విశాఖ పార్లమెంటు వేదికగా ఈ సారి మంచి రసవత్తర పోరు చూడబోతున్నాం అని ఆశపడిన పొలిటికల్ ప్రియులకు ఎన్నికలు దగ్గర పడుతోన్న కొద్ది ఆ మజా దక్కడం లేదు. ఇక్కడ వైసీపీ నుంచి బొత్స ఝాన్సీ పేరు ప్రకటించనప్పుడు బాలయ్య చిన్నల్లుడు, టీడీపీ క్యాండెట్ శ్రీ భరత్ గెలుపు నల్లేరు మీద నడకే అనుకున్నారు. కట్ చేస్తే ఎన్నికలకు ఆరు రోజులు మాత్రమే టైం ఉన్న నేపథ్యంలో ఝాన్సీ విశాఖ పార్లమెంట్ వార్ వన్సైడ్ చేసేస్తే.. భరత్ ఎన్నికలకు ముందు తేలిపోతున్నాడా ? అన్న చర్చలు, సందేహాలు నడుస్తున్నాయి.
ఇటు గతంలో రెండుసార్లు ఎంపీగా గెలిచిన ఝాన్సీకి పార్లమెంటులో విశాఖ సమస్యలపై చేసిన పోరాటాలు.. సంధించిన ప్రశ్నలు, ఉన్నత విద్యావంతురాలిగానే కాకుండా.. జడ్పీచైర్పర్సన్గా పనిచేసిన అనుభవంతో ఆమెకు క్షేత్రస్ధాయి నుంచే ప్రజల సమస్యలు ఎలా ? ఉంటాయో ? క్లారిటీగా తెలుస్తోంది. అందుకే ఆమె ప్రతి సమస్యపై సూటిగా, స్పష్టంగా మాట్లాడుతున్నారు. అసలు భరత్కు ప్రజా సమస్యలు ఎలా ఉంటాయో ? వాటి గురించి ఎలా మాట్లాడాలో తెలియని పరిస్థితి.
ఝాన్సీకి గతంలో జడ్పీచైర్పర్సన్గా, రెండుసార్లు ఎంపీగాను, ఇటు తన కుటుంబం చేసిన అభివృద్ధితో పాటు విశాఖ ఇన్చార్జ్ మినిస్టర్గా బొత్స చేసిన డెవలప్మెంట్ గురించి చెప్పుకోవడానికి చాలా ఉంది. అటు భరత్కు చెప్పుకోవడానికే పేరు గొప్ప ఊరు దిబ్బ అన్నట్టుగా తప్పా ఏమీ లేదు. విశాఖపట్నం ఆడపడుచు అన్న సెంటిమెంట్తోనూ ఝాన్సీ ఓటర్లతో పాటు ఇక్కడ మహిళా ఓటర్ల మనస్సుల్లోకి చొచ్చుకుపోతున్నారు. ఇక ఆమె గతంలోనే పార్లమెంటులో విశాఖ గురించి చేసిన ప్రసంగాలు పార్లమెంటుతో పాటు నగర పరిధిలోని మేథావులను ఆలోచింప చేసేలా చేస్తున్నాయి.
ఇక విశాఖ ఎంపీ సీటును చాలా యేళ్ల తర్వాత గెలుచుకోవాలన్నది కాపుల కల. అయితే ప్రధాన పక్షాలేవి ఈ సామాజిక వర్గానికి సీటు ఇవ్వలేదు. అయితే ఈ సారి వైసీపీ కాపుల్లో అందులోనూ తూర్పు కాపు నుంచి మహిళకు సీటు ఇవ్వడం ఆ వర్గాల్లో ఐక్యత కొట్టొచ్చినట్టు కనపడుతోంది. ఇక జగన్ సంక్షేమ పథకాలతో పాటు విశాఖ రాజధాని ప్రభావం ఈ సారి ఇక్కడ బలంగా కనిపిస్తోంది. ఇలా ఝాన్సీకి కావాల్సినన్ని ప్లస్లు ఉంటే.. అటు టీడీపీ అభ్యర్థి శ్రీభరత్కు చెప్పుకోవడానికి ఒక్క ప్లస్సూ సరైంది లేదు. పేరుకు గీతం విద్యాసంస్థల చైర్మన్, ఉన్నత విద్యావంతుడు అంటున్నా.. ఆ దిశగా విశాఖలో యువతకు చేసిన సేవలు లేవు.. సమస్యల ప్రస్తావన లేదు.. ప్రజా పోరాటాలు కనపడడం లేదు.. కనీసం ఆకట్టుకునే స్పీచ్లు లేవు. మరి రేసులో సీనియర్ ఝాన్సీ ముందు పూర్తిగా వెనకపడిపోయిన భరత్ రేపటి ఎన్నికల్లో ఏం చేస్తాడో ? చూడాలి.