నార్త్ అమెరికాలోని టెక్సాస్ రాష్ట్రంలో డల్లాస్ నగరంలో పేరుపొందిన శాస్త్రీయ సంగీత శిక్షకురాలు, సుస్వర మ్యూజిక్ అకాడమీ వ్యవస్థాపక అధ్యక్షురాలు అయిన డాక్టర్ మీనాక్షి అనుపిండి సుస్వర మ్యూజిక్ అకాడమీని స్థాపించి దాదాపు 21 ఏళ్ళ నుంచి ప్రతి సంవత్సరం ఎంతో గ్రాండ్ గా ఈ సంస్థ యొక్క వార్షికోత్సవాలను నిర్వస్తున్నారు. అదే విధంగా ఈ ఏడాది కూడా సంస్థ వార్షికోత్సవాలను మే 5న (ఆదివారం) డల్లాస్ లోని గ్రాండ్ సెంటర్ ఆడిటోరియంలో ఘననంగా నిర్వ‌హించారు. ఈ కార్యమానికి వ్యాఖ్యాతలుగా కుమారి సంహిత అనిపిండి, శ్రీమతి ప్రత్యూష వ్యవహరించారు.
అత్యంత ఘనంగా నిర్వహించిన ఈ కార్యక్రమానికి డల్లాస్ నగరంలోని ప్రముఖులు, తెలుగు సినిమా పరిశ్రమకి చెందిన సినీ ప్రముఖులు అతిధులుగా హాజరై విజయవంతం చేశారు. ఈ నేపథ్యంలో తానా ప్రపంచ సాహిత్య వేదిక చైర్మన్ శ్రీ ప్రసాద్ తోటకూర గారు, డల్లాస్ లో ఇండో అమెరికన్ కౌన్సిల్ సభ్యులుగా ఉన్నటువంటి శ్రీ గోపాల్ పోనంగి గారు, ప్రముఖ వ్యాపారవేత్త శ్రీ కిషోర్ కంచర్ల గారు, శ్రీమతి శారద సింగిరెడ్డి గారు, శ్రీ ప్రకాష్ రావు గారు అతిధులగా హాజరయ్యారు.
అంతేకాదు, తెలుగు చలన చిత్ర పరిశ్రమలోని ప్రముఖ సినీ గేయ రచయిత, ఆస్కార్ అవార్డు గ్రహీత చంద్రబోస్ గారు, ప్రముఖ సంగీత దర్శకులు ఆర్. పి. పట్నాయక్ గారు, టాలీవుడ్ డైరెక్ట‌ర్ వి. ఎన్‌. ఆదిత్య గారి తో సహా పలువురు సినీ ప్రముఖులు పాల్గొన్నారు. ఇక ఈ సందర్భంగా వార్షిక సంబరాల్లో మీనాక్షి అనిపిండి గారు తన శిష్య బృందంతో 7 సిగ్మెంట్లలో 30కి పైచిలుకు సంప్రదాయ సంగీత కీర్తనలను ప్రదర్శించి అలరించారు. విరామం లేకుండా 10 గంటల పాటు సాగిన ఈ సాంస్కృతిక గాన ప్రదర్శన వీక్షకులందరినీ ఉర్రూతలూగించిందనడంలో సందేహం లేదు.
ఇదే క్రమంలో సుస్వర మ్యూజిక్ అకాడమీ వార్షిక సంబరాల వేదికపై, చంద్రబోస్ గారికి “సుస్వర సాహిత్య కళానిధి” అనే బిరుదునిచ్చి సత్కరించడం చిత్ర పరిశ్రమకి గర్వకారణం. అంతేకాదు, చంద్రబోస్ గారు తన స్వ‌గ్రామం అయినటువంటి చల్లగరిగెలో ప్రారంభించిన ఆస్కార్ గ్రంధాల‌య నిర్మాణానికి, ఈ కార్య‌క్ర‌మం ద్వారా దాదాపు 15 వేల డాల‌ర్స్ కు పైగా విరాళం రావ‌డం ఆసక్తికరమైన మరో విషయం. ఈ వార్షిక సంబరాల్లో ప్రముఖ దర్శకులు ఆర్. పి. పట్నాయక్ గారు తన మాట‌ల‌తో , పాట‌ల‌తో ప్రేక్ష‌కులను బాగా అలరించారు. ఈ సందర్భంగా ఆర్. పి. పట్నాయక్ గారికి “సుస్వర నాద‌నిధి” అనే బిరుదుతో మీనాక్షి అనిపిండి గారు సత్కరించారు. ఇక సుస్వర మ్యూజిక్ అకాడమీ లోని విద్యార్థినీ, విద్యార్థులు వాలంటీర్లుగా పనిచేసి ఈ కార్యక్రమాన్ని ఆధ్యంతం ర‌క్తిక‌ట్టించారు.