Arya: ఐకాన్ స్టార్ అల్లు అర్జున్ కెరీర్ లో ఫస్ట్ బ్లాక్ బస్టర్ మూవీ ఆర్య. ఈ సినిమా విడుదలై నేటితో 20 ఏళ్లు పూర్తి చేసుకుంది. ఈ సందర్భంగా ఆర్య సినిమా గురించి కొన్ని ఆసక్తికర విషయాలు ఇప్పుడు తెలుసుకుందాం. క్రియేటివ్ డైరెక్టర్ సుకుమార్, అల్లు అర్జున్ కాంబినేషన్లో వచ్చిన రొమాంటిక్ లవ్ స్టోరీనే ఆర్య. సుకుమార్ కు దర్శకుడుగా ఆర్య మొదటి సినిమా కాగా.. అల్లు అర్జున్ కు హీరోగా రెండో చిత్రం. వన్ సైడ్ లవ్ కాన్సెప్ట్ తో ఈ మూవీని రూపొందించారు. మొదట `నచికేత` అనే టైటిల్ పెట్టాలని అనుకున్నా కూడా చివరకు ఆర్య ను ఫిక్స్ చేశారు.
హీరోయిన్ గా అనురాధ మెహతా పిక్స్ అయ్యింది. శివ బాలాజీ, రాజన్‌ సి దేవ్ తదితరులు ఇతర ముఖ్యమైన పాత్రలను పోషించారు. దేవి శ్రీ ప్రసాద్ సంగీతం అందించాడు. దిల్ మూవీ హిట్ అనంతారం దిల్ రాజు నిర్మించిన ఆర్య సినిమా 2004 మే 7న అంటే సరిగ్గా 20 ఏళ్ల క్రితం ఇదే రోజు 99 ప్రింట్స్ తో విడుదల అయింది. మార్నింగ్ షో డివైడ్ టాక్ వచ్చింది. కానీ సాయంత్రానికి అదే టాక్ పాజిటివ్ గా మారింది. అల్లు అర్జున్ యాక్టింగ్, సుకుమార్ డైరెక్షన్, దేవిశ్రీప్రసాద్ అందించిన మ్యూజిక్ సినిమాను ఓ రేంజ్ లో లేపాయి. సాంగ్స్ గురించి ఎంత చెప్పుకున్నా త‌క్కువే.
ఆర్య చిత్రంలో ప్ర‌తి సాంగ్ హిట్ అయింది. అలాగే రూ. 4 కోట్లతో నిర్మితమైన ఆర్య చిత్రం ఫుల్ ర‌న్ లో ఏకంగా రూ. 30 కోట్ల రేంజ్ లో వసూళ్లను అందుకుంది. అప్పట్లో ప్రేమ కథా చిత్రాల్లో ఆర్య ఒక ట్రెండ్ సెట్టర్ గా నిలిచింది. తెలుగులో ఘన విజ‌యాన్ని న‌మోదు చేసిన ఈ సినిమాను మలయాళం లో డ‌బ్‌ చేసి విడుదల చేయగా అక్కడ సైతం హిట్ గా నిలిచింది. రూ. 30 లక్షల వరకు వసూళ్లను రాబట్టడమే కాకుండా అల్లు అర్జున్ కు ఫ్యాన్ బేస్ ఏర్పడేలా చేసింది.
మ‌రోవైపు తొలి సినిమాతోనే సుకుమార్ ఉత్తమ దర్శకుడిగా ఫిలింఫేర్ అవార్డు అందుకున్నాడు. అయితే చాలా మందికి తెలియని విషయం ఏంటంటే.. ఆర్య సినిమాలో హీరో క్యారెక్టర్ కి ఫస్ట్ ఛాయిస్ అల్లు అర్జున్ కాదు. నిజానికి సుకుమార్ ఈ సినిమా కథను మరో హీరో కోసం రాసుకున్నారట. ఇంతకీ ఆ హీరో మరెవరో కాదు అల్లరి నరేష్. అల్లరి మూవీలో నరేష్ యాక్టింగ్ కు ఫిదా ఆయన సుకుమార్ ఆయన దృష్టిలో పెట్టుకుని ఆర్య కథను రాసుకున్నారట. కానీ కొన్ని కారణాల వల్ల ఆర్య స్టోరీ అల్లరి నరేష్ వద్దకు వెళ్లలేదు. అల్లు అర్జున్ హీరోగా ఖ‌రారయ్యాడు. గతంలో ఈ విషయాన్ని ఓ ఇంటర్వ్యూలో అల్లరి నరేష్ స్వయంగా పంచుకున్నారు. అలాగే ఆర్యగా అల్లు అర్జున్ కంటే ఇంకెవరు బాగా చేయలేరని కూడా అల్లరి నరేష్ ప్ర‌శంస‌లు కురిపించారు.