Aa Okkati Adakku: తెలుగు చలనచిత్ర పరిశ్రమలో కామెడీ హీరోగా నట కిరీటి రాజేంద్రప్రసాద్ తర్వాత అంతటి ఇమేజ్ సంపాదించుకున్న ఏకైక నటుడు ఎవరైనా ఉన్నారా అంటే అది ఒక్క అల్లరి నరేష్ మాత్రమే. అటువంటి అల్లరి నరేష్ నుంచి ఇటీవల వచ్చిన రొమాంటిక్ కామెడీ మూవీ ఆ ఒక్కటి అడక్కు. మల్లి అంకం దర్శకత్వం వహించిన ఈ చిత్రంలో టాల్ అండ్ టాలెంటెడ్ బ్యూటీ ఫరియా అబ్దుల్లా హీరోయిన్ గా నటించింది. వెన్నెల కిషోర్, బాలీవుడ్ కమెడియన్ జానీ లివర్ కూతురు జామీ లివర్, హర్ష చెముడు, హరితేజ, రవి కిషోర్ తదితరులు ఇతర ముఖ్యమైన పాత్రలను పోషించారు.
చిలక ప్రొడక్షన్స్ బ్యానర్ పై రాజీవ్ చిలక నిర్మించిన ఈ చిత్రానికి గోపి సుందర్ సంగీతం అందించాడు. మంచి అంచనాల నడుమ 2024 మే 3న విడుదలైన ఆ ఒక్కటి అడక్కు సినిమాకు ప్రేక్షకుల నుంచి మిశ్రమ స్పందన లభించింది. ఆ ఒక్కటి అడక్కు టైటిల్ పెట్టి, అల్లరి నరేష్ ని హీరోగా పెడితే నాన్ స్టాప్ కామెడీ ఉంటుందని సినీ ప్రియులంతా భావించారు. థియేటర్స్ లో హాయిగా రెండు గంటల పాటు నవ్వుకోవచ్చని అనుకున్నారు. కానీ వారి ఆశలపై డైరెక్టర్ నీళ్లు జల్లేశాడు.
కామెడీ ట్రాక్ బలహీనంగా ఉండటం ఈ సినిమాకు పెద్ద మైనస్ అయింది. సినిమాలో చాలా భాగం సీరియస్ పాయింట్ తోనే వెళుతుంది. అక్కడక్కడ కొన్ని కామెడీ సన్నివేశాలు ఉన్నా.. వాటిలో ఆకట్టుకున్నవి మాత్రం వేళ్ళ పై లెక్క పెట్టవచ్చు. అయితే పెళ్లికాని మిడిల్ ఏజ్ పర్సన్ ఫ్రస్టేషన్ను మరియు మాట్రిమోనీ పేరుతో జరిగే మోసాలను మాత్రం దర్శకుడు బాగానే ప్రజెంట్ చేశాడు. హీరోయిన్ ఫరియా అబ్దుల్లా మరోసారి తన యాక్టింగ్ తో అందర్నీ ఇంప్రెస్ చేసింది. అల్లరి నరేష్ పక్కన పర్ఫెక్ట్ గా సెట్ అయింది.
అయితే టాక్ అనుకూలంగా లేకపోవడం వల్ల ఆ ఒక్కటి అడక్కు సినిమాకు కలెక్షన్స్ అంతంత మాత్రంగానే వస్తున్నాయి. తాజాగా ఈ మూవీ ఫస్ట్ వీక్ కలెక్షన్స్ లెక్క బయటకు వచ్చింది. విడుదలైన 7వ రోజు తెలుగు రాష్ట్రాల్లో రూ. 9 లక్షల రేంజ్ లో షేర్ ని సొంతం చేసుకున ఆ ఒక్కటి అడక్కు చిత్రం.. వరల్డ్ వైడ్ గా రూ. 10 లక్షల రేంజ్ లో షేర్ ని, రూ. 25 లక్షల రేంజ్ లో గ్రాస్ ను సొంతం చేసుకుంది.
ఫస్ట్ వీక్ మొత్తం కలెక్షన్స్ ను గమనిస్తే.. తెలుగు రాష్ట్రాల్లో రూ. 2.26 కోట్ల షేర్, రూ. 4.80 కోట్ల గ్రాస్ వసూళ్లు వచ్చాయి. అలాగే వరల్డ్ వైడ్ గా రూ. 2.60 కోట్ల షేర్, రూ. 5.85 కోట్ల గ్రాస్ కలెక్షన్స్ ను ఈ సినిమా తొలి వారంలో రాబట్టింది. ఆ ఒక్కటి అడక్కు సినిమా రూ. 4.50 కోట్ల బ్రేక్ ఈవెన్ టార్గెట్ తో బరిలోకి దిగింది. అయితే ఫస్ట్ వీక్ ముగిసే సమయానికి రూ. 2.60 కోట్లు మాత్రమే వచ్చాయి. ఇంకా రూ. 1.9 కోట్ల రేంజ్ లో షేర్ ని అందుకుంటే అల్లరి నరేష్ హిట్ కొట్టినట్లే అవుతుంది.