మూడు పార్టీల నేతల నిరసనలు..! రామతీర్థం వద్ద ఉద్రిక్తత..! విజయసాయి వాహనంపై టీడీపీ శ్రేణుల దాడి..!!

గత నెల 28న విజయనగరం జిల్లాలో ప్రఖ్యాత రామతీర్థం బోడికొండపై గల కోదండ రామాలయంలోని స్వామి విగ్రహన్ని గుర్తు తెలియని వ్యక్తులు ధ్వంసం చేసి శిరస్సును కొలనులో పడవేసిన సంగతి తెలిసిందే. ఈ ఘటనపై టీడీపీ, బీజేపీలు వైసీపీ ప్రభుత్వాన్ని టార్గెట్ చేస్తూ విమర్శలు చేస్తుండగా వైసీపీ నేతలు టీడీపీ నేతల కుట్రేనంటూ ఆరోపణలు చేస్తున్నారు. వైసీపీ రాజ్యసభ సభ్యుడు విజయసాయి రెడ్డి ఈ ఘటన వెనుక చంద్రబాబు, లోకేష్ లు ఉన్నారనీ, ప్రభుత్వాన్ని అప్రతిష్టపాలు చేసేందుకు టీడీపీ కార్యకర్తలే ఈ దారుణానికి పాల్పడ్డారని విమర్శించారు. దీనిపై ఇరు పార్టీల మధ్య విమర్శలు ప్రతివిమర్శల దాడి జరుగుతోంది.

ఈ క్రమంలోనే నేడు టీడీపీ అధినేత చంద్రబాబురామతీర్ధం సందర్శనకు బయలుదేరారు. చంద్రబాబు రాక సందర్బంగా టీడీపీ శ్రేణులు పెద్ద సంఖ్యలో రామతీర్థం కొండ వద్దకు చేరుకున్నారు. అయితే చంద్రబాబు కంటే ముందుగా వైసీపీ రాజ్యసభ సభ్యుడు విజయసాయి రెడ్డి, పలువురు పార్టీ నేతలతో కలిసి రామతీర్ధంకు చేరుకున్నారు. బీజేపీ ఎమ్మెల్సీ మాధవ్ కూడా బీజెపీ శ్రేణులతో అక్కడకు చేరుకున్నారు. మూడు పార్టీల కార్యకర్తలు పోటాపోటీ ఆందోళనలు, నిరసనలతో ఆ ప్రాంతం అట్టుడికింది. ఈ క్రమంలో టీడీపీ కార్యకర్తలు విజయసాయిరెడ్డి కారుపై చెప్పులు రాళ్లతో దాడి చేశారు. దీంతో కారు అద్దాలు ధ్వంసం అయ్యాయి. పెద్ద సంఖ్యలో అక్కడకు చేరుకున్న పోలీసులు టీడీపీ శ్రేణులను నిలువరించారు. పోలీసులు, వైసీీపీ కార్యకర్తల రక్షణ మధ్య విజయసాయి రెడ్డి కొండపైకి వెళ్లి అక్కడ ఘటన గురించి అడిగి వివరాలు తెలుసుకున్నారు. తరువాత కొండ కిందకు వచ్చి కారును అక్కడే ఉంచి కాలినడకను వేరే ఆలయానికి విజయసాయి రెడ్డి వెళ్లారు.

కొండపైకి వెళ్లేందుకు ఎవరికీ అనుమతి లేదని చెప్పిన పోలీసులు విజయసాయిరెడ్డికి ఎలా అనుమతించారంటూ బీజెపీ శ్రేణలు ఆగ్రహం వ్యక్తం చేశారు. తమను కొండపైకి అనుమతించాలంటూ బీజెపీ ఎమ్మెల్సీ మాధవ్ పోలీసులతో వాగ్వివాదానికి దిగారు. కాగా బోడికొండ దిగువన బీజేపీ, వైసీపీ, టీడీపీ కార్యకర్తలు ప్రత్యేక శిబిరాలు ఏర్పాటు చేసుకుని ఆందోళనకు దిగారు. మరో వైపు విశాఖ నుండి రోడ్డు మార్గంలో రామతీర్థం బయలుదేరిన చంద్రబాబు కాన్వాయ్ ను పోలీసులు అడ్డుకున్నారు. దీనిపై పోలీసులతో టీడీపీ నేతలు వాదనకు దిగారు. చంద్రబాబు కాన్వాయ్ లో అదనపు కార్లు రావడానికి వీలులేదంటూ పోలీసులు అడ్డుకోవడంతో చంద్రబాబుతో సహా పార్టీ నేతలు కొద్ది సేపు రోడ్డుపై భైటాయించి నిరసన తెలిపారు. అనంతరం చంద్రబాబు రామతీర్థంకు చేరుకున్నారు.