Kiran Abbavaram: టాలీవుడ్ యంగ్ హీరో కిరణ్ అబ్బవరం త్వరలోనే పెళ్లి పీటలు ఎక్కబోతున్నాడు. తాజాగా అతని ఎంగేజ్మెంట్ ప్రముఖ హీరోయిన్ రహస్య గోరక్ తో వైభవంగా జరిగింది. బుధ‌వారం సాయంత్రం హైదరాబాదులోని ఓ రిసార్ట్ లో ఇరు కుటుంబ సభ్యులు, స‌న్నిహితులు మ‌రియు స్నేహితుల స‌మ‌క్షంలో కిరణ్ అబ్బవరం-రహస్య ఉంగరాలు మార్చుకున్నారు. ఇందుకు సంబంధించిన ఫోటోలు, వీడియోలు ఇప్పటికే సోషల్ మీడియాలో వైరల్ అవుతున్నాయి.
కిరణ్ అబ్బవరం, రహస్య జంటగా రాజావారు రాణిగారు చిత్రంలో నటించారు. ఇద్దరికీ ఇదే తొలి చిత్రం. రవికిరణ్ కోలా డైరెక్ట్ చేసిన ఈ రొమాంటిక్ డ్రామా 2019లో విడుదలై మంచి విజయాన్ని సాధించింది. అయితే ఈ సినిమా షూటింగ్ సమయంలోనే కిరణ్ రహస్య లవ్ లో పడ్డారు. వీరి ప్రేమ వ్యవహారంపై ఎప్పటి నుంచో వార్తలు వస్తున్నాయి. అయితే కిరణ్ అబ్బవరం ఓ సందర్భంలో రహస్య తనకు స్నేహితురాలు మాత్రమే అని చెప్పాడు.
కానీ ఇప్పుడేమో ఏకంగా ఆమెతో నిశ్చితార్థం చేసుకుని సర్ప్రైజ్ ఇచ్చాడు. దాదాపు ఐదేళ్ల నుంచి ప్రేమించుకుంటున్న కిరణ్ అబ్బవరం, రహస్య పెద్దల అంగీకారంతో త్వరలోనే పెళ్లి బంధంలోకి అడుగు పెట్టబోతున్నారు. వీరి పెళ్లి వేడుక ఆగస్టు నెలలో ఉండబోతుందని ఇన్సైడ్ టాక్ నడుస్తోంది. విదేశాల్లో కిరణ్ అబ్బవరం, రహస్య డెస్టినేషన్ వెడ్డింగ్ చేసుకోవడానికి ప్లాన్ చేసుకుంటున్నారు.
ఇక వివాహం అనంతరం హైదరాబాదులో గ్రాండ్ గా రిసెప్షన్ ఏర్పాటు చేయనున్నారని సమాచారం. కాగా, కెరీర్ విషయానికి వస్తే.. గత ఏడాది కిరణ్ అబ్బవరం నుంచి మూడు సినిమాలు వచ్చాయి. వినరో భాగ్యము విష్ణు కథ, మీటర్, రూల్స్‌ రంజన్ ఈ జాబితాలో ఉన్నాయి. అయితే 2023లో విడుదలైన ఈ మూడు సినిమాలు ఆశించిన స్థాయిలో విజయం సాధించలేదు. ప్రస్తుతం కిరణ్ అబ్బవరం రుక్సార్ ధిల్లాన్‌తో ఓ రొమాంటిక్ ఎంట‌ర్టైన‌ర్ గా న‌టిస్తున్నాడ‌ని తెలుస్తోంది.