`గాడ్ ఫాద‌ర్‌`కు మొద‌ట అనుకున్న టైటిల్ ఏంటో తెలుసా..?

`ఆచార్య‌` వంటి డిజాస్ట‌ర్ అనంత‌రం మెగాస్టార్ చిరంజీవి నుండి రీసెంట్గా వ‌చ్చిన చిత్రం `గాడ్ ఫాద‌ర్‌`. మలయాళంలో మోహ‌న్ లాల్ న‌టించిన సూపర్ హిట్ మూవీ `లూసిఫర్` కు రీమేక్‌గా రూపుదిద్దుకున్న ఈ చిత్రానికి మోహ‌న్ రాజా ద‌ర్శ‌క‌త్వం వ‌హించాడు. నయనతార, సల్మాన్ ఖాన్, సత్యదేవ్, సముద్రఖని త‌దిత‌రులు ఇందులో కీల‌క పాత్ర‌ల‌ను పోషించారు.

కొణిదెల సురేఖ సమర్పణలో సూపర్ గుడ్ ఫిల్మ్స్‌, కొణిదెల ప్రొడక్షన్స్ బ్యానర్‌లపై ఆర్. బి.చౌదరి, ఎన్వీ ప్రసాద్ ఈ చిత్రాన్ని నిర్మించ‌గా.. త‌మ‌న్ స్వ‌రాలు అందించారు. ద‌స‌రా కానుక‌గా అక్టోబ‌ర్ 5న తెలుగుతో పాటు హిందీలోనూ విడుద‌లైన ఈ పొలిటిక‌ల్ డ్రామా ప్రేక్ష‌కుల‌ను బాగానే ఆక‌ట్టుకుంది.

టాక్ బాగుండ‌టంతో ఈ చిత్రం బాక్సాఫీస్ వ‌ద్ద మంచి వ‌సూళ్ల‌ను రాబ‌డుతోంది. ఇదిలా ఉంటే.. ఈ సినిమా టైటిల్ కు సంబంధించి ఓ ఇంట్ర‌స్టింగ్ న్యూస్ నెట్టింట వైర‌ల్‌గా మారింది. అదేంటంటే.. ఈ చిత్రానికి గాడ్ ఫాద‌ర్ అనే టైటిల్ ఫ‌స్ట్ చాయిస్ కాద‌ట‌. ఈ విష‌యంలో తాజా ఇంట‌ర్వ్యూలో చిరంజీవి స్వ‌యంగా వెల్ల‌డించారు.

లూసిఫర్ తెలుగు రీమేక్ వర్కింగ్ టైటిల్ `సర్వాంతర్యామి`. ఆ టైటిల్ తోనే ఈ సినిమాను తెలుగు రీమేక్ చేయాల‌ని మొద‌ట భావించారు. ఆ టైటిల్ తోనే షూటింగ్ కూడా పూర్తి చేశార‌ట‌. అయితే ఇంత‌లో మ్యూజిక్ డైరెక్ట‌ర్ త‌మ‌న్ `గాడ్ ఫాద‌ర్‌` టైటిల్‌ను సూచించార‌ట‌. మూవీ క‌థ‌కు, చిరు ఇమేజ్‌కు ఆ టైటిల్ బాగుంటుంద‌ని అంద‌రూ భావించార‌ట‌. కానీ, హాలీవుడ్ మూవీ గాడ్ ఫాదర్ నిర్మాతల నుండి అభ్యంతరాలు వ్యక్తమయ్యాయట. దాంతో వాళ్ళ నుండి అనుమతి తీసుకోని.. చివ‌ర‌కు `గాడ్ ఫాద‌ర్‌` టైటిల్‌ను ఫైన‌ల్ చేశార‌ట‌.