Alia Bhatt: ఆలియా భట్.. ఈ బాలీవుడ్ ముద్దుగుమ్మ తెలియని ఇండియన్ సినీ ప్రియులు ఉండరు. దాదాపు దశాబ్దన్నరకాలం నుంచి నార్త్ ఇండస్ట్రీలో స్టార్ హీరోయిన్ గా ఓ వెలుగు వెలుగుతున్న ఆలియా భట్.. గంగూబాయి కతియావాడి, ఆర్ఆర్ఆర్ చిత్రాలతో సౌత్ ప్రేక్షకులకు కూడా చేరువయ్యింది. తనదైన అందం, నటన ప్రతిభతో ప్రత్యేకమైన గుర్తింపును సంపాదించుకుంది. పెళ్లయి ఓ బిడ్డకు తల్లైన తర్వాత కూడా నటిగా సక్సెస్ ఫుల్ కెరీర్ ను కొన‌సాగిస్తున్న ఆలియా భట్.. తాజాగా మెట్ గాలా 2024లో మెరిసింది. మెట్ గాలా అనేది ప్రతి ఏడాది న్యూయార్క్ లో జరిగే ఫ్యాషన్ ఫెస్టివల్. నగరంలోని మెట్రోపాలిటన్‌ మ్యూజియం ఆఫ్ ఆర్ట్ వేదిక‌గా మే నెలలో ఈ వేడుకను నిర్వహిస్తుంటారు.
ప్రపంచం నలుమూలల నుంచి బాగా పేరున్న అతికొద్దిమంది సెలబ్రిటీలు మాత్రమే ఈ ఫ్యాషన్ వేడ‌క‌లో సందడి చేస్తుంటారు. ఈ ఏడాది మే 6న మెట్ గాలా వేడుక అట్ట‌హాసంగా ప్రారంభ‌మైంది. ఈసారి ఇండియా నుంచి రిలయన్స్‌ ఇండస్ట్రీస్‌ అధినేత, అప‌ర కుబేరులు ముఖేశ్‌ అంబానీ కుమార్తె ఈషా అంబానీ, బాలీవుడ్ స్టార్ బ్యూటీ ఆలియా భట్ మెట్ గాలాకు హాజ‌రైయ్యారు. ఆలియా ప్రముఖ డిజైనర్‌ సబ్యసాచి డిజైన్ చేసిన ఫ్లోరల్‌ శారీ క‌ట్టుకుని రెడ్ కార్పెట్‌పై హొయలు పోయింది.
అంతర్జాతీయ కెమెరా మెన్స్ కు ఫోజులు ఇస్తూ చీరలో ఆలియా భట్ మ‌రింత అందంగా క‌నిపించింది. ఈ సంద‌ర్భంగా ఆలియా భట్ మాట్లాడుతూ.. `నేను చాలా సంతోషంగా, ఉత్సాహంగా ఉన్నాను. ఈ క్షణం చాలా ప్రత్యేకమైనది. మెట్ గాలాలో పాల్గొన‌డం ఇది రెండోసారి. అయితే చీరకట్టులో రావ‌డం మాత్రం ఇదే తొలిసారి. చీర కంటే కాలాతీతమైనది మరొకటి లేదు` అంటూ చెప్పుకొవ‌చ్చింది. భారతీయ సంస్కృతిని మెట్ గాలాలో చాట‌డం ప‌ట్ల నెటిజ‌న్లు ఆలియా భట్ పై ప్ర‌శంస‌లు కురిపిస్తున్నారు.
ఇక మ‌రోవైపు ఆలియా భట్ క‌ట్టుకున్న చీర ఇప్పుడు సోష‌ల్ మీడియాలో వైర‌ల్ గా మారింది. పాస్టల్ గ్రీన్ శారీని ఆలియా భట్ క‌ట్టుకుంది. గార్డెన్ ఆఫ్ టైమ్ అనే థీమ్ కు స‌రిప‌డేలా ఈ చీరను డిజైన్ చేశారు. ఆలియా భట్ చీర కొంగు మొత్తం రెడ్ కార్పెట్ ను కవర్ చేసేసింది. అంత పొడుగ్గా చీరను రూపొందించారు. ఇక్క‌డ షాకింగ్ విష‌యం ఏంటంటే.. ఒక‌రు కాదు ఇద్ద‌రు కాదు ఏకంగా 163 మంది హస్త కళాకారులు 1905 గంటలు ఈ చీరను త‌యారు చేయ‌డానికి శ్ర‌మించారట. పొడవాటి కొంగు చీరలో ఆలియా భట్ రెడ్ కార్పెట్ పైకి రాగానే కెమెరాల కళ్లన్నీ ఆమె చుట్టూనే తిరిగాయి. మెట్ గాలాలో ఆలియా చీర స్పెష‌ల్ అట్రాక్ష‌న్ గా నిలిచింది. కాగా, బాలీవుడ్ స్టార్ ర‌ణ‌బీర్ క‌పూర్ తో వివాహ‌మైన ఏడు నెల‌ల‌కు పండంటి కూతురికి జ‌న్మనిచ్చిన ఆలియా భట్.. ప్ర‌స్తుతం జిగ్రా అనే సినిమాతో బిజీగా ఉంది. వాసన్ బాలా దర్శకత్వం వహిస్తున్న ఈ చిత్రం చిత్రీక‌ర‌ణ ద‌శ‌లో ఉంది.