వెనక్కి తగ్గని రైతులు.. రాజధానిలో పోలీసుల ఆంక్షలు

అమరావతి: రాజధాని తరలింపును వ్యతిరేకిస్తూ అమరావతి పరిధిలోని గ్రామాల్లో రైతుల నిరసన ప్రదర్శనలు కొనసాగుతున్నాయి. పోలీసుల ఆంక్షల మధ్యే రైతులు ఆందోళనలకు దిగుతున్నారు. రైతులు ఆందోళన చేయకుండా పోలీసులు అడ్డుకుంటున్నారు. సెక్షన్ 144, పోలీస్ యాక్ట్‌ 30 అమల్లో ఉన్నాయని మైకులో చెబుతూ పోలీసులు కవాతు చేస్తున్నారు. ఆంక్షల దృష్ట్యా ప్రజలు బయటకు రావద్దని, గూమి కూడవద్దని హెచ్చరికలు జారీ చేశారు. మందడం రోడ్డుపై రైతులు టెంటు వేసేందుకు పోలీసులు అనుమతి నిరాకరించారు.

తుళ్లూరులో రైతులు టెంట్‌ వేయడాన్ని అడ్డుకున్నారు. ప్రైవేట్‌ స్థలంలో టెంట్‌ వేసి శాంతియుతంగా ధర్నా చేసేందుకు రైతుల యత్నించారు. ఈ నేపథ్యంలో తుళ్లూరు, మందడంలో భారీగా పోలీసులు మోహరించారు. రాజధాని ప్రాంత గ్రామాల్లో పోలీస్ పికెటింగ్, 144 సెక్షన్‌, 30 యాక్ట్ అమలులో ఉందని పోలీసులు తెలిపారు. ఇళ్లనుంచి ఎవరూ బయటకు రావొద్దంటూ పోలీసులు ప్రచారం చేశారు. మందడంలోని పలు కాలనీల్లో పోలీసులు కవాతు చేశారు.

కాగా, ఏపీలో మూడు రాజుధానులు ఉండవచ్చునంటూ సీఎం జగన్ ప్రకటనను నిరసిస్తూ.. 29 గ్రామాల రైతులు ధర్నాలు చేస్తున్న విషయం తెలిసిందే.