YSRCP: కీలక నిర్ణయాన్ని ప్రకటించిన వైసీపీ ఎమ్మెల్యే

YSRCP: ఏపీలో ఎన్నికలు దగ్గర పడుతున్న వేళ అధికార వైసీపీ ఎమ్మెల్యేలు సంచలన నిర్ణయాలను తీసుకుంటున్నారు. పలువురు ఎమ్మెల్యేలు తమకు టికెట్ దక్కదని తెలియడంతో పక్క చూపులు చూస్తున్నారు. మరి కొందరు పార్టీ నిర్ణయాన్ని గౌరవిస్తున్నారు. ఇన్ చార్జిల మార్పులు చేర్పులపై పార్టీ అధిష్టానం దృష్టి పెట్టిన నేపథ్యంలో కీలక పరిణామాలు చోటుచేసుకుంటున్నాయి.

విశాఖ పట్టణానికి చెందిన అధికార వైసీపీ ఎమ్మెల్సీ వంశీకృష్ణ శ్రీనివాస్ ఇవేళ జనసేన పార్టీలో చేరారు. కాకినాడ జిల్లాకు చెందిన ఓ ఎమ్మెల్యే జనవరి మొదటి వారంలో టీడీపీ తీర్ధం పుచ్చుకోవడానికి సిద్దమైనట్లుగా వార్తలు వినబడుతున్నాయి. గెలుపు అవకాశాలు ఉన్న వారికే టికెట్ లు ఇవ్వాలని సీఎం జగన్ కసరత్తు చేస్తున్నారు. ఈ క్రమంలో ఉమ్మడి ప్రకాశం జిల్లా గిద్దలూరు సిట్టింగ్ ఎమ్మెల్యే అన్నా రాంబాబు స్థానంలో అసెంబ్లీ ఎన్నికల అనంతరం టీడీపీ నుండి వైసీపీలో చేరిన మాజీ మంత్రి సిద్దా రాఘవరావును నిలిపే అవకాశం ఉన్నట్లుగా వార్తలు వినబడుతున్నాయి. ఈ తరణంలో ఎమ్మెల్యే ఆన్నా రాంబాబు కీలక నిర్ణయాన్ని వెల్లడించారు.

తాను వచ్చే ఎన్నికల్లో పోటీ చేయడం లేదని ప్రకటించారు అన్నా రాంబాబు. 2009 ఎన్నికల్లో ప్రజారాజ్యం పార్టీ నుండి ఎమ్మెల్యే గా ఎన్నికైన అన్నా రాంబాబు.. 2019 ఎన్నికల్లో వైసీపీ నుండి పోటీ చేసి దాదాపు 80వేలకు పైగా ఓట్ల ఆధిక్యతతో విజయం సాధించారు. అయితే ఆరోగ్య కారణాల వల్ల 2024 ఎన్నికలకు తాను దూరంగా ఉంటానని ఆయన మీడియా సమావేశంలో వెల్లడించారు. వైసీపీలో కొనసాగుతానని చెప్పిన ఆయన తాను పార్టీ మారుతున్నట్లుగా వస్తున్నవార్తల్లో నిజం లేదని అన్నారు. కొందరు కావాలనే తనపై దుష్ప్రచారం చేస్తున్నారని ఆ ప్రచారాన్ని కార్యకర్తలు నమ్మవద్దని కోరారు.

తొలి సారిగా తాను మెగాస్టార్ చిరంజీవి ఆశీస్సులతో ఎమ్మెల్యే గా ఎన్నికైయ్యానని అన్నారు. తన కుటుంబాన్ని కొందరు లక్ష్యంగా చేసుకుని వ్యవహరిస్తుండటం తనను కలచివేసిందన్నారు. జగన్ ఎలాంటి నిర్ణయం తీసుకున్నా అందుకు తాను కట్టుబడి ఉంటానని అన్నా రాంబాబు తెలిపారు. పార్టీ అధిష్టానం సిద్దా రాఘవరావుకు టికెట్ ఖరారు చేస్తుందన్న వార్తలు రావడంతోనే ఈ నిర్ణయాన్ని ప్రకటించి ఉండవచ్చని భావిస్తున్నారు.

CM Revanth Reddy: నిరుద్యోగులకు గుడ్ న్యూస్ చెప్పిన సీఎం రేవంత్ రెడ్డి