అక్క‌డ వైసీపీని మొత్తం ఖాళీ చేసేసిన వైసీపీ ఎమ్మెల్యే…!

నిన్న మొన్నటి వరకు వైసిపి లోనే ఉన్న సదరు ఎమ్మెల్యే ఇప్పుడు నియోజకవర్గంలో అదే వైసీపీని ఖాళీ చేసే పనిలో ఉన్నారు. తన నియోజకవర్గంలో ఉన్న వైసిపి స్థానిక సంస్థల ప్రజాప్రతినిధులతో పాటు పలువురు కీలక నేతలను కలుపుకుని ఈరోజు హైదరాబాదులో చంద్రబాబు సమక్షంలో తెలుగుదేశం పార్టీలో చేరుతున్నారు. ఆ ఎమ్మెల్యే ఎవరో కాదు ఎన్టీఆర్ జిల్లాలోని మైలవరం ఎమ్మెల్యే వసంత కృష్ణ ప్రసాద్. వసంత కృష్ణ ప్రసాద్ కుటుంబానికి గతంలో తెలుగుదేశం పార్టీతో అనుబంధం ఉంది. ఆయన తండ్రి వ‌సంత నాగేశ్వ‌ర‌రావు ఎన్టీఆర్ మంత్రివర్గంలో పనిచేశారు. ఆ తర్వాత రాజకీయ కారణాలతో తెలుగుదేశం పార్టీకి దూరమై కాంగ్రెస్లో చేరారు.

2019 ఎన్నికలలో మైలవరం నుంచి పోటీ చేసి అప్పటి మంత్రి దేవినేని ఉమామహేశ్వరరావుపై విజయం సాధించారు. ఐదేళ్లుగా కృష్ణ ప్రసాద్ వైసీపీలో ఎంత మాత్రం ఇమ‌డలేకపోయారు. వ్యక్తిగతంగా ఆయనకు మంచి పేరు ఉన్నా పార్టీ అధిష్టానం నుంచి సరైన మద్దతు లేకపోవడంతో మైలవరం నియోజకవర్గాన్ని అనుకున్న స్థాయిలో అభివృద్ధి చేయలేకపోయారు. అనూహ్యంగా ఇప్పుడు కృష్ణ ప్రసాద్ టిడిపిలో చేరుతుండడంతో అక్కడ టిడిపి నుంచి బలమైన నేతగా ఉన్న మాజీ మంత్రి దేవినేని ఉమామహేశ్వరరావు సీటు వస్తుందా ? రాదా అన్న సందిగ్ధత నెలకొంది.

ఈరోజు నందిగామ నియోజకవర్గంలోని తన స్వగ్రామం అయిన ఐతవరం నుంచి 100 కారులతో ర్యాలీగా బయలుదేరి హైదరాబాద్ వెళ్లి అక్కడ చంద్రబాబు సమక్షంలో కృష్ణ ప్రసాద్ టిడిపిలో చేరుతున్నారు. కృష్ణ ప్రసాద్ తనతో పాటు మైలవరం నియోజకవర్గంలోని ప్రధాన వైసీపీ క్యాడర్ను అంతా ఖాళీ చేసి మరి సైకిల్ ఎక్కేస్తుండటం విశేషం. కృష్ణ ప్రసాద్ పార్టీకి దూరమవుతారన్న సంకేతాలు వచ్చిన వెంటనే వైసీపీ అధిష్టానం మైలవరం జడ్పిటిసిగా ఉన్న స‌ర్నాల‌ తిరుపతిరావు యాద‌వ్‌ను మైలవరం అసెంబ్లీ సమన్వయకర్తగా ఎంపిక చేసింది.

తిరుప‌తి రావు యాద‌వ్ అసెంబ్లీకి పోటీ చేసే అంత సత్తా ఉన్న నేత అయితే కాదు. కేవలం డమ్మీగా మాత్రమే జగన్ తిరుపతిరావును సమన్వయకర్తగా ఎంపిక చేశారని ఫైనల్ గా మైలవరం నుంచి వైసీపీ తరఫున మరో నేత పోటీ చేసే అవకాశం ఉందని ప్రచారం జరుగుతోంది. ఎంపీ కేశినేని నాని లేదా ఆయన కుమార్తె కేశినేని శ్వేత‌ లేదా గన్నవరం ఎమ్మెల్యే వల్లభనేని వంశీ, జోగి రమేష్ పేర్లు వైసిపి రేసులో వినిపిస్తున్నాయి. ఏది ఏమైనా మైలవరం నియోజకవర్గంలో బలమైన నేతలుగా ఉన్న దేవినేని ఉమా, బొమ్మ‌సాని సుబ్బారావు, ప్ర‌స్తుత‌ ఎమ్మెల్యే వసంత కృష్ణ ప్రసాద్ వీళ్లంతా తెలుగుదేశంలో ఉండడంతో వైసిపి దిక్కుతోచని స్థితిలో ఉందన్నమాట వాస్తవం.