TSRTC: ‘బస్ డ్రైవర్ పై రైతు ఆరోపణలు అవాస్తవం..’ అసలు విషయం ఇదీ..!

TSRTC: ఇటివల తెలంగాణ ఆర్టీసీ డ్రైవర్ ఒక బొప్పాయి పండ్ల రైతు నుంచి బొప్పాయి పండ్లు ఉచితంగా ఆశించి.. రైతు తిరస్కరించడంతో బస్సు ఎక్కించుకోలేదని.. కోపంతో రైతు ఆ బస్సును కదలనీయకుండా బస్సు ఎదుట కూర్చుని నిరసన తెలిపాడనే వార్త సంచలనం రేపింది. దీంతో ఆర్టీసీపై, ఉద్యోగులపై ప్రజల నుంచి విమర్శలు వ్యక్తమయ్యాయి. సహజంగానే పత్రికల్లో వచ్చే వార్త.. ఒక్కోసారి ఫొటో కూడా వార్త ఇంటెన్సిటీని తెలియజేస్తుంది. ఈ వార్తలో కూడా ఫొటో అంతటి తీవ్రతనే వ్యక్తం చేసింది. ఇందులో నిజమే ఉందని భావించారు. కానీ.. సంఘటనపై టీఎస్ఆర్టీసీ జరిపిన విచారణలో అసలు విషయం బయటకొచ్చింది.

డ్రైవర్ పై వచ్చిన ఆరోపణ..

తెలంగాణలోని నాగర్ కర్నూల్ జిల్లాలోని పెద్దకొత్తపల్లి మండలంలోని మారుమూల గ్రామం మారేడు మాన్ దిన్నె గ్రామం నల్లమల అటవీ ప్రాంతంలో ఉంది. ఈ గ్రామానికి రోజూ అచ్చంపేట డిపో  నుంచి ఒకటే బస్సు సర్వీసు నడుస్తుంది. గ్రామానికి చెందిన గోపయ్య అనే రైతు తన పొలంలో పండించే బొప్పాయి పండ్లను నిత్యం సమీపంలోని కొల్లాపూర్ పట్టణానికి ఇదే బస్సులో తీసుకెళ్లి అమ్మి జీవనం కొనసాగిస్తున్నాడు. ఈక్రమంలోనే గత శుక్రవారం బొప్పాయిని బస్సులో తీసుకెళ్లేందుకు సిద్ధమయ్యాడు. అయితే.. ఆర్టీసీ డ్రైవర్ ఉచితంగా పండ్లు ఆశించాడని.. రైతు తిరస్కరించడంతో బస్సు ఎక్కించుకోకుండా వెళ్లిపోయాడని.. తీవ్ర ఆవేదనకు గురైన రైతు బస్సు కొల్లాపూర్ నుంచి తిరిగి వచ్చే సమయంలో రోడ్డుపై బొప్పాయి పండ్ల బుట్టలు అడ్డుపెట్టి గంటసేపు నిరసన వ్యక్తం చేశాడనే వార్త ఫోటోతో వైరల్ అయింది.

జరిగిన వాస్తవం ఇదీ..

దీంతో సంస్థ చేపట్టిన విచారణలో డ్రైవర్ తప్పేమీ లేదని తేలింది. అచ్చంపేట డిపో మేనేజర్ మాటల్లో.. ‘ఆరోజు రైతు పండ్ల బుట్టలతో తాను బస్ ఎక్కుండా.. బుట్టలను మాత్రమే ఎక్కిస్తూ.. తనకు రావడం కుదరదని.. కొల్లాపూర్ లో తనవాళ్లు దించుకుంటారని చెప్పాడు. అందుకు బస్ సిబ్బంది ఒప్పుకోలేదు. సరుకుతోపాటు వ్యక్తి వస్తేనే తాము అనుమతించాలి.. లేదంటే కార్గో ద్వారానే రవాణా చేయాలని చెప్పారు. దీంతో గోపయ్య కావాలనే బుట్టలు అడ్డుపెట్టి లోకల్ గా డ్రైవర్ పై నిందలు వేసి ప్రచారం చేశాడు. డ్రైవర్ బొప్పాయి పండ్లు ఆశించడం.. రైతు తిరస్కరించి బస్సు ఎక్కంచుకోకపోవడం అవాస్తవం’ అని తెలిపారు. రైతు చేసిన పనికి సంస్థపై విమర్శలు రావడం బాధాకరమే..!