కోరి తెచ్చుకున్న వ్యక్తికి బదిలీ ఎందుకు?

విశాఖపట్నం: ఏపీ సీఎస్ గా కోరి తెచ్చుకున్న ఎల్వీ సుబమణ్యంను ఎందుకు బదిలీ చేశారని జనసేన అధినేత పవన్ కల్యాణ్ వైసీపీ ప్రభుత్వాన్ని ప్రశ్నించారు. ఆయనను తప్పించారంటే..ఏవో తప్పులు జరిగినట్లు అర్థమవుతోందని వ్యాఖ్యానించారు. విశాఖలో నిర్వహించిన మీడియా సమావేశంలో పవన్ మాట్లాడారు. సీఎం జగన్‌పై తనకు వ్యక్తిగతంగా ఎలాంటి ద్వేషాలు లేవని స్పష్టం చేశారు. భవన నిర్మాణ కార్మికులు ఇబ్బందుల నేపథ్యంలో ఇసుక సమస్యను పరిష్కరించాలని కోరుతున్నామని చెప్పారు. ఇప్పటి వరకు పదుల సంఖ్యలో భవన నిర్మాణ కార్మికులు మృతి చెందారన్నారు. గత ప్రభుత్వం తప్పులు చేస్తే సరిచేయాలని, నిర్మాణ రంగాన్ని ఆపేస్తే అభివృద్ధి ఎలా సాధ్యం ? అని పవన్ ప్రశ్నించారు. ప్రభుత్వం సమస్యను వినకపోగా…నిర్లక్ష్యంగా వ్యవహరిస్తోందని మండిపడ్డారు. వైసీపీ ప్రభుత్వం సమస్యను గుర్తించడంలేదని, వైసీపీ నేతలు దిగజారి మాట్లాడుతున్నారని ఆగ్రహం వ్యక్తం చేశారు. ‘మమ్మల్ని తిడితే… భవన నిర్మాణ కార్మికులు సమస్యలు తీరతాయా?’ అని ప్రశ్నించారు.

పాలసీ విధానంలో తప్పులుంటే నిలదీస్తామని చెప్పారు. ఆత్మహత్యలు చేసుకున్న కుటుంబాలకు రూ.5లక్షలు ఇవ్వాలని డిమాండ్ చేశారు. వరదల వల్ల ఇసుక కొరత వచ్చిందనడం సరికాదన్నారు. కర్ణాటక, మహారాష్ట్రలో వర్షాలు, వరదలు వచ్చాయి..అక్కడ ఎందుకు భవన నిర్మాణ కార్మికులు చనిపోలేదని ప్రశ్నించారు. వైసీపీ మంచి పాలన అందిస్తే తమ సహకారం అందిస్తామన్నారు. అస్తవ్యస్థ పాలన సాగిస్తే చూస్తూ ఊరుకోమని పవన్ హెచ్చరించారు. వ్యక్తిగత దూషణలు మాని సమస్యల పరిష్కారంపై దృష్టి సారించాలని వైసీపీ నేతలకు పవన్ హితవు పలికారు.