కేటీఆరే నెక్ట్స్ సీఎం.. కానీ!

(న్యూస్ ఆర్బిట్ డెస్క్)

తెలంగాణకు తదుపరి సీఎంగా కేటీఆర్ కాబోతున్నారా? తన కుమారుడిని సీఎంగా చూడాలని కేసీఆర్ కూడా ఆసక్తిగా ఉన్నారా? గత కొద్ది రోజులు వినిపిస్తున్న ప్రశ్నలు ఇవి. మున్సిపల్ ఎన్నికల ఫలితాల్లో టీఆర్ఎస్ ఘన విజయం సాధించింది. మిగతా పార్టీలకు అందనంత ఎత్తులో ఆ పార్టీ నిలిచింది. ఈ విజయం క్రెడిట్‌ టీఆర్ఎస్ వర్కింగ్ ప్రెసిడెంట్ కేటీఆర్ ఖాతాలోకి చేరింది. దీంతో కేటీఆర్‌ను త్వరలోనే సీఎం చేస్తారనే ప్రచారం ఊపందుకుంది. మున్సిపల్ ఎన్నికల ముందు నుంచే కేటీఆర్‌ను సీఎం చేస్తారనే ప్రచారం జరుగుతోంది. మరో రెండు మూడు నెలల్లో తనయుడికి సీఎం పగ్గాలు అప్పగించి.. కేసీఆర్ జాతీయ రాజకీయాల్లోకి వెళ్తారనే టాక్ వినిపిస్తోంది. మునిసిపల్ ఎన్నికల్లో ఘన విజయం అనంతరం కేసీఆర్ చేసిన సుదీర్ఘ ప్రసంగంలోని కొన్ని అంశాలను గమనిస్తే అవుననే అనిపిస్తోంది. పురపాలక ఎన్నికల్లో తాను ప్రచారం చేయకపోయినా, ముందుండి నడిపించినదని కేటీఆర్ అని గుర్తు చేసిన కేసీఆర్, విజయ సారధి అతనేనంటూ ఆశీస్సులు అందించారు.

“ఎవరు సీఎం కావాలి, ఎవరు కావొద్దనేది సమయ సందర్భాలను బట్టి నిర్ణయాలు ఉంటాయి తప్పితే.. ఎవరో కోరుకుంటే అవుతుంది. కోరుకోపోతే కాదనేది కాదు. విష్ ఫుల్ థింకింగ్‌లో మంత్రులు కేటీఆర్ సీఎం కావాలని కోరుకొని ఉండొచ్చు. రెండేళ్లయ్యింది హెల్త్ చెకప్‌ చేయించుకోక.. మొన్న జబ్బు పడ్డాను. జ్వరం రావడంతో హాస్పిటల్‌కు వెళ్లి చెకప్ చేయించుకున్నాను. 30-40 రకాల టెస్టులు చేశారు. ముందే సన్నగ ఉన్నరా బాబంటే 20-30 సీసాల రక్తం తీశారు. రిపోర్టులన్నీ చూసి నువ్వు దుక్కలా ఉన్నావ్.. జలుబు ఎక్కువైందన్నారు. ఈ కండీషన్లో నేనేం చేయాలి? నన్ను జబర్దస్తీగా రిటైర్ చేయిస్తారా ఏంది? ఇంత పెద్ద విప్లవం చేసినోణ్ని నేనేమైనా తప్పు పని చేశానా? నరేంద్ర మోదీ సీఎంగా ఉండి ప్రధాని కాలేదా?” అంటూ కేసీఆర్ సరదాగా ప్రశ్నించారు. తానే సీఎంగా కొనసాగుతానని శాసన సభలో కుండబద్దలు కొట్టినట్టు చెప్పిన విషయాన్ని గుర్తు చేశారు.

తాను వంద శాతం జాతీయ రాజకీయాల్లోకి వెళ్తానని కేసీఆర్ తెలిపారు. తాను చేతగానితనంతోని ఊరుకొని ఉంటే.. వంద శాతం తెలంగాణ వచ్చేది కాదన్నారు. ‘నాడు చంద్రబాబు ఎంత పవర్‌తో ఉండే.. నేను ఒక్కడినే బయల్దేరాను. లక్షల అవమానాలు, నిందలు భరించాను. ఇవాళ తెలంగాణ గౌరవంగా బతుకుతోంది’ అని కేసీఆర్ తెలిపారు. వచ్చే ఎన్నికల తర్వాత ఫెడరల్ ఫ్రంట్ అధికారంలోకి రాబోతోంది. బీజేపీ, కాంగ్రెస్ రెండూ దేశాన్ని పాలించడంలో విఫలమయ్యాయని కేసీఆర్ ఆరోపించారు. సీఏఏ చట్టాన్ని తెలంగాణ రాష్ట్రం వ్యతిరేకిస్తుందని, త్వరలోనే తాను సీఎంల సమావేశాన్ని నిర్వహించి, కలిసొచ్చే ప్రాంతీయ పార్టీలతో కలిసి కేంద్రం తీసుకుంటున్న ప్రజా వ్యతిరేక నిర్ణయాలను అడ్డుకునేందుకు పోరాడతానని అన్నారు. దేశ భవిష్యత్తు కోసం జాతీయ రాజకీయాల్లోకి వెళ్లే ఆలోచనలో ఉన్నట్టు కూడా పేర్కొన్నారు.

2019 ఎన్నికల ముందు ఫెడరల్ ఫ్రంట్‌ను తెర మీదకు తీసుకొచ్చిన కేసీఆర్.. తాను జాతీయ రాజకీయాల్లో చక్రం తిప్పాలని, కేటీఆర్‌ను సీఎం చేయాలని భావించారు. కానీ అప్పుడు బీజేపీ ప్రభంజనం కారణంగా అది సాధ్యం కాలేదు. అయితే, కేసీఆర్ ప్రస్తుతం సరైన టైం కోసం ఎదురు చూస్తున్నారు. బీజేపీ గ్రాఫ్ రోజు రోజుకీ పడిపోతుందని భావిస్తోన్న కేసీఆర్.. ఆ పార్టీకి వ్యతిరేకంగా అందర్నీ కలుపుకొని పోరాటం చేయాలని భావిస్తున్నారు. సీఏఏ, ఎన్ఆర్సీ లాంటి నిర్ణయాలను పలు రాష్ట్రాలు వ్యతిరేకిస్తున్నాయి. దీంతో ఆయా రాష్ట్రలతో చేతులు కలపాలని కేసీఆర్ నిర్ణయించినట్లు తెలుస్తోంది. మోదీ సర్కారుకు ఫెడరల్ ఫ్రంట్‌ మాత్రమే ప్రత్యామ్నాయం అనే భావన ప్రజల్లో తీసుకొచ్చేందుకు ఆయన కార్యచరణ రూపొందిస్తున్నారు. జాతీయ స్థాయిలో ఫెడరల్ ఫ్రంట్‌కు అవకాశం ఉందన్న నమ్మకం బలపడ్డాక.. కేటీఆర్‌కు సీఎం పీఠాన్ని అప్పగించి.. కేసీఆర్ పూర్తిగా జాతీయ స్థాయి రాజకీయాల్లో వెళ్తారని రాజకీయ విశ్లేషకులు అంటున్నారు. మొత్తం మీద టీఆర్ఎస్ ఘన విజయం క్రెడిట్ మొత్తం కేటీఆర్ ఖాతాలోకి వెళ్లిపోవడంతో ఆయనే కాబోయే సీఎం అని టీఆర్ఎస్ వర్గాలు అంటున్నాయి.