తెలంగాణ‌లో ర‌చ్చో ర‌చ్చ .. చంపేసే స్థాయికి రాజ‌కీయాలు

రాజ‌కీయాలు అంటే హుందాగా ఉండాలి అని ఆశించే ప‌రిస్థితి ఎప్పుడో దాటిపోయింది. ఒక‌వేళ‌ ఇప్పుడు ఎవ‌రైనా అలా ఆలోచిస్తే వారిది అమాయ‌క‌త్వ‌మే! అంతే క‌దా మ‌రి!

తాజాగా ఓ తెలంగాణ నేత‌ను చంపేస్తామ‌ని బెదిరించార‌ట‌. వాళ్లెవ‌రో కాదు సొంత పార్టీ వాళ్లే అని డౌట్ ఉంద‌ట. తెలంగాణ కాంగ్రెస్ లో పీసీసీ పంచాయతీ ఇలా రంజుగా మారింది. పీసీసీ ఛీఫ్ ప‌ద‌వికి రేవంత్ రెడ్డి పేరు ఖరారు అయిందనే ప్రచారం జరగడంతో కొత్త కొత్త లెక్క‌లు తెర‌మీద‌కు వ‌స్తున్నాయి.

వీహెచ్ సంచ‌ల‌నం … నిన్ను చంపేస్తాం

పీసీసీ చీఫ్ ప‌ద‌వి విష‌యంలో రేవంత్ రెడ్డి కి , సీఎల్పీ నేత భట్టి విక్ర‌మార్క‌కు మధ్యనే ప్రధాన పోటీ ఉన్నట్లు ప్ర‌చారం జ‌రుగుతోంది. పార్టీలో సీనియర్లు అంతా ఒక అభిప్రాయంతో ఉన్నారని , రేవంత్ కి పార్టీ పగ్గాలు ఇస్తే…సీనియర్లు ఉంటారా..? బయటకు వెళ్తారా. ? అనే చర్చ జరుగుతోంది. అయితే , తాజాగా పార్టీ సీనియ‌ర్ హన్మంత రావు సంచ‌ల‌న కామెంట్లు చేశారు. రేవంత్ కి పదవి ఎలా ఇస్తారు..? అని ప్రశ్నించారు. అయితే ఇలా వీహెచ్ మీడియా ముందుకు వచ్చారో లేదో ఆయనకి బెదిరింపు కాల్స్ మొదలయ్యాయట‌. రేవంత్ గురించి మాట్లాడితే చంపుతామంటూ బెదిరింపు కాల్స్ వస్తున్నాయని, అసభ్య పదజాలంతో గుర్తు తెలియని వ్యక్తి దూషించినట్టు చెబుతున్నారు. ఈ మేరకు సైబరాబాద్ పోలీస్ కమిషనరేట్ లో విహెచ్ ఫిర్యాదు చేశారు. దీంతో కాంగ్రెస్ రాజ‌కీయం మ‌రి ఈ రేంజ్‌లో ఉంటుందా? అంటూ ప‌లువురు చ‌ర్చించుకుంటున్నారు.

ఢిల్లీలో ఏం జ‌రుగుతోంది ?

మ‌రోవైపు ఢిల్లీలో పీసీసీ చీఫ్ ప‌ద‌విపై కీల‌క ప‌రిణామాలు చోటు చేసుకుంటున్నాయ‌ని చ‌ర్చ జ‌రుగుతోంది. రైతు ర్యాలీకి వెళ్లిన కాంగ్రెస్ నాయకులు కొద్దీ మంది ఇంకా ఢిల్లీలోనే ఉన్నారు. ఎంపీ కోమటిరెడ్డి వెంకటరెడ్డి , రేవంత్ టీం లోని కొందరు నాయకులు ఢిల్లీలోనే మకాం వేశారు. ఒకటి…రెండు రోజుల్లో పీసీసీ చీఫ్ ప్రకటన అధికారికంగా రాబోతుందని చర్చ జరుగుతున్న క్రమంలో అందరూ ఆఖరి ప్రయత్నాల్లో ఉన్నారు. అయితే పదవుల కూర్పుకు సంబందించి… పార్టీ నాయకులు ఎవరికి వారు లెక్కలు వేస్తున్నారు. నేపథ్యంలో ఎవరికి పీసీసీ ఇస్తారు. .? ఎవరిని నచ్చ చెప్తారు అనేది ఇప్పుడు ఆసక్తిగా మారింది.