Narasimha Movie: నరసింహ మూవీలో నీలాంబరి పాత్ర‌ను రిజెక్ట్ చేసిన స్టార్ హీరోయిన్ ఎవ‌రో తెలుసా?

Narasimha Movie: సూపర్ స్టార్ రజినీకాంత్ కెరీర్ లో ఎప్పటికీ గుర్తుండిపోయే చిత్రాల్లో నరసింహ(త‌మిళంలో పడయప్ప) ఒకటి. కె.ఎస్‌. రవికుమార్ దర్శకత్వంలో తెరకెక్కిన ఈ చిత్రంలో అలనాటి తార సౌందర్య హీరోయిన్ గా నటిస్తే.. రమ్యకృష్ణ లేడీ విలన్ గా అలరించింది. అలాగే లక్ష్మి, సితార, రాజా రవీంద్ర, నాజర్‌, అబ్బాస్, ప్రీతా విజయకుమార్ తదితరులు కీలక పాత్రలు పోషించారు.

1999లో తమిళ్, తెలుగు భాషల్లో విడుదలైన ఈ చిత్రం సంచ‌ల‌న‌ విజయాన్ని నమోదు చేసింది. బాక్సాఫీస్ వద్ద భారీ వ‌సూళ్ల‌ను సాధించి ఇండస్ట్రీ హిట్ గా నిలిచింది. మరో ఆశ్చర్యపరిచే విషయం ఏంటంటే జపాన్ లో కూడా ఈ సినిమాకు అద్భుత ఆదరణ లభించింది. ఇకపోతే నరసింహ‌ సినిమాలో రజనీకాంత్ తర్వాత రమ్యకృష్ణ బాగా హైలెట్ అయ్యింది. ఇందులో రమ్యకృష్ణ పోషించిన నీలాంబరి పాత్రను ప్రేక్షకులు అంత త్వరగా మర్చిపోలేరు. అప్పటివరకు స్టార్ హీరోయిన్ గా గ్లామర్ పాత్రల్లో అలరించిన ఆమె.. నరసింహ సినిమా ద్వారా న‌టిగా త‌న‌లోని మరో కోణాన్ని ప్రేక్షకులకు పరిచయం చేసింది.

లేడీ విలన్ గా ఆమె కనబరిచిన నటన సినీ ప్రియుల‌తో పాటు విమర్శకుల‌ను సైతం మెప్పించింది. అయితే చాలామందికి తెలియని విషయం ఏమిటంటే.. నీలాంబరి క్యారెక్టర్ కు ఫస్ట్ ఛాయిస్ రమ్యకృష్ణ కాదు. ప్రముఖ స్టార్ హీరోయిన్ ను మొదట నీలాంబరి క్యారెక్టర్ కోసం సంప్రదించారు. ఇంతకీ ఆ హీరోయిన్ మరెవరో కాదు మీనా. రజినీకాంత్, మీనా జంటగా ఎన్నో సూపర్ హిట్ చిత్రాల్లో నటించారు. వెండితెర‌పై వీరిద్దరిది హిట్ కాంబినేషన్. అయితే నరసింహ మూవీ లో నెగిటివ్ షేడ్స్ ఉన్న నీలాంబ‌రి పాత్ర‌ను చేయమని డైరెక్టర్ కే.ఎస్‌. రవికుమార్ మీనా ను సంప్రదించారట.

ఆ సమయంలో మీనా హోమ్లీ పాత్రలు చేస్తూ స‌త్తా చాటుతోంది. అలాంటి త‌రుణంలో నెగటివ్ రోల్ చేయవద్దని మీనాకు ఆమె తల్లి సూచించారట. దాంతో అమ్మ మాట మేరకు న‌ర‌సింహ మూవీని రిజెక్ట్ చేశారు. ఆ త‌ర్వాత మీనా చాలా బాధపడ్డారు. ఎందుకంటే నీలాంబరి క్యారెక్టర్ మీనాకు ఎంతో బాగా నచ్చింది. అయితే తల్లి అడ్డు చెప్పడంతో ఆమె అయిష్టంగానే నో చెప్పారు. ఇక అప్పుడు డైరెక్ట‌ర్ ర‌వికుమార్ రమ్యకృష్ణను ఆ పాత్రకు ఎంపిక చేశారు. అలా నీలాంబరి క్యారెక్టర్ మీనా చేతుల నుంచి చేజారింది. తాజాగా ఓ ఇంటర్వ్యూలో ఈ విషయాన్ని మీనా స్వయంగా బయట పెట్టారు.