Atchannaidu : మే 2 తర్వాత.. టీడీపీలో అచ్చెన్న వీడియో రచ్చ ఉంటుందా? ఉండదా..?

Atchannaidu : అచ్చెన్నాయుడు Atchannaidu ఇటివల ఏపీ టీడీపీ అధ్యక్షుడు అచ్చెన్నాయుడు పార్టీపై చేసిన వ్యాఖ్యలు వైరల్ అయ్యాయి. దీంతో టీడీపీ, చంద్రబాబు, లోకేశ్ కూడా ఒకింత సైలెంట్ అయిపోయారు. నిజానికి ఏపీ టీడీపీలో అనేక లుకలుకలు ఉన్నాయని చెప్పాలి. ప్రకాశం జిల్లాలో 2024 సీఎం ఎన్టీఆర్.. అనే బ్యానర్, చంద్రబాబు కుప్పం పర్యటనలో.. ఎన్టీఆర్ ను పార్టీలోకి తీసుకురావాలనే నినాదాలు రావడం.. నాయకులు పార్టీని వీడటం.. పంచాయతీ, మున్సిపల్ ఎన్నికల్లో వైసీపీకి ప్రజలు నీరాజనం పట్టడం.. చంద్రబాబుకు మింగుడుపడనివే. వీటితోనే సతమతమవుతున్న అధినేతకు అచ్చెన్నాయుడు వ్యాఖ్యలు పుండు మీద కారం చల్లడమే.

అచ్చెన్నాయుడు అన్నట్టుగా వచ్చిన.. ‘మే 2 తర్వాత పార్టీ లేదు బొక్కా లేదు..’ అనే వీడియో పార్టీలో, రాజకీయ వర్గాల్లో తీవ్ర కలకలమే రేపింది. అయితే.. దీనిపై పార్టీ కౌంటర్ ఇచ్చింది. మరునాడే అచ్చెన్నాయుడు, లోకేశ్ కలిసున్న ఫొటోలు అనుకూల మీడియాల్లో కూడా హల్ చల్ చేశాయి. పార్టీలో, లకేశ్ తో అచ్చెన్నాయుడుకు కూడా ఎటువంటి అభిప్రాయబేధాలు లేవని. పార్టీ కూడా దీనిని పెద్దగా చూపే ప్రయత్నం చేయలేదు. కారణం.. ఎదురు తిరుపతి ఉప ఎన్నిక ఉండబట్టే అని చెప్పాలి. మున్సిపల్ ఎన్నికల సమయంలో విజయవాడ నాయకుల మధ్య ఉన్న బేధాభిప్రాయలు, గొడవలు రాష్ట్రవ్యాప్తంగా చర్చకు దారి తీశాయి. మనదే అనుకున్న విజయవాడలో కూడా టీడీపీకి ఆ ఎన్నికల్లో ఘోర అవమానమే మిగిలింది.

ఇప్పుడు తిరుపతి ఎన్నిక ముందు ఈ వీడియో పంచాయతీని పెద్దది చేసుకుంటే మళ్లీ నష్టమే. దీంతో ఆ వీడియో విషయాన్నే దాచే ప్రయత్నం చేశారు. యధావిధిగా సీఎం జగన్ పై విరుచుకుపడుతూ ప్రచారం చేశారు. అచ్చెన్నాయుడు కూడా చంద్రబాబును పొగడుతున్నారు. 40 ఏళ్ల రాజకీయ అనుభవం ఉన్న నాయకుడని, కొందరు ప్రధానులు, రాష్ట్రపతులు కావడంలో కీలకపాత్ర పోషించారని, చంద్రబాబును మళ్లీ సీఎంను చేసుకోవాలని.. ఇలా పాత ఉపోద్ఘాతమే ఇచ్చుకుంటున్నారు. మరి.. ఆ వీడియోలోని మాటలు చంద్రబాబు సీరియస్ గా తీసుకుంటారా? మే 2 తర్వాతే దాని గురించి ఆలోచిస్తారా? లేక అచ్చెన్న వ్యాఖ్యలు ఉత్తుత్తిదే అని కొట్టిపారేస్తారా? అనేది మే 2 తర్వాత తేలుతుందేమో.. చూడాలి.