‘ప్రజారాజధాని పోరాటం కొనసాగుతుంది’

( న్యూస్ ఆర్బిట్ డెస్క్)

విజయవాడ: శాంతి భద్రతల పేరుతో శాంతియుతంగా చేస్తున్న ఆందోళనలను అణచివేయాలని చూస్తే మరింత రెచ్చిపోతామని టిడిపి అధినేత చంద్రబాబు అన్నారు.విజయవాడ బెంజ్ సర్కిల్ సమీపంలో వేదిక కళ్యాణ మండపంలో ఏర్పాటు చేసిన అమరావతి పరిరక్షణ సమితి సమావేశంలో చంద్రబాబుతో పాటు వివిధ పార్టీల నేతలు పాల్గొన్నారు. ఈ సందర్భంగా చంద్రబాబు మాట్లాడుతూ ఎన్ని అడ్డంకులు సృష్టించినా ప్రజా రాజధాని కోసం తమ పోరాటం ఆగదని స్పష్టం చేశారు. రాజధాని కోసం పోరాడుతూ ఇప్పటికే 11 మంది రైతులు గుండెపోటుతో చనిపోయారన్నారు. జెఏసి అడ్వకేట్‌లలో ఉత్సాహం కనబతుతోందని అన్నారు. సంఘటితంగా ఉద్యమాన్ని కొనసాగించడం ద్వారా ప్రభుత్వం గజగజ వణికే పరిస్థితి కొద్దిరోజుల్లోనే వస్తుందని చంద్రబాబు పేర్కొన్నారు. రాజధాని ఇక్కడ నుండి తరలించమని ప్రభుత్వం నుండి స్పష్టమైన హామీ వచ్చే వరకూ ఈ జెఏసి పని చేయాలన్నారు.

తాను ముఖ్యమంత్రిగా ఉన్న సమయంలో వైఎస్ రాజశేఖరరెడ్డి, జగన్మోహనరెడ్డిలు రాష్ట్రంలో పాదయాత్రలు చేసిన విషయాన్నిచంద్రబాబు గుర్తు చేశారు. ఇప్పుడు వారు ప్రవర్తించిన విధంగా తాను నాడు వ్యవహరించి ఉంటే  పాదయాత్ర చేసేవారా అని ప్రశ్నించారు. శాంతి భద్రతల పేరుతో జెఏసి బస్సు యాత్రను అడ్డుకున్నారని విమర్శించారు. జగన్ పిరికి తనంతో ఈ విధంగా వ్యవహరిస్తున్నారని అన్నారు. నిన్న పోలీసులు మహిళలపై కూడా దారుణంగా ప్రవర్తించారని విమర్శించారు. నేడు ఒంగోలులో కూడా జెఏసి నాయకులను అరెస్టు చేసినట్లు తెలిసిందన్నారు. శాంతియుతంగా నిరసన కార్యక్రమాలను నిర్వహిస్తుంటే ఎక్కడికక్కడ నేతలను ప్రభుత్వం అరెస్టు చేయిస్తోందని విమర్శించారు.

పోలీసులు రాత్రి జెఏసి కార్యాలయానికి ఎందుకు తాళం వేయాల్సి వచ్చిందని ప్రశ్నించారు. జెఏసి నేతలు సాధారణంగా మీటింగ్ పెట్టుకోవడానికి వీలులేదా అని చంద్రబాబు ప్రశ్నించారు. అమరావతిలో అసెంబ్లీ, సచివాలయం, హైకోర్టు అన్ని సిద్ధంగా ఉన్నాయని చంద్రబాబు వివరించారు. ప్రజలు నమ్ముతారని ప్రతి రోజు అసత్యాలు ప్రచారం చేస్తున్నారని అన్నారు. ఇన్ సైడర్ ట్రేడింగ్ అంటూ అసత్య ప్రచారం చేయడం కాదు చర్యలు తీసుకోవాలని డిమాండ్ చేశారు. హైకోర్టు న్యాయమూర్తితో విచారణ జరిపించి తప్పు చేసిన వారిపై చర్యలు తీసుకోవాలన్నారు.

జెఏసి కన్వీనర్ శివారెడ్డి, సిపిఐ రాష్ట్ర కార్యదర్శి రామకృష్ణ, టిడిపి నేతలు దేవినేని ఉమామహేశ్వరరావు, కనకమేడల రవీంద్ర, మాగంటి బాబు, కాంగ్రెస్ నేత సుంకర పద్మశ్రీ, జనసేన, కాంగ్రెస్, బిజెపి నేతలు సమావేశానికి హజరయ్యారు.