Breaking: జగన్ పై హత్యాయత్నం కేసు .. కోడికత్తి శ్రీనుకు షరతులతో బెయిల్ మంజూరు చేసిన హైకోర్టు

Breaking:  ఏపీ సీఎం వైఎస్ జగన్మోహనరెడ్డిని ప్రతిపక్ష నేతగా ఉన్న సమయంలో కోడికత్తితో విశాఖ ఎయిర్ పోర్టులో దాడి చేసిన జనుపల్లి శ్రీనివాస్ కు ఏపీ హైకోర్టు బెయిల్ మంజూరు చేసింది. జనుపల్లి శ్రీనివాస్ గత అయిదేళ్లుగా జైలులో అండర్ ట్రైల్ ఖైదీగా ఉన్నారు. ప్రస్తుతం విశాఖ సెంట్రల్ జైలులో కోడికత్తి శ్రీను ఉన్నాడు.

ఈ కేసులో సాక్షి అయిన సీఎం జగన్మోహనరెడ్డి కోర్టుకు వచ్చి సాక్ష్యం చెప్పాలని, లేకుంటే బెయిల్ అయినా ఇవ్వాలంటూ నిందితుడు తల్లి, సోదరుడు గత కొద్ది రోజులుగా నిరసన వ్యక్తం చేశారు. పలు మార్లు  నిందితుడు దాఖలు చేసిన బెయిల్ పిటిషన్ ను న్యాయస్థానాలు డిస్మిస్ చేశారు. తాజాగా మరో సారి నిందితుడు తరపున హైకోర్టులో న్యాయవాది బెయిల్ పిటిషన్ దాఖలు చేశారు.

దీనిపై వాదనలు పూర్తి కాగా ఇటీవల హైకోర్టు తీర్పు రిజర్వు చేసింది. ఇవేళ హైకోర్టు తీర్పు వెల్లడించింది. వారానికి ఒక రోజు ముమ్మడివరం పోలీస్ స్టేషన్ కు హజరై రిజిస్టర్ లో సంతకం చేయాలని, కేసు విషయాలపై మీడియాతో మాట్లాడవద్దని, బహిరంగ సభల్లో పాల్గొనవద్దనీ షరతులు విధిస్తూ హైకోర్టు .. శ్రీనివాస్ కు బెయిల్ మంజూరు చేసింది. జనుపల్లి శ్రీనివాస్ కు బెయిల్ మంజూరు కావడం పట్ల ప్రజా సంఘాలు, ఆతని కుటుంబ సభ్యులు హర్షం వ్యక్తం చేస్తున్నారు.

2018 అక్టోబర్ 25న విశాఖ ఎయిర్ పోర్టులో జనుపల్లి శ్రీనివాస్ కోడి కత్తితో వైఎస్ జగన్మోహనరెడ్డిపై దాడి చేశాడు.  అప్పట్లో ఎయిర్ పోర్టు పోలీసులు సెక్షన్ 307 కింద కేసు నమోదు చేశారు. ఆ తర్వాత ఎన్ఐఏ కూడా శ్రీనివాస్ పై మరో కేసు నమోదు చేసి దర్యాప్తు చేపట్టింది. కేసు విచారణ తర్వాత అప్పట్లో నిందితుడైన శ్రీనివాస్ 2019 మే 25న కోర్టు బెయిల్ పై విడుదల అయ్యాడు. మళ్లీ 75 రోజుల తర్వాత 2019 ఆగస్టు 13న ఎన్ఐఏ అధికారులు విచారణ నిమిత్తం శ్రీనును అదుపులోకి తీసుకున్నారు. శ్రీనుకు ఇచ్చిన బెయిల్ రద్దు చేసి మళ్లీ జైలులో పెట్టారు. అప్పటి నుండి రిమాండ్ ఖైదీగా జైల్ లో ఉన్నాడు.

NIA: హైదరాబాద్ లో ఎన్ఐఏ సోదాలు .. ఎవరెవరి నివాసాల్లో అంటే..?