గుంటూరు సబ్‌జైలుకు ఎంపీ గల్లా!

అమరావతి: గుంటూరు టీడీపీ ఎంపీ గల్లా జయదేవ్‌పై నాన్‌ బెయిలబుల్‌ కేసులు నమోదు చేశారు. సోమవారం అమరావతిలో అసెంబ్లీ ముట్టడి కార్యక్రమంలో పాల్గొని అరెస్ట్ అయిన ఎంపీ గల్లా జయదేవ్‌కు మంగళగిరి మెజిస్ట్రేట్ రిమాండ్ విధించారు. మంగళగిరి మేజిస్ట్రేట్ బెయిల్ నిరాకరించడంతో పోలీసులు ఆయనను తెల్లవారుజామున గుంటూరు సబ్ జైలుకు తరలించారు.

ఎంపీ గల్లా జయదేవ్ అరెస్ట్‌తో అర్ధరాత్రి హైడ్రామా నడిచింది. సోమవారం అసెంబ్లీ ముట్టడికి బయల్దేరిన జయదేవ్‌ను పోలీసులు అరెస్ట్ చేశారు. అనంతరం ఆయన్ను మంగళగిరి పోలీస్ స్టేషన్‌కు తరలించారు. తర్వాత జయదేవ్‌ను దుగ్గిరాల, పెదకాకాని, గుంటూరు మీదుగా నరసరావుపేట.. అక్కడి నుంచి రొంపిచర్ల స్టేషన్‌కు తీసుకెళ్లారు. అనంతరం ఆయనపై నాన్‌బెయిలబుల్ కేసులు నమోదు చేశారు. రొంపిచర్ల పోలీస్‌స్టేషన్‌ నుంచి గుంటూరుకు తీసుకువచ్చి అర్ధరాత్రి వరకు పోలీసుల వాహనంలోనే కూర్చోబెట్టారు. గల్లా జయదేవ్ అరెస్ట్ గురించి తెలుసుకున్న టీడీపీ కార్యకర్తలు,అనుచరులు.. ఆయన్ను తరలిస్తున్నా కారును అడ్డుకునే ప్రయత్నం చేశారు. తర్వాత అర్ధరాత్రి 12.30 గంటలకు జీజీహెచ్‌ వైద్యులతో జయదేవ్‌కు వైద్య పరీక్షలు నిర్వహించారు. అర్ధరాత్రి ఒంటి గంట వరకు హైడ్రామా కొనసాగింది. గల్లాను వివిధ పోలీస్ స్టేషన్లు తిప్పి మూడు గంటలకు మంగళగిరి మేజిస్ట్రేట్ ముందు హాజరు పరిచారు. బెయిల్ కోసం ప్రయత్నించగా.. మంగళగిరి మేజిస్ట్రేట్ నిరాకరించారు. ఎంపీ గల్లాకి జనవరి 31వరకు రిమాండ్ విధించడంతో మంగళవారం తెల్లవారుజామున 4.30 గంటలకు గుంటూరు సబ్ జైలుకి తరలించారు.

ఈ విషయం తెలుసుకున్న టీడీపీ నేతలు, కార్యకర్తలు జైలు దగ్గరకు భారీగా చేరుకుంటున్నారు. పోలీసుల తీరుపై గల్లా జయదేవ్ మండిపడ్డారు. తనపై పోలీసులు దాడి చేశారని.. తన చొక్కా చించేశారని.. తన ఒంటిపై ఉన్న దెబ్బల్ని కూడా చూయించారు. తన తాత బ్రిటీష్‌వారికి వ్యతిరేకంగా పోరాటం చేసి జైలుకు వెళ్లారని.. తాను కూడా ప్రభుత్వం తీసుకున్న అప్రజాస్వామికమైన నిర్ణయానికి వ్యతిరేకంగా పోరాడి జైలుకు వెళ్లానన్నారు. అమరావతి కోసం తన పోరాటం కొనసాగుతుందని ఎంపీ స్పష్టం చేశారు

మరోవైపు ఎంపీ గల్లా జయదేవ్‌ను అదుపులోకి తీసుకునే సమయంలో పోలీసులపై కొందరు రాళ్లు రువ్వారని. దీంతో పలువురు పోలీసులకు గాయాలు అయ్యాయని జిల్లా ఎస్పీ విజయరావు తెలిపారు. రాళ్ల దాడి చేసినవారిపై కేసులు నమోదు చేశామన్నారు. అసెంబ్లీ ముగిసే వరకు రాజధాని ప్రాంతంలో 144 సెక్షన్‌, 30 పోలీస్‌ యాక్ట్‌ అమలు చేస్తున్నట్టు ఎస్పీ విజయరావు వెల్లడించారు.