ఇదేమి కేసు.. ‘సిల్లీ’

(న్యూస్ ఆర్బిట్ డెస్క్)

టివి 9 మాజీ సిఇఒ రవిప్రకాష్, సినీనటుడు శివాజీలపై పోలీసులు లుక్ అవుట్ నోటీసులు జారీ చేశారు.

నూతన యాజమాన్యానికి టివి 9 చేజిక్కకుండా ఉండేందుకు దొంగపత్రాలు సృష్టించారని రవిప్రకాష్‌తో పాటు శివాజీ ఆరోపణలు ఎదుర్కొంటున్నారు. ఈ నేపథ్యంలో చిన్న కేసును పురస్కరించుకొని మీడియా ఛానల్స్ అనవసరంగా రాధాంతం చేస్తున్నాయంటూ  శనివారం శివాజీ ఒక వీడియో రిలీజ్ చేశారు.

దొంగ ఒప్పందాలు చేసుకున్నారని టివి 9 నూతన యాజమాన్యం ఆరోపిస్తుండగా అవి తనకు రవి ప్రకాష్‌కు మధ్య జరిగిన నిజమైన ఒప్పందాలేనని శివాజీ పేర్కొంటున్నారు.

తనపై పెట్టింది పెద్ద కేసేమీ కాదనీ, ఇంత చిన్న కేసుకు తాను విదేశాలకు పారిపోవాల్సిన అవసరం కూడా లేదని శివాజీ అన్నారు.

పదేళ్లుగా రవిప్రకాష్‌తో ఉన్న స్నేహాన్ని దూరం చేసుకోవడం ఇష్టం లేక ఒప్పందాన్ని కోర్టులో పరిష్కరించుకుందామని ప్రయత్నిస్తుంటే ఇష్టం వచ్చినట్లు ప్రచారం చేస్తున్నారని శివాజీ మండిపడ్డారు.

‘మీ దగ్గర డబ్బులుంటే మీడియాతో మీరు ఏమైనా చేసుకోండి, అది మీ ఇష్టం. కానీ ఒక వ్యక్తిని టార్గెట్ చేసి తొక్కెయ్యాలని ప్రయత్నించడం కుదరని పని. ఏంటి మీరు తొక్కేది? నెహ్రూ గారు తన జీవితంలో దాదాపు తొమ్మిది నెల పాటు జైలులోనే ఉన్నారు. నేనిప్పుడు జైలుకు వెళితే పోలీసులు ఏమైనా మర్డర్ చేస్తారా ?, జై ఆంధ్రా ఉద్యమంలో ఎంత మంది జైలుకు వెళ్లలేదు? ఇప్పడు మీరు విషయం అర్థం చేసుకోవాలి. ఇది నాకు, రవిప్రకాష్‌కు మద్య ఉన్న వ్యవహారం. పైగా కోర్టులో ఉంది. ఇద్దరం స్నేహపూర్వక వాతావరణంలో చేసుకున్న ఒప్పందం ఇది. ఇదో సిల్లీ కేసు’ అంటూ శివాజీ వ్యాఖ్యానించారు.

‘ఎలాంటి మ్యాటర్ లేని ఈ కేసులో ట్విట్టర్ వేదికగా, టివీల వేదికగా శునకానందం పొందుతున్న సోదరులందరికీ చెప్పేదొక్కటే, ఇప్పుడు మీరు రాళ్లు వేస్తున్నారు. ఇక్కడ ఉన్నది ఒక కొండ. ఇలాంటి రాళ్లకు భయపడదు. కానీ మీరు ఉన్న గాజు గదులు మీరు విసిరే రాయి దెబ్బకు పగిలిపోతాయి. ముందు ఆ విషయం చుసుకోండి. రాజ్యాంగం ఇచ్చిన హక్కులను అనుసరించి నేను ముందుకు వెళుతున్నాను. దేనికీ ఇబ్బంది పడను’ అంటూ శివాజీ తనదైన శైలిలో వ్యాఖ్యానించారు.

రేపు ఎన్నికల ఫలితాల తర్వాత ప్రజలు అనుకోని ప్రభుత్వం వచ్చినా పోరాడేందుకు తాను సిద్ధం అంటూ శివాజీ పేర్కొన్నారు.