పెద్ద త‌ల‌నొప్పి త‌ప్పించుకున్న ‌జగ‌‌న్‌… కానీ తేడా వ‌స్తుందా?

ఏపీ రాజ‌కీయాల్లో కీల‌క ప‌రిణామం చోటు చేసుకుంది. ముఖ్య‌మంత్రి వైఎస్ జ‌గ‌న్ మోహ‌న్ రెడ్డి పెద్ద వివాదానికి తెర ‌దించేశారు.

దీర్ఘ‌కాలంగా జ‌రుగుతున్న ర‌చ్చ‌కు చెక్ పెట్టారు. ఆంధ్రప్రదేశ్‌లో సెగలు పుట్టిస్తున్న గ‌న్న‌వ‌రం రాజకీయ రగడను స్వయంగా రంగంలోకి దిగి వైసీపీ అధినేత‌, సీఎం జగన్ ప‌రిష్క‌రించారు.

గ‌న్న‌వ‌రంలో గ‌రంగ‌రం

తెలుగుదేశం పార్టీలో ఎమ్మెల్యేగా గెలిచిన వల్ల‌భ‌నేని వంశీ అనంత‌రం వైసీపీలో చేరిన సంగ‌తి తెలిసిందే. అయితే, ఈ నిర్ణ‌యం ప‌ట్ల వైసీపీలో ఉన్న కొంద‌రు నేత‌లు అసంతృప్తి వ్య‌క్తం చేశారు. రాష్ట్ర వ్యాప్తంగా కొన్ని నియోజకవర్గాల్లో ఇలాంటి కొత్త చేరికల వల్ల లు అలకలు ఉన్నా గన్నవరంలో అవి గ్రూపులు కట్టి తారాస్థాయికి చేరుకున్నాయి. వ‌ల్ల‌భ‌నేని వంశీ గత ఐదేళ్ల హయాంలో ఉన్నపుడు వైసీపీ శ్రేణులను ఇబ్బంది పెట్టారని అతనితో కలిసి పనిచేసేది లేదని వంశీపై పోటీ చేసి ఓడిన యార్లగడ్డ వెంక‌ట్రావు నిర్ణయించుకున్నారు. ఇదే విషయాన్ని జగన్‌కు కూడా ఆయన చెప్పేసి నియోజకవర్గానికి కూడా దూరంగా ఉంటూ జగన్ ఇచ్చిన కేడీసీసీ బ్యాంకు ఛైర్మన్ పని చేసుకుంటున్నారు.

వంశీ పంచాయ‌తీ పెట్టారే

ఇదే స‌మ‌యంలో మంత్రులు కొడాలి నాని, పేర్ని నాని సాయంతో సీఎం జగన్ కు దగ్గరయ్యేందుకు
టీడీపీ రెబెల్ ఎమ్మెల్యేగా ఉన్న వల్లభనేని వంశీ అన్ని ప్రయత్నాలు చేస్తున్నారు. ఇదే స‌మ‌యంలో తానే వైసీపీ నియోజ‌క‌వ‌ర్గ ఇంచార్జీ అని ప్ర‌క‌టించ‌డం చ‌ర్చ‌కు తెర‌లేపింది. ఇటీవల యార్లగడ్డ, దుట్టా వర్గాలకు వంశీ వర్గాలు తగువులాట పంచాయితీ రోడ్డెక్కింది. దీనితో జగన్ నేరుగా గన్నవరం వివాదం దృష్టిపెట్టాల్సిన పరిస్థితి వచ్చింది. పుట్టినరోజు వేడుకలను జరగనీయకుండా పోలీసులు ఆయన అభిమానులను అడ్డుకోవటం, నోటీసులు ఇవ్వటంతో మరోసారి ఫైరయ్యారు.. యార్లగడ్డ వెంకట్రావు. వంశీపై ఓ రేంజిలో విమర్శల వర్షం కురిపించిన యార్లగడ్డ బహిరంగ వేదికపైనే వంశీ తీరును ఎండగట్టారు.

జ‌గ‌న్ భ‌లే మేనేజ్ చేసేశారే

గన్నవరంలో వైసీపీ శ్రేణులను వంశీ పెడుతున్న ఇబ్బందులను జగన్ దృష్టికి తీసుకెళ్ళాలని యార్లగడ్డ, దుట్టా వర్గాలు నిర్ణయించాయి. దుట్టా తన వర్గంతో కలిసి వైవీ సుబ్బారెడ్డిని కలిసి వంశీ తీరుపై ఫిర్యాదు చేశారు. ఇది జరిగిన గంటల వ్యవధిలోనే సీఎం జగన్ అటు వంశీ, ఇటు యార్లగడ్డ ఇద్దరి చేతులు కలిపి.. కలిసి పనిచేయలని సంకేతాలను ఇచ్చారు. పునాదిపాడులో జరిగిన జగనన్న విద్యాకానుక ప్రారంభంలో యార్లగడ్డను చూసిన సీఎం జగన్ వెంటనే వంశీని పిలిపించి.. చేతులు కలిపించారు. త‌ద్వారా కీల‌క‌మైన నియోజ‌క‌వ‌ర్గంలో అన‌వ‌స‌ర వివాదాల‌కు చెక్ పెట్టారు. అయితే, ఎవరెన్ని చెప్పినా గన్నవరంలో వంశీతో కలిసి పనిచేయమని చెబుతున్న యార్లగడ్డ వెంకట్రావు ఇప్పడైనా మెత్తబడతారా ? వంశీ, యార్లగడ్డ వర్గాలు ఎంతవరకు కలిసి పనిచేస్తాయనేదే ప్రశ్నను కొంద‌రు వ్య‌క్తం చేస్తున్నారు. మ‌రోవైపు స్వ‌యంగా సీఎం జ‌గ‌న్ జోక్యం చేసుకున్నందున అంతా స‌ద్దుమ‌ణిగిపోతుంద‌ని వైసీపీ నేత‌లు అంటున్నారు.