వివేకా హత్య కేసు దర్యాప్తు సీబీఐ అధికారికి కరోనా పాజిటివ్ నిర్ధారణ..విచారణ ముందుకు సాగేనా..!?

(కడప నుండి “న్యూస్ ఆర్బిట్” ప్రతినిధి)

మాజీ మంత్రి వైఎస్ వివేకానంద హత్య కేసు దర్యాప్తు నిర్వహిస్తున్న కేంద్ర దర్యాప్తు సంస్థ (సీబీఐ) అధికారులకు కరోనా భయం పట్టుకున్నది. కడప సెంట్రల్ జైలు ఆవరణలో గల అతిధి గృహం కేంద్రంగా సీబీఐ అధికారులు వివేకా హత్య కేసులో దోషులను కనుగొనేందుకు ముమ్మరంగా విచారణ ప్రక్రియ కొనసాగిస్తున్న విషయం తెలిసిందే.

కేసు దర్యాప్తులో భాగంగా వందలాది మందిని సీబీఐ అధికారులు విచారిస్తున్నారు. ఈ క్రమంలో కేసు విచారణ నిర్వహిస్తున్న ఒక అధికారికి కరోనా పాజిటివ్ నిర్ధారణ అయ్యింది. ఆయన కొద్ది రోజులుగా కరోనా లక్షణాలతో బాధపడుతున్నారు. ఈ నేపథ్యంలో ఇద్దరు అధికారులు గురువారం కరోనా పరీక్షలు చేయించుకోగా ఒకరికి పాజిటివ్ నిర్ధారణ అయ్యింది. దీంతో ఆ  అధికారి సెల్ఫ్ ఐసోలేషన్‌లో ఉన్నారు. కేసు దర్యాప్తు అధికారుల్లో ఒకరికి కరోనా పాజిటివ్ నిర్ధారణ కావడం ఆందోళన కల్గిస్తున్నది. దీంతో మిగిలిన అధికారులు కూడా నేడు పరీక్షలు చేయించుకున్నారు.

రాష్ట్ర వ్యాప్తంగా కరోనా ఉదృతి కొనసాగుతూనే ఉంది. నిత్యం ఆరు నుండి ఏడు వేల వరకూ కేసులు నమోదు అవుతున్నాయి. అదే మాదిరిగా కడప జిల్లాలోనూ రోజుకు 350 నుండి 450 కేసుల వరకూ నమోదు అవుతున్నాయి. ఈ పరిస్థితుల్లో వివేకా హత్య కేసు దర్యాప్తును చేస్తున్న అధికారులకు కరోనా పట్టుకోవడంతో రెండవ విడత విచారణకు బ్రేక్ పడే అవకాశం ఉందని భావిస్తున్నారు. కేసు దర్యాప్తును ఇదే విధంగా కొనసాగిస్తారా లేక విరామం ఇచ్చి వెళ్లి వెళ్లిపోతారా అనేది తేలాల్సి ఉన్నది.

మరో పక్క సీబీఐ అధికారుల దర్యాప్తు సక్రమంగా జరగడం లేదన్న అనుమానాన్ని వివేకా కుమార్తె డాక్టర్ సునీత వ్యక్తం చేసినట్లు సమాచారం. ఆమె కేంద్ర హోంశాఖ మంత్రి అమిత్ షాను కలిసే ఆలోచనలో ఉన్నట్లు వార్తలు వస్తున్నాయి.