిరగడం, ఒంటరిగా సాధించలేనిది కేంద్రం అండతో అయినా వచ్చే ఎన్నికల నాటికి సాధించడం.

సామాజిక వర్గాల అండ లక్ష్యం!

బిజెపి కేంద్రంలో అధికారం ఉంది. ఇక్కడ నోరెత్తి అనర్గళంగా మాట్లాడగల నాయకులు ఉన్నారు. పేరుమోసిన నాయకులకు లోటే లేదు. కానీ బిజెపి పరిస్థితి రాష్ట్రంలో దారుణమే. “పేరుంది- నోరుంది. దండ వేసే అండే లేదు” అనే పరిస్థితి వారిది. నాయకులకు ప్రత్యేక కోటరీలు ఉన్నాయి తప్ప, క్షేత్రస్థాయిలో క్యాడర్ లేదు. అందుకే వారికి క్యాడర్ కావాలి. సామాజిక వర్గాల అండ ఉండాలి. సామాజికంగా అత్యంత చైతన్యం ఉన్న ఆంధ్ర రాష్ట్రంలో మూడు బలమైన సామాజిక వర్గాలున్నాయి. ఓ వర్గానికి చంద్రబాబునాయుడు, మరో వర్గానికి జగన్మోహన్ రెడ్డి హీరోలుగా వెలుగొందుతున్నారు. మిగిలిన మూడవ పక్షానికి కీలక కేంద్రంగా ఉండగలిగిన వారు కనిపించడం లేదు. వస్తూ పోతున్న వారే తప్ప దీర్ఘకాలం అండగా ఉండేవారు కరువయ్యారు. అందుకే వారికి ఆ లోటు తీర్చి, వారి అండతో పాగా వేయాలన్నది బిజెపి వ్యూహం. మూడో వర్గానికి తాము అండగా ఉంటే…, వారి అండతో అధికారానికి అర్హత పొందే వీలుందన్నది ఆ పార్టీ వ్యూహం కావచ్చు. ఆ దిశగానే ప్రయత్నాలు సాగుతున్నాయి. ప్రణాళికలు పడుతున్నాయి. దానిలో భాగమే పవన్‌ని కలుపుకోవడం.

అవసరాలు… ఆయుధాలుగా…!

అవసరాన్ని అవకాశంగా మార్చుకుని  ఆయుధంగా ప్రయోగించడమే రాజకీయం. ఇక్కడ ఈ రెండు పార్టీలు చేస్తున్నది అదే. పరస్పరం రాజకీయ అవసరాలు తీర్చుకునే దీర్ఘకాలికమైన ముందుచూపుతో కలిసి కాపురం చేయాలని నిర్ణయించుకున్నారు. ప్రభుత్వంపై పోరాటానికి ఆయుధాలు నూరుతున్నారు. రాజధాని అంశంపై ఇరు పార్టీల ఉమ్మడి కార్యక్రమం ఆరంభమవుతుంది. నిజానికి ఈ రెండు పార్టీల క్షేత్ర కలయిక కూడా పెద్దగా సమస్య కాబోదు. జనసేన ఆవిర్భావ ఎన్నికల్లోనే బిజెపితో కలిసి పనిచేసిన అనుభవం ఉంది. జనసేన కార్యకర్తలకు క్షేత్రస్థాయిలో వైసిపి లేదా టిడిపి కార్యకర్తలతో విభేదాలు ఉంటే ఉండొచ్చు కానీ కార్యకర్తలు బాగా తక్కువగా ఉన్న బిజెపితో క్షేత్రస్థాయిలో కలయిక ఇబ్బందేమి లేదు. అందుకే వీరి పొత్తుకు  ప్రస్తుతానికి చిక్కేమీ ఉండబోదు. కానీ రానున్న రోజుల్లో మరికొందరు నాయకులను బిజెపి తెరపైకి తీసుకువచ్చే వీలుందని ప్రచారం జరుగుతుంది. ఆ సామాజిక వర్గంలో కీలకమైన వంగవీటి రాధ, ముద్రగడ వంటివారిని తమతో కలుపుకోవాలని బిజెపి యోచిస్తోంది. వారి ప్రయత్నాలు ఫలిస్తే భవిష్యత్తులో కొన్ని ఫలితాలు ఆశించవచ్చు. అదే సందర్భంలో అనూహ్యమైన ఫలితాలు వచ్చినా రావచ్చు.

శ్రీనివాస్ మానెం