కోడెలపై కేసు నమోదు

సత్తెనపల్లి: పోలింగ్ జరిగి ఐదు రోజులు అయిన తరువాత రాష్ట్ర శాసన సభా పతి కోడెల శివ ప్రసాద్‌పై కేసు నమోదైంది. ఈ నెల 11న పోలింగ్ సందర్భంగా సత్తెనపల్లి నియోజకవర్గంలోని ఇనిమెట్ల గ్రామంలో పోలింగ్ బూత్ వద్ద టిడిపి,వైసిపి కార్యకర్తల మధ్య ఘర్షణ జరిగింది.

నాడు వైసిపి కార్యకర్తలు తనపై దాడికి పాల్పడ్డారని కోడెల శివ ప్రసాద్ ఇచ్చిన ఫిర్యాదు మేరకు వైసిపి అధికార ప్రతినిధి అంబటి రాంబాబు సహా 30 మందిపై పోలీసులు కేసు నమోదు చేశారు. అయితే కోడెలే బూత్ క్యాప్చరింగ్‌కు పాల్పడటంతో పాటు ఆయన వర్గీయులు తమ పార్టీ కార్యకర్తలపై దాడికి పాలడ్డారని వైసిపి నేతలు ఆరోపిస్తున్నారు. ఈ మేరకు వైసిపి నేతలు మంగళవారం నాడు రాజులపాలెం పోలీస్ స్టేషన్‌లో కోడెల సహా 22 మందిపై ఫిర్యాదు చేయగా కేసు నమోదు చేశారు.

కాగా వైసిపి అధినేత జగన్మోహన్ రెడ్డి గవర్నర్‌ని కలిసి రాష్ట్రంలో శాంతి భద్రతలు నశించాయంటూ ఫిర్యాదు చేశారు. వైసిపి నేతలపై అక్రమంగా కేసులు నమోదు చేస్తున్నారనీ, టిడిపి నేతలు దాడులకు పాల్పడుతున్నారనీ ఫిర్యాదులో పేర్కొంటూ శాంతి భద్రతల విషయంలో గవర్నర్ జోక్యం చేసుకోవాలని కోరారు.