అవును… ఫార్మా మార్కెట్ కి ప్రమాదమే…!

ఇండియా ఇప్పుడు ఒక మెట్టు దిగక తప్పదు. అది ఆ ట్రంప్ హెచ్చరిక నేపథ్యం కావచ్చు, వివిధ దేశాల ఒత్తిళ్లు కావచ్చు, కరోనా ప్రభావంతో మందుల సరఫరా తప్పనిసరి కావచ్చు… కారణం ఏదైనా మెట్టు దిగాలి, అవసరమైన దేశాలకు ఎంతో కొంత ఇవ్వాలి లేకపోతే ఇండియాలో ఫార్మా మార్కెట్ పై తప్పక ప్రభావం ఉంటుంది. అవసరానికి ఆదుకొని ఇండియా దగ్గర మనమెందుకు తీసుకోవాలి? అనే ఆలోచన మొదలై కొంత వ్యతిరేకత రావచ్చు, ఆ వ్యతిరేకతకు ట్రంప్ అనేవాడు నాయకత్వం వహించవచ్చు. ఇవన్నీ ఎందుకు ఇచ్చేస్తే పోలా? ఎంతో కొంత సర్దుబాటు చేస్తే పోలా? అదే మోడీ బుర్రలో తట్టిన ఆలోచన, అందుకే తాజాగా ఈరోజే కొన్ని దేశాలకు ఆ “హైడ్రాక్సీ క్లోరోక్విన్” సరఫరాకు ఓ నిర్ణయానికి వచ్చారు. మనకు సరిపడా ఉంచుకుని, మిగిలినవి అమెరికా, బ్రిటన్ సహా వివిధ దేశాలకు ఇవ్వాలని ప్రాధమికంగా నిర్ణయించుకున్నారు.

అదే దిక్కు… అందుకే ఇండియావైపు చూపు…!

కరోనాకు మందు లేదు. ఎప్పుడు కనిపెడతారో తెలియదు. హైడ్రాక్సీ క్లోరోక్విన్ కొంత పనిచేస్తుంది, కరోనా నివారణకు ఉపయోగించవచ్చని అమెరికా ఫార్మా శాస్త్రవేత్తలు నిర్ధారించారు, వెంటనే ట్రంప్ బహిరంగంగా ప్రకటించారు, ఇండియాకు ఆర్డర్ వేశారు. అది మొదలు బ్రిటన్, జర్మనీ వంటి మరో 30 దేశాలు ఆ మందుని పంపించాలి అంటూ ఆర్డర్లు పంపించాయి. నిజానికి కరోనా బాగా వ్యాపిస్తున్న తరుణంలో అంటే ఈ ఏడాది ఫిబ్రవరిలోనే ఇండియా హైడ్రాక్సీ క్లోరోక్విన్, పేరా సెటిమాల్, సిఫిక్సమ్ వంటి 24 రకాల మందులను ఇక ఎగుమతి చేయకూడదని నిర్ణయించుకుంది, ఆ ఎగుమతులపై నిషేధం విధించింది. ఇప్పుడు తప్పలేదు, ఆ నిషేధాన్ని కొంత ఎత్తివేయాల్సిన పరిస్థితి వచ్చింది. ప్రపంచానికి ఇండియా తలొగ్గాలి. అది మానవత్వం కోణంలో, ఫార్మా వ్యాపా కోణంలో, భావి అవసరాల కోణంలో ఏదైనా కావచ్చు, తలవంచక మాత్రం తప్పదు.

ఒకవేళ ఇవ్వకపోతే ఏం జరుగుతుంది…?

ఒకవేళ ఇండియా మొండిగా ఉండి, ఆ దేశాలకు హైడ్రోక్సి క్లోరోక్విన్ సహా అడిగిన మందులను పంపించకపోతే ఏమవుతుంది అనే అనుమానం రావచ్చు…! అది కొంత ఇబ్బంది కరమే.., ప్రస్తుతం ప్రపంచ ఫార్మా రంగంలో భరత్ ఇప్పుడిప్పుడే ఎదుగుతుంది. 2014 నుండి చూసుకుంటే 45 శాతం పెరుగుదల ఉంది. ముఖ్యంగా వాక్సిన్లు, బల్క్ డ్రగ్స్ (పేరా సెటిమాల్, మెట్ ఫార్మిన్, హైడ్రాక్సీ క్లోరోక్విన్ వంటి కీలక మందులను), సెర్జికల్స్, ఆయుష్ మందులు, హెర్బల్, జనరిక్ మందులను ఎగుమతి చేస్తుంది. ఏటా రూ. 33 బిలియన్ అమెరికన్ డాలర్ల విలువైన లావాదేవీలు జరుగుతున్నాయి. అమెరికా, బ్రిటన్, రష్యా, జర్మనీ, బ్రెజిల్ దేశాలకు ఎక్కువగా సరఫరా చేస్తుంది. కేవలం అమెరికాకు ఏటా రూ. 19 బిలియన్ డాలర్ల విలువైన మందులు పంపిస్తుంది. అలాగే పేరాసిటిమాల్, మెట్ ఫార్మిన్, అంఫిక్సిసిమ్ వంటి మందుల తయారీలో ఉపయోగించే ఉప ఉత్పత్తులను చైనా నుండి దిగుమతి చేసుకుంటుంది. మరికొన్నిటిని అమెరికా నుండి తెప్పిస్తుంది. ఇప్పుడు ఇండియా ఒక అడుగు ముందుకు వేసి ప్రపంచ దేశాలకు సాయం అందించకుంటే మన ఫార్మా రంగంలో ఎగుమతి, దిగుమతులపై కచ్చితంగా ప్రభావం ఉంటుంది. ఆ ట్రంప్ చిన్నపిల్లాడిలా హెచ్చరికలు పంపించినా, దానిలో సీరియస్ ఉంది, ఇతర దేశాలు కూడా ఆధారపడుతున్నాయి. అందుకే ఇది తప్పదు.