Rayalaseema : రాయలసీమలో వైసీపీ టార్గెట్ ఫిక్స్! పరిటాల శ్రీరామ్ పై కేసులే కేసులు!!

Rayalaseema : టిడిపి యువనేత ..సీమ సింహం పరిటాల రవి కుమారుడు…పరిటాల శ్రీరాం….ఇప్పుడు ఈ పేరు చుట్టూనే కేసుల పర్వం కొనసాగుతోంది.ఫలితంగా అనంతపురం రాజకీయం వేడెక్కుతోంది. 2019 అసెంబ్లీ ఎన్నికల్లో తొలిసారిగా బరిలో దిగిన శ్రీరామ్‌.. రాప్తాడులో ఓడిపోయారు. జిల్లాలో పరిటాల కుటుంబానికి ఒక గుర్తింపు ఉంది. అనుచరగణం కూడా ఎక్కువే.

పరిటాల రవి మరణం తర్వాత ఆయన భార్య సునీత రాజకీయాల్లోకి వచ్చి మంత్రిగానూ పనిచేశారు. కిందటి ఎన్నికల్లో తనకు బదులుగా కుమారుడు పరిటాల శ్రీరాంను రాప్తాడు నుంచి బరిలో దింపారు సునీత. టీడీపీ అధికారం కోల్పోవడంతో కొంతకాలం స్తబ్దుగా ఉండిపోయారు. తర్వాత ఏమనుకున్నారో ఏమో జూలు విదిలించడం మొదలుపెట్టారు. రాప్తాడుతోపాటు ధర్మవరం నియోజకవర్గం టీడీపీ బాధ్యతలను కూడా పరిటాల కుటుంబం భుజాన వేసుకుంది. ఇంత వరకు బాగానే ఉన్నా మున్సిపల్‌ ఎన్నికల సమయంలో పరిటాల శ్రీరాం ధర్మవరం పర్యటనకు వెళ్లినప్పటి నుంచి పరిస్థితులు వరసగా మారుతూ వస్తుండటం రాజకీయాలను వెడెక్కిస్తోంది.

Rayalaseema : ఎక్కడ అడుగుపెడితే అక్కడ కేసు!

ప్రస్తుతం పరిటాల శ్రీరాం ఎక్కడ అడుగుపెడితే అక్కడ ఆయనపై కేసు అన్నట్టుగా ఉంది. ధర్మవరం మున్సిపల్‌ ఎన్నికల ప్రచారంలో నిబంధనలకు విరుద్ధంగా మసీదులోకి వెళ్లి ప్రచారం చేశారని కేసు నమోదైంది. ఈ మధ్యే టీడీపీ కార్యకర్తలను పరామర్శించేందుకు రాప్తాడు నియోజకర్గంలోని  చెన్నేకొత్తపల్లి మండలానికి వెళ్లారు. శ్రీరాం సమక్షంలో టీడీపీ కార్యకర్తలు దాడి చేశారని ఫిర్యాదు చేయడంతో ఆయనతోపాటు మరో 9 మందిపై కేసు పెట్టారు పోలీసులు. ఈ కేసు  తర్వాత స్థానిక రాజకీయాల్లో వేడి ఇంకా చల్లారలేదు.

టిడిపి లెక్కలు వేరు!

చెన్నేకొత్తపల్లి ఘటనలో కొందరు టీడీపీ కార్యకర్తలను పోలీసులు అదుపులోకి తీసుకోవడంతో.. విషయం తెలిసి అక్కడికి వెళ్లారు శ్రీరాం. మళ్లీ రెండు పక్షాలు పెద్దఎత్తున చేరుకోవడంతో ఉద్రిక్తతకు దారితీసింది. పోలీసులు రెండు వర్గాలను చెదరగొట్టారు. టీడీపీ, వైసీపీ కేడర్‌ తోపులాట చెన్నేకొత్తపలిలో టెన్షన్‌ క్రియేట్‌ చేసింది. మొత్తానికి శ్రీరాం ఎక్కడ కాలు పెడితే అక్కడ ఏదో ఒక గొడవ జరగడం.. వెంటనే కేసులు పెట్టడం జరిగిపోతున్నాయి. దీన్ని రాజకీయంగా ఉపయోగించుకోవడానికి పరిటాల శిబిరం ప్రయత్నిస్తోంది.

మొన్న మాటలు ..నేడు చేతలు!

ఆ మధ్య వైసీపీ ప్రజాప్రతినిధులు, పరిటాల కుటుంబం మధ్య మాటల తూటాలు పేలాయి. రెండువర్గాలు చరిత్రను తవ్వే ప్రయత్నం చేశాయి. అనంత రక్తచరిత్ర గురించి విమర్శలు చేసుకున్నారు నాయకులు. అలా మొదలైన ఎపిసోడ్‌ ఇప్పుడు కేసుల రూపంలోకి మళ్లిందని టీడీపీ వర్గాలు అనుమానిస్తున్నాయట. మరి.. ఈ కేసుల యవ్వారం అనంత రాజకీయాల్లో ఎలాంటి మలుపులకు దారితీస్తుందో చూడాలి.