కొడాలి నాని అతి భజన వెగటు పుట్టిస్తుందేమో..!!

కొడాలి నాని స్వతహాగా హిందూవాది. ఆయన మెడలో ఉన్న మాలలు, బొట్టే ఇందుకు ఉదాహరణ. అయితే.. ఆయనలో హిందూత్వానికి మించి ఆయనలో జగన్ వాది ఉన్నాడు. టీడీపీని విమర్శించేందుకు.. జగన్ ను మెప్పించడానికి జగన్ యజ్ఞం నిరంతరం చేస్తూనే ఉంటారు. ఓ వర్గం ఆయన వ్యాఖ్యలను ఎంజాయ్ చేస్తూంటే.. మరికొందరు మా పార్టీలో ఈ తరహా నాయకుడా అని తలలు పట్టుకుంటారు. ఆయన వైసీపీకి ప్లస్సా.. మైనస్సా అనేది పక్కనపెడితే టీటీడీ డిక్లరేషన్ పై చేసిన వ్యాఖ్యలు తీవ్ర దుమారం రేపుతున్నాయి.

నానిది హిందూ భావజాలమే..

నానికి హిందూ సెంటిమెంట్లు, భావాలు ఎక్కువే. పూజలు కూడా ఎక్కువే. ఇంత సెంటిమెంట్ ఉన్న నాని డిక్లరేషన్ పై ఇటువంటి వ్యాఖ్యలు చేయడం ఇప్పుడు ఆశ్చర్యం రేకెత్తిస్తోంది. జగన్ పై చూపే అభిమానానికి దేవుడి విషయం యాడ్ చేసి సమసిపోతున్న విషయాన్ని పెద్దది చేశారని భావిస్తున్నారట. ఇప్పటికే రాజధాని, కోర్టు తీర్పులపై నాని చేస్తున్న వ్యాఖ్యలు టీటీడీ డిక్లరేషన్ పై చేసిన  వ్యాఖ్యలు పార్టీలో, ప్రభుత్వంలో తీవ్ర చర్చనీయాంశమయ్యాయి.

ఎంజాయ్ చేస్తున్నవారూ ఉన్నారుగా..

ఇదే సమయంలో కొడాలి నాని వ్యాఖ్యలను తమకు అనుకూలంగా మలచుకుంటున్న వైసీపీ నాయకులు ఉన్నారు. ఆయన వ్యాఖ్యలను ఫొటోలు, వీడియోల రూపంలో సోషల్ మీడియోలో షేర్ చేస్తున్నారు. అసలైన మగాడు.. టీడీపీకి అసలైన మగాడు.. చంద్రబాబును ఎదుర్కొనే మొనగాడు.. టీడీపీపై జగన్ వదిలిన బాణం.. అంటూ వైసీపీ సోషల్ మీడియా ఆయన్ను కీర్తిస్తున్నాయి. అయితే.. రాజకీయ విలువలు పాటించే నాయకులు, సీనియర్లు మాత్రం కొడాలి నాని వ్యాఖ్యలు ఏమాత్రం రుచించడం లేదు. పార్టీని ఇరుకున పెట్టే విధంగా నాని వ్యాఖ్యలు ఉంటున్నాయని కొందరు సీఎం జగన్ కు వివరిస్తున్నారని తెలుస్తోంది. మరి.. ఈ నేపథ్యంలో నానిని జగన్ అదుపులో పెడతారా.. స్వేచ్ఛగా వదిలేస్తారా అనేది చూడాల్సిందే.