‘విలీనం’ వరకు ఈ పోరు ఆగదు!

(న్యూస్ ఆర్బిట్ డెస్క్)

తెలంగాణలో ఆర్టీసీ కార్మికుల సమ్మె తీవ్రతరమవుతుంది. ప్రభుత్వంలో ఆర్టీసీని విలీనం చేసే ప్రకస్తే లేదని ప్రభుత్వం తెగేసి చెప్పడంతో.. అటు కార్మికులు కూడా తాడోపేడో తేల్చుకునేందుకు సిద్ధమవుతున్నారు. ఈ క్రమంలో ఆర్టీసీ జేఏసీ భవిష్యత్ కార్యాచరణను అశ్వత్థామ రెడ్డి ప్రకటించారు. నవంబరు 3న అమరుల కోసం పల్లెబాట, 4న రాజకీయ పార్టీలతో కలిసి డిపోల ఎదుట దీక్షలు, నవంబరు 5న రహదారుల దిగ్బంధం, నవంబరు 6న కుటుంబ సభ్యల నిరసన, నవంబరు 7న ప్రజా సంఘాల నిరసన, 9న ట్యాంక్ బండ్‌పై నిరసన దీక్ష చేపట్టాలని పిలుపునిచ్చారు. అంతేకాదు నవంబరు 4, 5 తేదీల్లో ఢిల్లీలో కేంద్రం పెద్దలతో సమావేశం నిర్వహిస్తామని తెలిపారు. ఆర్టీసీ కార్మికులెవరూ ఆత్మస్థైర్యం కోల్పోవద్దని సూచించారు.  ఆర్టీసీ పరిరక్షణ కోసం రానున్న రోజుల్లో ఉద్యమం మరింత తీవ్రతరమవుతుందని పేర్కొన్నారు. ప్రజలు కూడా సహృదయంతో ఆర్టీసీ కార్మికులకు సహకరిస్తున్నారని, కానీ ప్రభుత్వం మాత్రం మొండిగా వ్యవహరిస్తోందని దుయ్యబట్టారు.

ఆర్టీసీ సమ్మె ఉధృతంగా సాగుతోంది. తమ 26 డిమాండ్ల సాధన కోసం 48వేల మంది కార్మికులు చేస్తున్న సమ్మె శనివారం 29వ రోజుకి చేరింది. రెండు తెలుగు రాష్ట్రాల్లోనూ ఇన్ని రోజుల పాటు సమ్మె కొనసాగడం ఇదే తొలిసారి. గతంలో ఉమ్మడి ఆంధ్రప్రదేశ్‌లో ఉన్నప్పుడు 2011లో ప్రత్యేక రాష్ట్రం కోసం జరిగిన పోరాటంలో సకల జనుల సమ్మెలో భాగంగా తెలంగాణ ఆర్టీసీ కార్మికులు 27 రోజుల పాటు సమ్మె చేశారు. 29 రోజులుగా సమ్మె చేస్తున్న కార్మికులకు సెప్టెంబర్ నెల జీతాలు కూడా అందలేదు. ఆర్టీసీ కార్మికుల సమ్మె కొనసాగుతున్నా.. ప్రభుత్వం నుంచి స్పందన రాలేదు. ఆర్టీసీని ప్రస్తుతం ఉన్న దశలో నడిపించడంఅసాధ్యమని, విలీనం సాధ్యం కాదని ముఖ్యమంత్రి కేసీఆర్ ఇప్పటికే స్పష్టం చేశారు. ఈ నేపథ్యంలో 17 మందికిపైగా ఆర్టీసీ కార్మికులు ప్రాణాలు కోల్పోయారు. అందులో కొందరు ఆత్మహత్యలకు పాల్పడ్డారు. కొందరు గుండెపోటుతో కన్నుమూశారు.

కరీంనగర్ జిల్లాకు చెందిన డ్రైవర్ బాబు అంత్యక్రియల సందర్భంగా పెద్ద వివాదం కూడా కొనసాగింది. ప్రభుత్వం చర్చలు జరిపే వరకు తాము అంత్యక్రియలు నిర్వహించబోమని కుటుంబసభ్యులు ప్రకటించిన నేపథ్యంలో.. పోలీసులు వారికి నచ్చజెప్పి అనంతరం అంత్యక్రియలు జరిపించారు. మరోవైపు హన్మకొండ డిపోకు చెందిన కండక్టర్ రవీందర్‌కు గుండెపోటు వచ్చింది. ఆయనకు మూడు రోజులుగా హైదరాబాద్ మ్యాక్స్ క్యూర్ ఆసుపత్రిలో చికిత్స పొందుతూ శనివారం మృతి చెందారు. సుదీర్ఘంగా సమ్మె కొనసాగుతుండడం పట్ల కార్మిక కుటుంబాల్లో ఆందోళన వ్యక్తమవుతోంది. ప్రభుత్వం సమ్మెను పరిష్కరించే దిశగా చర్యలు తీసుకోకపోవడంపై ఆవేదన వెలిబుచ్చుతున్నారు.