Apoorva Srinivasan: ఇటీవల సినీ తారలు ఒకరి తర్వాత ఒకరు అన్నట్లుగా పెళ్లి పీటలు ఎక్కేస్తున్నారు. తమ సింగిల్ లైఫ్ కు ఎండ్ కార్డు వేసి మింగిల్ అయిపోతున్నారు. ఇటీవలె రకుల్ ప్రీత్ సింగ్, తాప్సీ పన్ను వైవాహిక జీవితంలోకి అడుగుపెట్టారు. తాప్సీ అత్యంత రహస్యంగా తన ప్రియుడిని పెళ్లి చేసుకుంది. కనీసం పెళ్లి ఫోటోలు కూడా బయటకు రాకుండా జాగ్రత్త పడింది. తాజాగా మరో టాలీవుడ్ బ్యూటీ గప్చుప్ గా పెళ్లి పీటలెక్కింది. ప్రముఖ నటి అపూర్వ శ్రీనివాసన్ ఓ ఇంటిది అయ్యింది.
అపూర్వ శ్రీనివాసన్ మన తెలుగు అమ్మాయే. హైదరాబాద్ టైమ్స్ ఫ్రెష్ ఫేస్ కాంటెస్ట్లో విజేతగా నిలిచిన అపూర్వ.. టెంపర్ మూవీతో సినీ రంగ ప్రవేశం చేసింది. పూరీ జగన్నాథ్ డైరెక్ట్ చేసిన ఈ చిత్రంలో యంగ్ టైగర్ ఎన్టీఆర్, కాజల్ అగర్వాల్ జంటగా నటించారు. ఇందులో విలన్ల చేతిలో లైంగిక దాడికి గురై చనిపోయిన దీప్తి పాత్రలో అపూర్ణ శ్రీనివాసన్ నటించి మెప్పించింది. 2015లో విడుదలైన టెంపర్ మూవీ భారీ విజయాన్ని అందుకుంది.
ఆ సినిమా అనంతరం అపూర్వ శ్రీనివాసన్ తెలుగులో జ్యోతి లక్ష్మి, ఎక్కడికి పోతావు చిన్నవాడా, విన్నర్, తొలి ప్రేమ, కవచం, ప్రేమ కథా చిత్రం 2, అయోగ్య తదితర చిత్రాల్లో నటించింది. అలాగే జీ5 లో చిత్రం విచిత్రం అనే వెబ్ సిరీస్లో నటించి డిజిటల్ ఎంట్రీ ఇచ్చింది. 2019లో రంధవా మూవీతో కన్నడ సినీ పరిశ్రమలోకి అడుగు పెట్టింది. అయితే ఎంతో టాలెంట్ ఉన్నా కూడా అపూర్వ కేవలం సహాయక పాత్రలకు మాత్రమే పరిమితం అయింది.
ఈ క్రమంలోనే 2022 నుంచి వెండితెరకు దూరంగా ఉన్న అపూర్వ శ్రీనివాసన్ పైలట్ అయింది. ప్రస్తుతం పైలట్ గా ఉద్యోగం చేస్తూ సత్తా చాటుతోంది. ఇకపోతే తాజాగా అపూర్వ వైవాహిక జీవితంలోకి అడుగు పెట్టింది. శ్రేయాస్ శివకుమార్ అనే వ్యక్తితో కలిసి ఏడడుగులు వేసింది. కుటుంబ సభ్యులు, సన్నిహితుల సమక్షంలో ఈ జంట మూడు ముళ్ల బంధంతో ఒకటయ్యారు. సినీ పరిశ్రమ నుంచి హీరోయిన్ సిమ్రాన్ చౌదరి మాత్రమే ఆమె వివాహానికి హాజరు అయింది. ప్రస్తుతం అపూర్వ శ్రీనివాసన్ వెడ్డింగ్ ఫోటోలు సోషల్ మీడియాలో వైరల్ గా మారాయి. దీంతో నెటిజన్లు మరియు సినీ ప్రియులు శ్రేయాస్ శివకుమార్ మరియు అపూర్వ దంపతులకు శుభాకాంక్షలు తెలుపుతున్నారు.