YSRCP: ఫలించిన జగన్ వ్యూహం .. మెత్తబడ్డ బాలినేని

YSRCP: ఒంగోలు లోక్ సభ వైసీపీ అభ్యర్ధిత్వం సిట్టింగ్ ఎంపీ మాగుంట శ్రీనివాసులు రెడ్డికి ఖరారు చేయాలని పట్టుబడుతూ  వచ్చిన మాజీ మంత్రి, ఒంగోలు ఎమ్మెల్యే బాలినేని శ్రీనివాసరెడ్డి చివరకు మెత్తబడ్డారు. గత రెండు రోజులుగా విజయవాడలోనే ఉండి అధిష్టానంతో చర్చలు జరిపారు. అయితే అధిష్టానం పెద్దలతో బాలినేని జరిపిన చర్చల్లో ఫలితం లభించలేదు. మాగుంటకు టికెట్ ఇచ్చేది లేదని బాలినేనికి వైసీపీ పెద్దలు తెగేసి చెప్పారు.

చెవిరెడ్డి భాస్కరరెడ్డి పేరు ఒంగోలు లోక్ సభకు ఖరారు చేసినట్లుగా వైసీపీలో ప్రచారం జరుగుతోంది. ఒంగోలు లోక్ సభ విషయంలో బాలినేని మరో ప్రతిపాదనలు తెరపైకి తెచ్చినా పార్టీ ససేమిరా అన్నట్లుగా తెలుస్తొంది. వైసీపీ అధికారంలోకి వచ్చిన తర్వాత దాదాపు మూడేళ్ల పాటు జిల్లాలో అన్ని తానే అన్నట్లుగా చక్రం తిప్పిన బాలినేని కి ఆ తర్వాత ప్రాధాన్యత తగ్గడంతో కొంత అసంతృప్తి వ్యక్తం చేస్తూ వచ్చారు. పార్టీ మారతారంటూ కూడా ప్రచారం జరిగింది. అయితే ఆ వార్తలను ఆయన ఖండించారు.

అయిదు సార్లు ఎమ్మెల్యేగా, రెండు సార్లు మంత్రిగా బాధ్యతలు నిర్వహించిన బాలినేని ..సీఎం దగ్గరి బంధువు అయినప్పటికీ పార్టీలో మాట చెల్లుబాటు కాకపోవడంతో పలు మార్లు అలిగి హైదరాబాద్ కూడా వెళ్లారని టాక్ నడిచింది. అయితే బాలినేని కోరిక మేరకు ఒంగోలులో 25వేల మంది పేదలకు ఇళ్ల స్థలాలు ఇచ్చేందుకు గానూ అవసరమైన నిధులను సీఎం జగన్ ఇటీవల విడుదల చేశారు. దీంతో బాలినేని సరిపెట్టుకోవాల్సి వచ్చింది.

విజయవాడ నుండి ఒంగోలు చేరుకున్న బాలినేని మీడియాతో మాట్లాడారు. ఒంగోలులో 25 వేల మంది పేదలకు ఇళ్ల స్థలాలు ఇవ్వడమే తనకు ముఖ్యమని తెలిపారు. ఎంపీ అభ్యర్ధిగా మాగుంట అయితే పార్లమెంట్ నియోజకవర్గ పరిధిలోని ఇతర అసెంబ్లీ సిగ్మెంట్ లలో బాగుంటుందనే తాను పోరాటం చేశానన్నారు. మిగిలిన నియోజకవర్గాల్లోని అభ్యర్ధులు మాగుంట విషయంలో పట్టీపట్టనట్లు ఉన్నారనీ, వాళ్లకు లేని బాధ తనకు ఎందుకు అని ప్రశ్నించారు.

ఇక పార్టీ హైకమాండ్ ఏమి చెబితే అదే చేస్తానని వెల్లడించారు బాలినేని. మాగుంట టికెట్ విషయంలో పట్టుబడితే తాను పార్టీ మారుతానంటూ దుష్ప్రచారం చేస్తున్నారన్నారు. ఎంపీ అభ్యర్ధిగా ఎవరు వచ్చినా తనకు అభ్యంతరం లేదనీ, ఒంగోలులో తన గెలుపును తాను చూసుకుంటానని బాలినేని తేల్చి చెప్పారు. బాలినేని ప్రయత్నాలు ఫెయిల్ అవ్వడంతో ఎంపీ మాగుంట శ్రీనివాసులు రెడ్డి ఎటువంటి నిర్ణయం తీసుకుంటారు అనేది ఇప్పుడు ఆసక్తికరంగా మారింది.

తొలి నుండి కాంగ్రెస్ కుటుంబానికి చెందిన మాగుంట రాష్ట్ర విభజన తర్వాత టీడీపీలో చేరారు. 2014 ఎన్నికల్లో వైసీపీ అభ్యర్ధి వైవీ సుబ్బారెడ్డి చేతిలో  కేవలం 15వేల ఓట్ల తేడాతో ఓటమి పాలైయ్యారు. 2019 ఎన్నికలకు ముందు వైసీపీలో చేరి మూడో సారి ఎంపీగా గెలిచారు. అయితే ఇప్పుడు కాంగ్రెస్ పార్టీలో చేరతారా లేక మరల టీడీపీలోకి వెళతారా అనేది వేచి చూడాలి.

YS Sharmila: వైఎస్ షర్మిలకు జగన్ సర్కార్ షాక్ .. డీజీపీకి రఘువీరా లేఖ ..ఎందుకంటే..?