అభివృద్ధి వికేంద్రీకరణను స్వాగతిస్తున్నా: రాపాక

అమరావతి: మూడు రాజధానులపై ప్రభుత్వ ప్రతిపాదనను వ్యతిరేకించాలని జనసేన అధినేత పవన్ కల్యాణ్ స్పష్టం చేసినా..ఎమ్మెల్యే రాపాక పార్టీ నిర్ణయాన్ని ధిక్కరించారు. ఆంధ్రప్రదేశ్‌లో మూడు రాజధానులు ఏర్పాటు చేయాలనే వైసీపీ ప్రభుత్వ ప్రతిపాదనను స్వాగతిస్తున్నానని అసెంబ్లీ వేదికగా జనసేన ఎమ్మెల్యే రాపాక వరప్రసాద్ స్పష్టం చేశారు. అభివృద్ధి వికేంద్రీకరణ, సీఆర్‌డీఏ రద్దు అంశాలపై అసెంబ్లీలో చర్చ సందర్భంగా ఎమ్మెల్యే రాపాక ప్రసంగించారు. రాష్ట్రంలోని 13 జిల్లాలు అభివృద్ధి చెందాలని ఆయన ఆకాంక్షించారు. విశాఖపట్టణం ఎగ్జిక్యూటీవ్ రాజధాని అయితే వలసలు తగ్గుతాయని అభిప్రాయపడ్డారు. అభివృద్ధి ఒకేచోట జరగడం సమంజసం కాదని, అభివృద్ధి వికేంద్రీకరణను స్వాగతిస్తున్నామని చెప్పారు. ప్రతీ దాన్ని ప్రతిపక్షం వ్యతిరేకించడం భావ్యం కాదన్నారు.

మూడు రాజధానుల ఏర్పాటు అంశంపై ప్రజాభిప్రాయం సేకరించాలని టీడీపీ ఎమ్మెల్యే నిమ్మల రామానాయుడు చేసిన వ్యాఖ్యలను ఈ సందర్భంగా రాపాక ప్రస్తావించారు. రామానాయుడు చెప్పినట్టుగా ప్రజాభిప్రాయం సేకరిస్తే అసలు విషయం తెలుస్తుందన్నారు. మూడు రాజధానులకు ఎవరూ వ్యతిరేకంగా లేరని, అందరూ అనుకూలంగానే ఉన్నారని అభిప్రాయపడ్డారు. ప్రజల అభిప్రాయమే తమ అభిప్రాయమని, యావత్తు రాష్ట్రం అభివృద్ధి చెందాలన్న ఉద్దేశంలో ప్రజలు ఉన్నారని చెప్పారు. మూడు రాజధానులు వద్దని ప్రతిపక్షంలో ఉన్న రామానాయుడు మాట్లాడాలి కనుక మాట్లాడుతున్నారే తప్ప, నిజంగా అయితే ఆయనకు కూడా ఇష్టమేనని చెప్పారు. సీఆర్డీఏ బిల్లు రద్దుకు జనసేన పార్టీ తరఫున మద్దతు తెలుపుతున్నానని, యువ ముఖ్యమంత్రి జగన్ ని అభినందిస్తున్నానని ఎమ్మెల్యే రాపాక చెప్పుకొచ్చారు.

మరోవైపు ప్రభుత్వ నిర్ణయాన్ని వ్యతిరేకించాలని పవన్ చెప్పినా.. రాపాక పట్టించుకోకపోవడం సర్వత్రా చర్చనీయాంశమైంది. పార్టీ నిర్ణయాలకు వ్యతిరేకంగా వ్యవహరించిన ఎమ్మెల్యే రాపాకపై క్రమశిక్షణా చర్యలు తీసుకునే అవకాశాలున్నట్లు తెలుస్తోంది.

గత కొద్ది రోజులుగా రాపాక వరప్రసాద్ సీఎం వైఎస్ జగన్‌పై ప్రశంసలు కురిపిస్తున్నారు. ఆయన వ్యవహరం రాష్ట్ర రాజకీయాల్లో చర్చనీయాంశంగా మారింది. అధికార వైసీపీ నిర్ణయాలకు మద్దతు ఇస్తూ ఆపార్టీకి దగ్గర అయ్యేందుకు ప్రయత్నిస్తున్నారని సొంత పార్టీ నేతలు ఆగ్రహం వ్యక్తం చేస్తున్నారు. గత అసెంబ్లీ సమావేశాల సందర్భంగా సీఎం జగన్ ప్రతిపాదించిన మూడు రాజధానులకు కూడా రాపాక మద్దతు ఇచ్చారు. రాజధానిపై పవన్ నిర్ణయంతో తనకు సంబంధం లేదని.. ఆయన ఇంట్లోనే రెండు అభిప్రాయాలు ఉన్నాయని చెప్పుకొచ్చారు. పవన్ కూడా మూడు రాజధానుల్ని వ్యతిరేకించడం లేదని.. పార్టీ అధినేతగా నిర్ణయం ఆయనదేనని.. తనకు పార్టీ కన్నా ఓట్లేసి గెలిపించిన ప్రజలే ముఖ్యం చెప్పారు. అమరావతి భూములు లాక్కున్నప్పుడు పవన్ ఆందోళన చేశారని గుర్తు చేశారు.

రాపాక వ్యవహార శైలిపై పార్టీ నేతలు తీవ్ర ఆగ్రహం వ్యక్తం చేస్తున్నారు. పార్టీ అధినేత పవన్ కల్యాణ్ ఏపీ ప్రభుత్వ తీరుపై మండిపడుతుంటే.. రాపాక మాత్రం అనుకూల వ్యాఖ్యలు చేస్తున్నారు. పార్టీలో కొనసాగుతూనే.. ఇలా జగన్ సర్కార్ నిర్ణయాలకు మద్దతు పలకడం వారికి ఇబ్బందిగా మారింది. రాజధాని సహా పలు అంశాలపై జగన్ ప్రభుత్వాన్ని జనసేన అధినేత విమర్శలు గుప్పిస్తుంటే.. రాపాక మాత్రం ప్రభుత్వ నిర్ణయాలను సమర్థించడం హాట్‌టాపిక్‌గా మారింది. ఈ నేపథ్యంలో రాపాక వ్యవహారంపై జనసేన చర్యలు తీసుకునే అవకాశం ఉంది.