AP High Court: వాలంటీర్ల రాజీనామాలపై ఏపీ హైకోర్టు కీలక ఆదేశాలు

AP High Court: ఆంధ్రప్రదేశ్ లో ఎన్నికలు ముగిసే వరకూ వాలంటీర్ల రాజీనామాలను ఆమోదించకుండా ప్రభుత్వ ప్రధాన కార్యదర్శి, పురపాలక శాఖ కమిషనర్, గ్రామ సచివాలయ ముఖ్య కార్యదర్శులను ఆదేశించాలని కోరుతూ భారత చైతన్య యువజన పార్టీ (బీసీవై) అధినేత రామచంద్ర యాదవ్ దాఖలు చేసిన పిటిషన్ పై ఇవేళ హైకోర్టులో విచారణ జరిగింది.

ఎన్నికల సంఘం నిబంధనల మేరకు వాలంటీర్లు రాజకీయ పార్టీల ఎన్నికల ప్రచారాల్లో పాల్గొనడం గానీ, అభ్యర్ధులకు ఎన్నికల ఎజెంట్ లుగా గానీ ఉండకూడదు. అయితే రాష్ట్రంలో వేలాది మంది వాలంటీర్లు అధికార వైసీపీ అభ్యర్ధుల ఎన్నికల ప్రచారాల్లో పాల్గొంటున్నారు. దీంతో అలా పాల్గొంటున్న వాలంటీర్లను అధికారులు సస్పెండ్ కూడా చేశారు.

దీంతో వాలంటీర్లు వేలాది మంది స్వచ్చందంగా రాజీనామాలు చేశారు. ఆ తర్వాత యదేశ్చగా పార్టీ నేతలతో కలిసి ఎన్నికల ప్రచార కార్యక్రమాల్లో పాల్గొంటున్నారు. చాలా జిల్లాల్లో అధికార వైసీపీ నేతలతో కలిసి ఎన్నికల ప్రచారాల్లో పాల్గొంటుండగా, నెల్లూరు జిల్లాలో మాత్రం వంద మందికిపైగా వాలంటీర్లు రాజీనామా చేసి టీడీపీలో చేరారు.

రాజీనామా చేసిన వాలంటీర్లను ఎన్నికల ఎజంట్ లుగా కూడా నియమించుకోవాలని పార్టీ నేతలు యోచన చేస్తున్నారు. గత నాలుగున్నరేళ్లుగా  లబ్దిదారుల కుటుంబాలకు ప్రభుత్వ సేవలు అందించిన వాలంటీర్లు ఎన్నికల్లో ఓటర్లను ప్రభావితం చేసే అవకాశం ఉండటంతో విపక్షాలు ఆందోళన చెందుతున్నాయి.

ఈ తరుణంలో బీసీ యువజన పార్టీ అధినేత రామచంద్ర యాదవ్ ఈ అంశంపై హైకోర్టును ఆశ్రయించారు. రామచంద్ర యాదవ్ తరపున సీనియర్ న్యాయవాది ఉమేష్ చంద్ర వాదనలు వినిపించారు. వాలంటీర్లు అధికార పార్టీకి అనుకూలంగా ప్రచారం చేస్తున్నారని ఈసీ ఇప్పటికే నిర్ధారించిందన్నారు. ఈ దశలో వారి రాజీనామాలు అంగీకరిస్తే ఆ పార్టీకి లబ్ది చేకూరుతుందని తెలిపారు.

వాలంటీర్లు ఎన్నికల్లో ప్రభావం చూపే అవకాశం ఉందని, 50 ఇళ్లకు ఒక వాలంటీర్ కాబట్టి వారి ప్రభావం ఉండనుందని, వారి రాజీనామాలు ఆమోదించకుండా ఆదేశాలు ఇవ్వాలని కోరారు. పిటిషనర్ తరపున వాదనలు విన్న హైకోర్టు.. ఇప్పటి వరకూ ఎంత మంది వాలంటీర్లు రాజీనామా చేశారో వివరాలు ఇవ్వాలని కోరింది. తదుపరి విచారణను రేపటికి వాయిదా వేసింది.

Pawan Kalyan: ఏపీలో కూటమి ప్రభుత్వం ఏర్పాటు కాబోతుంది – పవన్ కళ్యాణ్ ..అట్టహాసంగా నామినేషన్ దాఖలు