స్టీఫెన్ రవీంద్ర ఫైలు కదుపుతున్న సీఎం జగన్..! కారణం పెద్దదే..!!

ఏపీలో మళ్లీ స్టీఫెన్ రవీంద్ర పేరు వినిపిస్తోంది. సీఎం జగన్ అధికారం చేపట్టిన వెంటనే ఇంటెలిజెన్స్ విభాగాన్ని బలోపేతం చేయాలని భావించారు. అందుకు వైఎస్ సీఎంగా ఉన్నప్పటి నుంచీ నమ్మకస్థుడిగా ఉన్న స్టీఫెన్ రవీంద్రను ఏపీకి రప్పించుకోవాలని శతవిధాలా ప్రయత్నించారు. కానీ.. నిబంధనలు అడ్డు రావడంతో కుదరలేదు. స్టీఫెన్ రవీంద్ర తెలంగాణ ఐపీఎస్ అధికారి. ఆయన్ను డిప్యుటేషన్ పై ఏపీకి పంపేందుకు తెలంగాణ కూడా నో అబ్జెక్షన్ సర్టిఫికెట్ ఇచ్చింది. పాలనలో ఏడాదిన్నర పూర్తి చేసుకున్న జగన్.. ఇప్పటివరకూ రాష్ట్రంలో జరుగుతున్న పరిణామాలపై దృష్టి సారించేందుకు ఇంటెలిజెన్స్ వ్యవస్థను పటిష్టం చేయాలని భావిస్తున్నట్టు సమాచారం.

అమిత్ షాతో కూడా చర్చించారా..?

పాలనలో తనదైన ముద్ర వేస్తున్న సీఎం జగన్ కు ఈమధ్య ఇంటిపోరు ఎక్కువ అవుతోంది. ప్రతిపక్షాలు, దేవాలయాలపై దాడులు, రాష్ట్రంలోని పరిస్థితులు కాస్త ఇబ్బందిగా మారాయని అంటున్నారు. దీంతో ఇంటెలిజెన్స్ పటిష్టతపై దృష్టి సారించారని తెలుస్తోంది. ఇందులో భాగంగానే గత ఏడాది నిలిచిపోయిన స్టీఫెన్ రవీంద్ర అంశాన్ని మళ్లీ తెరపైకి తెస్తున్నట్టు సమాచారం. ఇదే విషయమై ఆమధ్య కేంద్ర హోంశాఖ మంత్రి అమిత్ షాతో జరిగిన భేటీలో సీఎం ప్రస్తావించారని అంటున్నారు. నిజానికి 20 ఏళ్లు పైబడ్డ సర్వీసు ఉన్న వారిని అంతర్రాష్ట్ర బదిలీ చేసేందుకు నిబంధనలు అడ్డుగా ఉన్నాయి. ఈ కారణంగానే గత ఏడాది స్టీఫెన్ ను రప్పించాలనుకున్న కుదరలేదు. ఇప్పుడు ఆ నిబంధన సడలింపు కానీ.. వేరే దారి కోసం కానీ సీఎం జగన్ ఆలోచిస్తున్నట్టు తెలుస్తోంది.

నాయకుల తీరు, ప్రజల నాడి తెలుసుకునేందుకేనా..

రాష్ట్రంలోని కొన్ని ప్రాంతాల్లో అంతర్గత కలహాలు పార్టీకి ఇబ్బంది.. జగన్ కు తలనొప్పిగా మారుతున్నాయి. క్యాబినెట్ నిర్ణయాలు కూడా వ్యతిరేక మీడియాకు లీక్ అవుతున్నాయి. ప్రభుత్వం తీసుకునే నిర్ణయాలపై కొందరు నాయకులు బహిరంగంగా చేస్తున్న ప్రకటనలు కూడా జగన్ కు ఇబ్బంది చేస్తున్నాయి. ఈ నేపథ్యంలో ఇంటెలిజెన్స్ విభాగాన్ని పటిష్టం చేయాలంటే స్టీఫెన్ రవీంద్రపైనే జగన్ నమ్మకంగా ఉన్నారని అంటున్నారు. ఎమ్మెల్యేలు, మంత్రుల తీరు, ప్రజల్లో సంతృప్తి స్థాయి స్టీఫెన్ తో మరింత పకడ్బందీగా, నమ్మకంగా తెలుసుకోవచ్చని సీఎం భావిస్తున్నారట. జనవరిలో రచ్చబండ ప్రారంభం కానుంది. ఈలోపు గానీ.. ఆ వెంటనే కానీ స్టీఫెన్ రవీంద్రను రప్పించుకోవాలని జగన్ పట్టుదలగా ఉన్నట్టు సమాచారం.