బడ్జెట్ పై ఎవరేమన్నారంటే..

అమరావతి: కేంద్రం ప్రకటించిన బడ్జెట్ లో ఏపికి తీరని అన్యాయం జరిగిందని పలు రాజకీయ పార్టీలు పెదవి విరుస్తుండగా, ఇది అద్భుత బడ్జెట్ అంటూ ఏపి బిజెపి అధ్యక్షుడు కన్నా లక్ష్మీనారాయణ కితాబు ఇచ్చారు.

కన్నా లక్ష్మీనారాయణ:

మోదీ ప్రభుత్వం మరో అద్భుత బడ్జెట్ ప్రవేశపెట్టింది. నేటి బడ్జెట్‌తో త్వరితగతిన వ్యవసాయరంగం అభివృద్ధి సాధిస్తుంది. సంక్షేమం, అభివృద్ధి, మౌలిక సదుపాయాల కల్పనతో పాటు అన్ని రంగాల్లో వృద్ధితో భారత్‌ అయిదు ట్రిలియన్ డాలర్ల ఆర్థికవ్యవస్థకు చేరుతుంది.

రామకృష్ణ, సిపిఐ రాష్ట్ర కార్యదర్శి:

ఆంధ్రప్రదేశ్‌ను కేంద్రం మరోసారి మోసం చేసింది.  ఈసారి కూడా కేంద్ర బడ్జెట్ గతంలో మాదిరి అంకెల గారడీగా ఉంది. కేంద్ర బడ్జెట్లో ఆంధ్రప్రదేశ్‌కు గుండు సున్నా చూపించారు. రాష్ట్రానికి ప్రత్యేక హోదా, విభజన హామీల అమలు ప్రస్తావనే లేదు. ప్రభుత్వ రంగ సంస్థలను ప్రైవేటీకరించే దిశగా పావులు కదుపుతున్నారు.

యనమల రామకృష్ణుడు, టిడిపి నేత:

సీఎం జగన్ నిర్వాకాల వల్లే కేంద్ర బడ్జెట్‌లో ఏపీకి రిక్తహస్తం చూపారు. వైసీపీ అవినీతి, అసమర్థ నిర్ణయాలతో ఏపీకి తీరని నష్టం వాటిల్లింది. కేంద్ర నిధులు రాబట్టే సామర్థ్యం జగన్‌లో కొరవడింది.

కేశినేని నాని, టిడిపి ఎంపి:

బడ్జెట్ లో రాష్ట్రానికి ఒక్కరూపాయి కేటాయింపు లేదు. పోలవరానికి ఒక్క రూపాయిలేదు. ప్రత్యేక హోదా గురించి ప్రస్తావనలేదు. అధికారం లోకి రాగానే కేంద్ర మెడలు వంచి రాష్ట్రానికి అన్ని సాధిస్తానని జగన్ ప్రగల్భాలు పలికారు. ఇప్పుడు మీరు, మీ 22 మంది వైసీపీ ఎంపీలు సాధించింది ఏమిటో అర్థం అవటంలేదు.

బుగ్గన రాజేంద్రనాథ్ రెడ్డి, ఆర్ధిక మంత్రి

బడ్జెట్ లో  ఏపికి తీరని అన్యాయం జరిగింది. కేంద్రం నుండి రావాల్సిన పన్నుల వాటా కూడా రావడం లేదు.