Teenmar Mallanna : మల్లన్న పోరాటం యువతకు ఒక పెద్ద పాఠం!

Teenmar Mallanna : ఒక సామాన్యుడు తెగించి రాజ్యం మీద తిరుగుబాటు చేస్తే, దానికి సాంకేతికతను ఉపయోగించుకుని ఎలా ముందుకు వెళ్లవచ్చు అన్నదే చింతపండు నవీన్ తీన్మార్ మల్లన్న విషయం లో అర్థమవుతుంది. ఖమ్మం నల్గొండ వరంగల్ పట్టభద్రుల స్థానం నుంచి పోటీ చేసిన తీన్మార్ మల్లన్న ఎలాంటి ప్రచారం లేకుండా కేవలం తన స్వశక్తి నమ్మి ఎన్నికల్లో దూసుకు వెళ్లారు. ఏకంగా అధికార పార్టీ అభ్యర్థికి చెమటలు పట్టించే వరకూ వెళ్లిన మల్లన్న చివరిగా ఓడిపోయినా… ప్రజల మనసులు మాత్రం గెలవగలిగారు.

యాదాద్రి భువనగిరి జిల్లా తుర్కపల్లి మండలం మాదాపూర్‌ గ్రామానికి చెందిన రైతు కుటుంబం నుంచి వచ్చిన మల్లన్న ఇప్పటికే రెండు సార్లు ఎన్నికల్లో పోటీచేశారు. ఇదే పట్టభద్రుల నియోజకవర్గం నుంచి గత ఎన్నికల్లో కాంగ్రెస్‌ అభ్యర్థిగా పోటీచేసి దాదాపు పదివేల ఓట్లు పొందారు.2019లో హుజూర్‌నగర్‌ ఉప ఎన్నికలోనూ స్వతంత్ర అభ్యర్థిగా పోటీ చేసి ఓడిపోయారు. గత నాలుగు నెలల నుంచి ఉమ్మడి నల్గొండ, వరంగల్‌, ఖమ్మం జిల్లాల్లో పాదయాత్ర నిర్వహించి ప్రజల్లోకి వెళ్లారు. స్థానిక సమస్యలపై ప్రభుత్వాన్ని నిలదీసేవిధంగా ప్రజలను చైతన్యవంతం చేశారు. సుదీర్ఘంగా సాగిన పాదయాత్ర ద్వారా ప్రజల్లోకి వెళ్లడంతో ఆయనపై కొంత సానుభూతి పెరిగింది.

ఎన్నికల సరళిని పరిశీలిస్తే చాలా వరకు ప్రధాన పార్టీల అభ్యర్థులకు మొదటి ప్రాధాన్య ఓట్లు వేసిన వారిలో ఎక్కువమంది మల్లన్నకు ద్వితీయ ప్రాధాన్య ఓట్లు వేసినట్లు తెలుస్తోంది. ప్రధానంగా ఆలేరు, భువనగిరి, నల్గొండ, జనగాం, వరంగల్‌, ఖమ్మం, భద్రాద్రి కొత్తగూడెం ప్రాంతాల్లో ఆయనకు భారీగా ఓట్లు పడ్డాయని తెలిసింది. ప్రజలు తమ సమస్యలు పరిష్కరించే వ్యక్తిగా గుర్తించి తనకు ఓట్లు వేశారని తీన్మార్‌ మల్లన్న అన్నారు. వారందరికీ ఆయన కృతజ్ఞతలు తెలిపారు. ప్రజల కోసం ఇప్పటివరకు తాను చేసింది తక్కువేనని, ఇంకా చేయాల్సింది ఎంతో ఉందని ఆయన అన్నారు.

సుమారు 96 మంది అభ్యర్థులు పోటీపడినా పట్టభద్రుల నియోజకవర్గం నుంచి తీన్మార్ మల్లన్న జాతీయ పార్టీల అభ్యర్థులను పక్కకునెట్టి టిఆర్ఎస్ అభ్యర్థి పల్లా రాజేశ్వర్ రెడ్డి కి పూర్తి పోటీ ఇవ్వగలిగారు. ఒక దశలో మల్లన్న గెలుస్తారు అన్న నమ్మకం కూడా ఏర్పడింది. అయితే ఎక్కువ మంది పట్టభద్రులు మల్లన్నకు ద్వితీయ ప్రాధాన్యత ఓటుకు మొగ్గు చూపడంతో మల్లన్న అనూహ్యంగా వెనుకబడ్డారు. మహామహుల అందరూ ఒక్కొక్కరుగా ఎలిమినేట్ అవుతున్నారు మల్లన్న మాత్రం తన ఓట్ల తో ముందుకు దూసుకు వెళతారు తప్ప ఎక్కడ వెనక్కి తిరిగి చూసుకోలేదు. మూడు రోజుల పాటు సాగిన ఓట్ల లెక్కింపులో ప్రతిరోజు మల్లన్న పేరు మార్మోగిపోయింది. చివరకు చాలా స్వల్ప మెజారిటీతో పల్లా రాజేశ్వర్ రెడ్డి గెలవగా ప్రజల హృదయాలను మాత్రం మల్లన్న గెలుచుకో గలిగారు.

ప్రజాస్వామ్య దేశంలో ఏదైనా సాధ్యమే. అందులోనూ ప్రస్తుతం యువత రంగంలో వస్తున్న మార్పులను గమనించి ముందుకు వెళితే రాజకీయాల్లో రాణించడం పెద్ద కష్టమేమీ కాదు. ఎప్పటికప్పుడు ప్రభుత్వ విధానాలను తప్పయితే తప్పు అని పైకి ఒప్పు అని నిర్భయంగా చెప్పగలిగేవారు కావాలి. ప్రస్తుతం మీడియా అంతా పలు రాజకీయ పార్టీలకు వేదిక కావడం తో ప్రజలు దేనిని నమ్మే పరిస్థితి లేదు. ఇలాంటి సమయంలో మల్లన్న ల యువకులు ఆయన మార్గదర్శకంలో… నిజాలను నిర్భయంగా ప్రజల ముందుకు తీసుకు వచ్చి వారి తరఫున పోరాటం చేయగలిగే సత్తా ఉంటే కచ్చితంగా ప్రజాస్వామ్యంలో కొత్త మలుపు తిరిగినట్లే..