Mohan Babu: రాజకీయాలకు గుడ్ బైయే కానీ మోడీ పిలిస్తే..!!

Mohan Babu: టాలీవుడ్ సీనియర్ నటుడు, రాజ్యసభ మాజీ సభ్యుడు మోహన్ బాబు వైసీపీ నుండి దూరం జరిగారా బీజేపీ నుండి ఆహ్వానం వస్తే వెళ్లేందుకు సిద్దంగా ఉన్నారా అంటే అవుననే సమాధానం వస్తుంది. ఏబిఎన్ ఛానల్ లో ఓపెన్ హార్ట్ విత్ ఆర్కే కార్యక్రమంలో మోహన్ బాబు పలు సంచలన వ్యాఖ్యలు చేశారు. ఎన్టీ రామారావు తెలుగుదేశం పార్టీ స్థాపించిన తరువాత ఆ పార్టీలో చేరిన మోహన్ బాబు 1995 నుండి ఆరు సంవత్సరాల పాటు రాజ్యసభ సభ్యుడుగా బాధ్యతలు నిర్వహించారు. గత ఎన్నికల ముందు టీడీపీ గుడ్ బై చెప్పి వైసీపీలో చేరారు. 2019 ఎన్నికల్లో వైసీపీ తరపున ఎన్నికల ప్రచారంలోనూ పాల్గొన్నారు. అయితే ఎన్నికల్లో వైసీపీ అఖండ విజయం సాధించి ముఖ్యమంత్రిగా వైఎస్ జగన్మోహనరెడ్డి ప్రమాణ స్వీకారం చేసిన తరువాత మోహన్ బాబు వైసీపీకి దూరంగా ఉన్నారు. ప్రధాన మంత్రి మోడీ ఆహ్వానం మేరకు 2020లో కుమారులు, కుమార్తెతో కలిసి ఢిల్లీ వెళ్లి మోడీ అతిధ్యాన్ని స్వీకరించారు. వైసీపీ అధికారంలోకి వచ్చిన తరువాత టీటీడీ చైర్మన్ రేసులో మోహన్ బాబు ఉన్నట్లు వార్తలు వచ్చాయి. ఆ సమయంలో మోహన్ బాబు క్లారిటీ ఇచ్చారు. నామినేటెడ్ పదవులు ఆశించి వైసీపీలో చేరలేదనీ, ముఖ్యమంత్రిగా వైఎస్ జగన్ ను చూడాలన్న ఆశతోనే వైసీపీలో చేరి తన వంతు కృషి చేసినట్లు తెలిపారు. అయితే ఉన్నత విద్యావ్యవస్థలో నెలకొన్న సమస్యలపై మోహన్ బాబు సూచనలను సైతం ప్రభుత్వం పట్టించుకోలేదని సమాచారం. ఈ విషయాలను పక్కన బెడితే మోహన్ బాబు తన ఇంటర్వ్యూలో కీలక విషయాలను వెల్లడించారు.

Mohan Babu: మోడీ ఆహ్వానిస్తే కాషాయం గూటికి..?

మళ్లీ రాజకీయాల్లోకి రానని పేర్కొన్న మోహన్ బాబు 99 శాతం రాజకీయాలకు గుడ్ బై చెప్పినట్లేనని పేర్కొన్నారు. ఆ ఒక్క శాతం ఎందుకన్న ప్రశ్నపై మోడీ కోసం అన్నట్లుగా సమాధానం చెప్పారు. గతంలో ప్రధాన మంత్రి నరేంద్ర మోడీ తన కుటుంబాన్ని ఢిల్లీకి ఆహ్వానించిన విషయాన్ని మోహన్ బాబు గుర్తు చేస్తూ నాడు ఢిల్లీలో పీఎం మోడీ ఇది నీ ఇల్లే అనుకో, ఎప్పుడైనా రావచ్చు అని అప్యాయంగా చెప్పారని వివరించారు. అందుకే ఒక వేళ ఎప్పుడైనా రాజకీయాల్లోకి వచ్చేందుకు ఆ ఒక్క శాతం మాత్రం అవకాశం ఉందని మోహన్ బాబు తెలిపారు. అంటే మోడీ ఆహ్వానిస్తే 2024 ఎన్నికల నాటికి మోహన్ బాబు కాషాయం కండువా కప్పుకోవడానికి సిద్ధం అన్నట్లుగా ఆయన వ్యాఖ్యలను బట్టి అర్ధం చేసుకోవచ్చు. ఇదే సందర్భంలో తమ ప్రాణ స్నేహితుడు రజనీకాంత్ కు రాజకీయాల్లోకి వెళ్లొద్దని సలహా ఇచ్చానని చెప్పుకొచ్చారు మోహన్ బాబు. తన సలహా మేరకే రాజనీకాంత్ కూడా ఆ తరువాత అంగీకరించారని మోహన్ బాబు పేర్కొన్నారు.

జగన్ కు తప్పుడు సలహాలు ఇస్తున్న కొందరు ఐఏఎస్ లు

ఇక ఏపి రాజకీయాలపై మాట్లాడుతూ తనకు చంద్రబాబు, వైఎస్ జగన్ ఇద్దరూ బంధువులేనని పేర్కొన్నారు మోహన్ బాబు. గతంలో చంద్రబాబుకు కూడా ఎన్నికల సమయంలో ప్రచారం చేశాననీ, జగన్ కు కూడా ఓ సారి ప్రచారం చేద్దామన్న ఉద్దేశంతో గత ఎన్నికల్లో వైసీపీలో చేరి ఆ పార్టీ తరుపున పని చేసినట్లు వివరించారు. అంతకు మించి తాను ఏ ప్రయోజనం ఆశించి జగన్ కు ప్రచారం చేయలేదని మోహన్ బాబు అన్నారు. ఐఏఎస్ అధికారుల్లో కొందరు చంద్రబాబు హయాం నుండి పని చేస్తున్న వారు ఉన్నారని పేర్కొన్న మోహన్ బాబు కొందరు సీఎం జగన్ ను తప్పుదోవ పట్టిస్తున్నారని అన్నారు. కొందరు ఐఏఎస్ అధికారులు తప్పుడు సలహాలు ఇవ్వడం వల్లనే రాష్ట్రంలో ఉన్నత విద్యా వ్యవస్థల విధానం దెబ్బతిన్నదని ఆరోపించారు.