ఏపీలో 25 జిల్లాలు!

విశాఖపట్నం: ఏపీలో 25 జిల్లాలు ఏర్పాటు చేయాలనే ఆలోచనలో సీఎం జగన్ ఉన్నట్లు వైసీపీ ఎంపీ విజయసాయిరెడ్డి తెలిపారు. విశాఖపట్నం వైసీపీ ప్రధాన కార్యాలయంలో సీఎం జగన్ జన్మదిన వేడుకలను వైసీపీ నేతలు ఘనంగా నిర్వహించారు. ఈ సందర్భంగా విజయసాయి రెడ్డి మీడియాతో మాట్లాడారు. రాష్ట్రంలో అన్ని జిల్లాలను అబివృద్ధి చేయాలనే ఉద్దేశంతోనే మూడు రాజధానుల ప్రతిపాదన తీసుకొచ్చామని చెప్పారు. రాష్ట్రంలో ప్రస్తుతం 13 జిల్లాలు ఉన్నాయి.. త్వరలో 25 జిల్లాలు కాబోతున్నాయని విజయసాయి చెప్పారు. విశాఖపట్నాన్ని పరిపాలనా రాజధానిగా చేయాలనుకోవడం చారిత్రక నిర్ణయమని అన్నారు. రాష్ట్రాభివృద్ధే లక్ష్యంగా ఏపీ ప్రభుత్వం పలు నిర్ణయాలు తీసుకుంటోందని చెప్పారు. జగన్ అధికారం కోసం ఆశపడే వ్యక్తి కాదని.. అన్ని ప్రాంతాలు అభివృద్ధి చెందాలని ఈ నిర్ణయం తీసుకున్నారని వ్యాఖ్యానించారు. అభివృద్ధి ఏ ఒక్క ప్రాంతానికే పరిమితం కాకూడదు.. అధికార వికేంద్రీకరణ జరగాలనేదే ముఖ్య ఉద్దేశ్యం అన్నారు. రాబోయే రోజుల్లో ఈ కార్యక్రమాలను ముమ్మరం చేస్తామన్నారు. వైసీపీ కార్యకర్తలు కూడా ప్రజలకు సేవచేస్తూ ముందుకు సాగాలని సూచించారు. ప్రజలకు అవినీతి రహిత పాలన అందించి తిరిగి 2024లో అధికారంలోకి రావాలని కార్యకర్తలకు విజయసాయి పిలుపునిచ్చారు.

మూడు రాజధానుల ప్రతిపాదనలతో ముఖ్యమంత్రి జగన్ కొత్త చరిత్ర సృష్టించారని మంత్రి అవంతి అన్నారు. దేశంలోనే ఎక్కడా లేని విధంగా ఏపీలో మూడు రాజధానులు వస్తున్నాయని.. ఎంతో ఆనందంగా ఉందన్నారు. ఐదేళ్ల టీడీపీ పాలనలో జరగని అభివృద్ధి జగన్ ఐదు నెలల్లో చూపించారన్నారు. త్వరలో జరగబోయే స్థానిక సంస్థల ఎన్నికల్లో వైఎస్సార్‌సీపీ జెండా ఎగరేస్తామన్నారు.. కార్యకర్తలు ఆ దిశగా పని చేయాలన్నారు.