కేంద్రం చేతిలో ఏపి కౌన్సిల్ భవితవ్యం

(న్యూస్ ఆర్బిట్ బ్యూరో)

అమరావతి: ఆంధ్రప్రదేశ్ శాసనమండలి భవితవ్యం కేంద్రం చేతికి వెళ్లడంతో అక్కడ నుంచి ఎటువంటి నిర్ణయం వస్తుందన్న ఆసక్తి సర్వత్రా వ్యక్తం అవుతున్నది. మండలిని రద్దు తీర్మానాన్ని శాసనసభలో ఆమోదించి కేంద్రానికి పంపిన విషయం తెలిసిందే. శాసనమండలి రద్దు సిఎం జగన్ అనుకున్నంత సులువు కాదని టిడిపి పార్లమెంట్ సభ్యులు కేశినేని నాని, కనకమేడల రవీంద్రకుమార్ పేర్కొంటున్నారు. ఇప్పటికే పది రాష్ట్రాలు శాసనమండలిలను పునరుద్ధరించాలని పంపిన ప్రతిపాదనలు కేంద్రం వద్ద పెండింగ్‌లో ఉన్నాయని వారు చెబుతున్నారు. వాటిపై ఇప్పటి వరకూ కేంద్రం ఎటువంటి నిర్ణయం తీసుకోనందున దీనిపైనా వెంటనే నిర్ణయం తీసుకునే అవకాశం లేదని వారు అంటున్నారు. అయితే బిజెపి రాజ్యసభ సభ్యుడు జివిఎల్ నర్శింహరావు మాత్రం కేంద్ర ప్రభుత్వం రాజ్యంగ బద్ధంగానే వ్యవహరిస్తుందనీ, రాష్ట్ర ప్రభుత్వ తీర్మానానికి కేంద్రం అడ్డు చెప్పే అవకాశం లేదనీ అనడం గందరగోళానికి దారి తీసినట్లు అయ్యింది.
సిఆర్‌డిఏ రద్దు, వికేంద్రీకరణ బిల్లులను శాసనమండలి సెలెక్ట్ కమిటీకి పంపిన నేపథ్యంలో ఆగ్రహించిన ముఖ్యమంత్రి జగన్మోహనరెడ్డి మండలి రద్దు చేయాలని అనూహ్య నిర్ణయం తీసుకున్నారు. శాసనమండలి రద్దు నిర్ణయాన్ని రాష్ట్రంలోని ప్రధాన ప్రతిపక్షం టిడిపితో సహా బిజెపి, జనసేన తదితర రాజకీయ పక్షాలు అన్నీ వ్యతిరేకిస్తున్నాయి. మండలి రద్దుపై తీర్మానాన్ని అసెంబ్లీలో ఆమోదించిన మరుసటి రోజే రాష్ట్ర ప్రభుత్వం దీనికి సంబంధించిన నివేదికను కేంద్రానికి పంపింది. ఇప్పుడు కేంద్రం దీనిపై ఎటువంటి నిర్ణయం తీసుకోనున్నది అనేది ఆసక్తికరంగా మారింది.

రాష్ట్ర ప్రభుత్వ నిర్ణయానికి కేంద్రం ఒకే చెప్పి వెంటనే ఉభయసభల్లో బిల్లు ఆమోదింపజేసి రాష్ట్రపతి ద్వారా మండలి రద్దుకు ఉత్తర్వులు ఇస్తే ఇక్కడి వైసిపి ప్రభుత్వాన్ని కేంద్రంలోని బిజెపి అదుకున్నట్లు లెఖ్క. అయితే ఇక్కడి రాష్ట్ర బిజెపి నాయకత్వం వైసిపి ప్రభుత్వం చర్యను సమర్థించడం లేదు. మరో పక్క తెలుగుదేశం పార్టీ తమ ఎంపిల ద్వారా శాసనమండలి రద్దు కాకుండా కేంద్రంపై ఒత్తిడి చేయాలని చూస్తున్నది. రాష్ట్రంలోని అన్ని రాజకీయ పక్షాలు కౌన్సిల్ రద్దు నిర్ణయాన్ని వ్యతిరేకిస్తున్న ఈ తరుణంగా ప్రభుత్వ నిర్ణయాన్ని గౌరవించి మండలి రద్దుకు కేంద్రం వెంటనే నిర్ణయం తీసుకుంటుందా? తీసుకుంటే…ఇప్పటేకే పెండింగ్‌లో ఉన్న పది రాష్ట్రాల శాసనమండలిల పునరుద్ధరణ ప్రతిపాదనలపై ఆయా రాష్ట్ర ప్రభుత్వాలు కేంద్రంపై ఒత్తిడి చేసే అవకాశం ఏర్పడుతోంది.