టీడీపీ కీలక నేతల్లో అసమ్మతులు..! జగన్ ఊ అంటే ఇక క్యూ తప్పదు..!!

అధికారం లేదు. ప్రతిపక్ష హోదా ఉంటుందో, పోతుందో తెలియదు. కార్యకర్తల్లో హుషారు ఎప్పుడు వస్తుందో తెలియదు..! ఈ క్రమంలో పార్టీని ఎలా కాపాడుకోవాలి..? కీలక నేతలకు ఎంతగా ప్రాధాన్యత ఇవ్వాలి..? చంద్రబాబుకి ఆ మాత్రం తెలియదా..? ఫార్టీ ఇయర్స్ బాబుకి ఈ మాత్రం సర్దుబాట్లు తెలియవా..? తెలిసినా లక్ష్యమా..? అందుకే ఇప్పుడు పార్టీలో అసమ్మతి సెగ రగులుతుంది. లోలోపల ఉన్న సెగ రేపో, మాపో పైకి వచ్చే అవకాశం ఉంది..!!

శ్రీకాకుళం నుండి చిత్తూరు వరకు అదే తంతు..!!

మొన్నటి పదవుల పంపకంలో పార్టీలో అంతర్గత సెగ వేడి పెరుగుతుంది. శ్రీకాకుళం జిల్లాలో కీలక నేతలకు సరైన పదవులు ఇవ్వలేదంటూ రగిలిపోతున్నారట. విశాఖపట్నంలో పార్టీని బలోపేతం చేయాల్సిన చోట ఇలా వదిలేయడం ఏమిటంటూ ఆవేదన చెందుతున్నారట. పశ్చిమ గోదావరిలో చింతమనేని వర్గం గుర్రుగా ఉందట. ఇటు ప్రకాశం జిల్లాలో ఒక్కరికీ రాష్ట్రస్థాయి పదవులు ఇవ్వలేదేంటి..? అంటూ లోలోపల ప్రశించుకుంటున్నారట. మరోవైపు గుంటూరు, నెల్లూరు, అనంతపురం, చిత్తూరు జిల్లాల్లోనూ అసంతృప్తి సెగ రగులుతుంది. వేడిగా సలసలా కాగుతుంది. ఏ క్షణమైనా బయటకు ఉబికెందుకు సిద్ధమవుతోంది.

కొన్ని ఉదాహరణలు ఇవిగో..!!

* ప్రతిభాభారతి గురించి అందరికీ తెలుసు. ఏపీలో మొదటి మహిళా స్పీకర్. అంతకు ముందు రెండు సార్లు మంత్రిగానూ పని చేసారు. అయితే కాలం కలిసిరాక 2014 లో 512 తేడాతో ఓడిపోయారు. ఆమె టీడీపీ పొలిట్ బ్యూరోలో ఉండేవారు. ఆమెను తప్పించి, జాతీయ ఉపాధ్యక్షురాలిగా చేశారు. పొలిట్ బ్యూరో అంటే కీలకం, జాతీయ ఉపాధ్యక్షురాలు అంటే నాకెందుకు అంటూ ఆమె సన్నిహితులు వద్ద వాపోతున్నారట. రెండు రోజుల కిందటే “నాకు ఈ పదవి వద్దు” అంటూ చంద్రబాబుకి లేఖ రాసినట్టు సమాచారం. ఇదే జిల్లాలోని గౌతు లచ్చన్న మనవరాలు, గౌతు శిరీషకి కూడా సరైన ప్రాధాన్యత దక్కలేదని అంటున్నారు.

* ఇక పశ్చిమ గోదావరి జిల్లాలో చింతమనేని ప్రభాకర్ టీడీపీకి కీలక నేత. ఒకప్పుడు జిల్లాలో టీడీపీని ఒంటరిగా తన భుజాన మోశారు. ఆయన నోటి దురుసు కారణంగా మంత్రి అవకాశం రాలేదు. కానీ ఇప్పుడు కనేసాం పార్టీలో పదవి కూడా ఇవ్వలేదు. మంత్రి అంటే పనికిరాకపోవచ్చు.., ఏం..? పార్టీ పదవులకు మా నాయకుడు పనికిరాడా..? అంటూ ఆయన వర్గం పార్టీపై గుర్రుగా ఉంది. చింతమనేని ద్వారానే రాజకీయాల్లోకి వచ్చి సీటు దక్కించుకున్న గన్ని వీరాంజనేయులుకి పార్లమెంటు అధ్యక్షుడు ఇచ్చారు. చింతమనేనికి రాష్ట్రస్థాయి పదవి ఆశించినప్పటికీ రాలేదు.

* ప్రకాశం జిల్లాలో టీడీపీకి మంచి ఓటు బ్యాంకు ఉంది. నిజానికి 2019 ఎన్నికల్లో అత్యధిక స్థానాలు వచ్చిన జిల్లా ప్రకాశమే. మొత్తం 12 లో 4 గెలిచారు. తూర్పుగోదావరిలో 19 కి 4 .., విశాఖలో 16 లో 4 గెలిచారు. కానీ ఆ జిల్లా నుండి ఏ ఒక్కరికీ రాష్ట్రస్థాయి పదవి రాకపోవడం అనేక ప్రశ్నలను మిగులుస్తుంది. చిత్తూరు జిల్లాలో గల్లా అరుణకుమారి జాతీయ ఉపాధ్యక్షురాలిగా అవకాశం ఇచ్చారు. కానీ ఆమెకు అసంతృప్తి ఉందట.

జగన్ ఒకే అంటే క్యూ తప్పదు..!!

టీడీపీపై ఇప్పట్లో ఆశలు లేవు. మరోవైపు చంద్రబాబు చుస్తే ఇంకా ఆ పాత కాలం లెక్కలతో నెట్టుకొస్తున్నారు. అధికార పార్టీ దూకుడుగా ఉన్నప్పుడు ప్రతిపక్షంలో యువ నేతలు, దూకుడుగా ఉన్న నేతలకు రాష్ట్రస్థాయిలో పదవులు ఇవ్వకపోతే ఎలా అంటూ ప్రశ్నిస్తున్నారట. అందుకే ఇప్పుడు కొన్ని కొత్త మాటలు వస్తున్నాయి. జగన్ ఒకే అంటే కొందరు మాజీలు, దాదాపు 10 మంది టీడీపీ ప్రముఖులు సైతం వైసీపీకి జంపయ్యేందుకు సిద్ధంగా ఉన్నారని టీడీపీలోనే అంతర్గతంగా వినిపిస్తున్న మాటలు.