Kovai Sarala: కోవై సరళ.. సౌత్ సినీ ప్రియులకు అత్యంత సుప్రసిద్ధురాలు. తమిళనాడులోని కోయంబత్తూరు లో ఒక మలయాళీ కుటుంబంలో జన్మించిన కోవై సరళ.. చిన్నతనం నుంచి నటనపై ఆసక్తి పెంచుకున్నారు. తొమ్మిదో తరగతిలో ఉన్నప్పుడే సినీ రంగ ప్రవేశం చేసిన కోవై సరళ.. హీరోయిన్ గా, లేడీ కమెడియన్ గా, సహాయక నటిగా 900 కి పైగా చిత్రాల్లో నటించారు. తెలుగు తమిళ భాషల్లో ప్రధానంగా సినిమాలు చేశారు. తనదైన కామెడీ టైమింగ్ మరియు ప్రత్యేకమైన బాడీ లాంగ్వేజ్ తో ప్రేక్షకుల గుండెల్లో తనకంటూ ఒక సుస్థిర స్థానాన్ని సంపాదించుకున్నారు.
గౌండమణి, సెంథిల్, వడివేలు, బ్రహ్మానందం మరియు వివేక్‌తో సహా అగ్ర హాస్యనటులందరితోనూ కోవై సరళ జ‌త క‌ట్టారు. వడివేలు మరియు బ్రహ్మానందంతో ఆమె చేసిన కామెడీ ట్రాక్‌లు విశేష ప్రజాదరణ పొందాయి. అలాగే ఇప్పటికీ వరుసగా సినిమాలు చేస్తూ ప్రేక్షకులను అలరిస్తున్న కోవై సరళ.. ఇటీవల అరణ్మనై 4 మూవీతో పలకరించారు. సుందర్‌ సి దర్శకత్వం వహించిన ఈ హర్రర్ మూవీ గత వారం విడుదలై పాజిటివ్ టాక్ ను సొంతం చేసుకుంది.
ఈ సంగతి పక్కన పెడితే.. కోవై సరళ వయసు 62 ఏళ్లు. కానీ ఇంతవరకు ఆమె వివాహం చేసుకోలేదు. ఇకపై చేసుకునే ఆలోచన కూడా ఆమెకు లేదు. అయితే ప్రొఫెషనల్ లైఫ్ లో సూపర్ సక్సెస్ అయిన కోవై సరళ పర్సనల్ లైఫ్ లో ఎందుకు వెనక పడ్డారు..? పెళ్లికి దూరంగా ఉండడానికి కారణం ఏంటి..? అనే ప్రశ్నలు చాలా మందిలో ఉన్నాయి. తాజాగా పెళ్లి చేసుకోకపోవడానికి కారణం ఏంటో కోవై సరళ ఓ టీవీ కార్యక్రమంలో స్పష్టం చేశారు. `జీవితంలో కచ్చితంగా పెళ్లి చేసుకోవాలనే రూల్ ఎక్కడా లేదు. స్వేచ్ఛ కోసమే నేను పెళ్లి చేసుకోలేదు. మనం భూమి మీదకు ఒంటరిగా వచ్చాము. తర్వాతే బంధాలన్నీ వచ్చాయి.
ప్ర‌స్తుత స‌మాజంలో పిల్లలు ఉన్న కూడా ఎంతో మంది చివరి రోజుల్లో ఒంటరి జీవితాన్ని గడుపుతున్నారు. మనల్ని ఒకరు చూడాలని అనుకోవడం పెద్ద తప్పు. ధైర్యంగా ముందుకు వెళ్లాలి` అంటూ కోవై సరళ చెప్పుకొచ్చారు. ఇక ఒకానొక సమయంలో ఆస్తి మొత్తం లాక్కుని కోవై సరళను ఆమె అక్కలు ఇంట్లో నుంచి గెంటేసినట్టు వార్తలు వచ్చాయి. ఈ వార్తల పై కూడా కోవై సరళ స్పందించారు. మా అక్కవాళ్ళు చాలా మంచివార‌ని.. వారిపై తప్పుడు కథనాలు రాసినందుకు ఎంతగానో బాధపడ్డాన‌ని కోవై సరళ తెలిపారు. త‌న‌ను ఎవ‌రూ ఇంట్లో నుంచి గెంటేయ‌లేద‌ని.. చెన్నైలో త‌న‌కు సొంత ఇల్లు ఉంద‌ని ఆమె వెల్ల‌డించారు.