గన్నవరంలో వంశీ భలే స్కెచ్… జగన్ సై అంటే చాలు…!

వల్లభనేని వంశీ సూపర్ ప్లాన్ వేశారు. తన మేడలో పూర్తిగా వైసీపీ కండువా వేసుకోడానికి విప్.., తప్పు లాంటి ఆటంకాలు రాకుండా స్కెచ్ గీశారు. టీడీపీ గాలి పూర్తిగా తీసేసి తన ప్రతిష్ట నిలుపుకోడానికి పెద్ద ప్లాన్ వేశారు. జగన్ సై అంటే ఇక అమలు చేసేయడమే. నేరుగా రంగంలోకి దూకడమే. ఆ ఆసక్తికర ప్లాన్ ఏంటి..? వంశీ ఏం చేయనున్నారు..? అనేది చూద్దాం..!!

ఆ ప్లాన్ చెప్పుకోడానికి చాల సింపుల్ : రాజీనామా చేసి మళ్ళీ ఎన్నికలకు వెళ్లడమే..! కానీ దీనిలో ఉద్దేశాలు, ప్రణాళికలు, గెలుపు వ్యూహాలు తెలుసుకుంటేనే సిసలైన మజా ఉంటుంది. అదేమిటంటే.
* ఎమ్మెల్యే పదవికి వంశీ రాజీనామా చేస్తారు. స్పీకర్ ఆమోదిస్తారు. ఎన్నికల కమీషన్ ఆరునెలల్లోగా ఉప ఎన్నికలు నిర్వహిస్తుంది. దీనిలో వైసీపీ తరపున వంశీ పోటీ చేస్తారు. గెలిస్తే ఇక తిరుగులేదు. తాను పూర్తికాలం ఈ నాలుగేళ్లు వైసీపీ మొనగాడిగా కొనసాగవచ్చు. “ఆ పార్టీపై గెలిచారు, ఈ పార్టీ మారారు, పార్టీ కండువా కూడా వేసుకోకుండా దొంగచాటుగా ఉంటున్నారు…, ద్రోహం చేసారు. మోసం చేసారు” అనే ఆరోపణలు, విమర్శలకు సమాధానం ఇదేనని ఆయన వ్యూహం. అప్పుడు నాలుగేళ్లు ఇక ఆ నియోజకవర్గంలో టీడీపీ సైలెంట్ అవుతుంది. వంశీకి పూర్తి స్వేచ్ఛ ఉంటుంది. ఒకవేళ ఓడితే సైలెంట్ అయిపోతారు, రాజకీయాలకు స్వస్తి చెప్పేస్తారు.

గెలుపు వ్యూహాలు కీలకమే…!

గన్నవరం ఒక సామజిక వర్గం ప్రభావం ఉన్న నియోజకవర్గం. వంశీ దానికే ప్రాతినిధ్యం వహిస్తున్నారు. అక్కడ వైసీపీ గుర్తుతో, జగన్ బ్రాండ్ తో, వంశీ ఛరిష్మాలతో గెలవాలి అంటే కచ్చితమైన వ్యూహం, ప్రణాళిక ఉండాలి. అది వంశీ రెడీ చేసుకున్నారు. 1 . వైసీపీ నుండి తనకు పూర్తి మద్దతు ఉండేలా యార్లగడ్డ వర్గం మొత్తంతో మాట్లాడుకున్నారు. 2 . టీడీపీలో తనకి బాగా సన్నిహితంగా మండలాల స్థాయిలో పట్టున్న నాయకులను దారిలో పెట్టుకున్నారు. అన్నిటికీ మించి గన్నవరంలో తనకున్న అర్ధ, అంగబలంతో పాటూ అధికారం తోడుతుంది. సో.., గెలుపు నల్లేరుపై నడకేనని వంశీ అనుకుంటున్నారు. అందుకే అంతా ఒకే అనుకుంటే రెండు, మూడు రోజుల్లోనే జగన్ ని కలిసి తన వ్యూహం చెప్పి, పోటీకి సపోర్ట్ తీసుకునే అవకాశం ఉంది అంటూ గన్నవరంలో వినిపిస్తుంది. జగన్ కూడా దీనికి ఏ మాత్రం అడ్డు చెప్పే అవకాశం లేదు. తన పార్టీ గుర్తుతో గెలిస్తే తాను ముందు నుండి చెప్తున్నది అదే కాబట్టి అభ్యంతరం పెట్టకపోవచ్చు.

టీడీపీ ఏం చేస్తుంది…??

ఒకవేళ వంశీ రాజీనామా చేస్తే ఉప ఎన్నికలు కచ్చితంగా వస్తాయి. గన్నవరం నియోజకవర్గం టీడీపీకి కంచుకోట. 2009 లో దాసరి బాలవర్ధనరావు.., 2014 , 2019 లో వంశీ వరుసగా టీడీపీ నుండి గెలిచారు. పార్టీ గాలి రాష్ట్రం మొత్తం వేయకపోయినా గన్నవరంలో మాత్రం టీడీపీ బాగానే నెట్టుకొస్తోంది. అందుకు కారణం క్షేత్రస్థాయిలో బలమైన కార్యకర్తలు ఉండడమే. ఇప్పుడు వంశీ రాజీనామా చేస్తే టీడీపీ దీటైన అభ్యర్థిని రంగంలోకి దించుతుంది. ఇప్పటికే ఆ పార్టీ అక్కడ పోటీలోకి దించేందుకు రకరకాల వ్యూహాలను కూడా సిద్ధం చేస్తుంది. లోకేష్ ని పోటీలోకి దించాలని, లేదా పక్కనే దెందులూరులో ఓడిపోయినా గన్నవరంలోనూ మంచి పట్టున్న చింతమనేని ప్రభాకర్ ని తీసుకురావాలని…, దేవినేని ఉమాని పోటీలోకి దించాలని… ఇలా అనేక ప్రతిపాదనలు వేసుకుంటుంది. సో… ఉప ఎన్నిక వస్తే గన్నవరంలో పోటీ మాత్రం భలే రసవత్తరంగా మారుతుంది.